Yabura 77:1-20

¹Asafi xa bɛɛti bɛɛtibae xa mangɛ Yedutun bɛ

²N nan n xui ratefe Ala nan ma. A a tuli matima nɛ n xui ra.

³Lɔxɔ xɔrɔxɔɛe na fa n ma, n nan n Marigi xilima nɛ. Kɔɛ ra, n nan n bɛlɛxɛ itala a bɛ, kɔnɔ n mu madundui sɔtɔma.

⁴N nan n natu Ala ma, n wa n bɔɲɛ ma. N nan n maɲɔxun a ma, limaniya ba n yi.

⁵I mu tinma n xa xi. N xaxili ifuxi, ɲan n mu nɔma wɔyɛnde.

⁶N nan n maɲɔxunma waxati dangixie ma.

⁷N nan n natuma nee ma n ma bɛɛtie saabui ra. N nan n yɛtɛ maxɔrin,

⁸«N Marigi mɛɛma nɛ ibunadama ra abadan? A mu hinnɛma mixie ra sɔnɔn?

⁹Danyi na a xa fanyi ma? A tondima a xa laayidie kamalide?

¹⁰A bara nɛɛmu a xa hinnɛ ma? A xa xɔnɛ bara nɔ a xa kinikini ra?

¹¹N ma tɔɔrɛ kui a luma n bɛ alɔ Ala Xili Xungbe Kanyi na masarafe.»

¹²A lanma n xa ratu Alatala xa walie ma, a xa kaabanakoe a naxee rabaxi tɛmui dangixi.

¹³N nan n xaxili rasigama nɛ i xa kɛwali birin ma, n nan n maɲɔxunma nɛ i xa walie ma.

¹⁴Ala, i xa kira sɛniyɛn. Ala gbɛtɛ mu na, i maniyɛ mu na!

¹⁵I tan Ala nan kaabanakoe rabama, i fe magaaxuxie masen ɲamanɛe tagi.

¹⁶I i xa ɲama xun saraxi i sɛnbɛ nan na, Yaxuba nun Yusufu xa mamadie.

¹⁷Ala, baa xungbe to i to, a dulonyi naxa sɛrɛn.

¹⁸Nuxuie naxa ye gbegbe ragoro, galanyi naxa bula koore ma, seyamakɔnyie naxa lu alɔ tanbɛ wolixie.

¹⁹I xa sarinyi xui naxa bula, seyamakɔnyi naxa duniɲa iyalan, bɔxi naxa a imaxa, a sɛrɛn.

²⁰I naxa kira rabɔɔ baa ma, i dangi ye xungbe tagi, kɔnɔ i fɔxi mu to.