Yabura 74:7-19

⁷e naa gan tɛ ra. E bara na yire mabere i xili sabatixi dɛnnaxɛ.

⁸E nu a falama nɛ e bɔɲɛ ma, «Won xa e sɔntɔ!» E bara Ala xa batudee birin gan.

⁹I xa kaabanakoe mu toma, namiɲɔnmɛe fan mu na muxu ya ma kɔrɛ. Muxu mu a kolon yi fe buma han tɛmui mundun.

¹⁰Ee Ala, yaxui mayele tima han tɛmui mundun? Danyi mu na e xa konbie ma?

¹¹Munfe ra i mu i sɛnbɛ magaaxuxi masen e bɛ? I xa keli, i xa e sɔntɔ!

¹²Kabi tɛmui xɔnkuye, Ala nan na n ma mangɛ ra, a tan naxan findixi xunnakeli saabui ra duniɲa ma.

¹³I tan nan baa ibɔɔ i sɛnbɛ ra, i daalise magaaxuxie xunyie ibutuxun naa.

¹⁴I tan nan e xunyie ibutuxun, i e fi donse ra wulai subee ma.

¹⁵I tan nan dulonyie nun xuree rabɔɔ, i tan nan dabonyie raxɔri, naxee mu darixi xɔri ra.

¹⁶Yanyi nun kɔɛ findixi i gbe nan na, kike nun soge, i tan nan e daaxi.

¹⁷I tan nan bɔxie naaninyie birin saxi. I tan nan sogofure nun ɲɛmɛ daa.

¹⁸I xa ratu a ma a muxu yaxuie na i tan Alatala nan maberefe, ɲama xaxilitare na i xili bɛxufe!

¹⁹Yandi, i naxa i xa ɲama xanuxi rabolo alɔ ganbɛ di raboloma sɛgɛ yi ra ki naxɛ. I naxa nɛɛmu i xa misikiinɛe ma.