Yabura 72:9-20

⁹Mixi naxee na wula i, e xinbi sinma nɛ a bun ma, a yaxuie lu a sanyi bun ma.

¹⁰Tarasisi mangɛe nun Suri mangɛe fama nɛ buɲae ra. Seeba nun Seba mangɛe fan duuti fima nɛ a ma.

¹¹Mangɛ birin e xinbi sinma nɛ a bun ma, sie birin lu a xa yaamari bun ma.

¹²Na kui setaree fama nɛ a xilide marakisima. A misikiinɛ sɛnbɛtare malima nɛ.

¹³A kinikinima nɛ sɛnbɛtaree nun setaree ma, a tɔɔrɔmixie rakisi.

¹⁴A e xɔrɛyama nɛ maifui nun fe kobie ma, barima e findixi a xanuntenyie nan na.

¹⁵A xa mangɛya xa bu! A Seeba bɔxi xa xɛɛma sɔtɔma nɛ. Mixie xa Ala maxandi a bɛ tɛmui birin, e naxa tagan dubade a bɛ.

¹⁶Ala donse yiriwama nɛ bɔxi kui. Geyae rafema nɛ sansie ra, e bogie lu alɔ sansi bogi naxee na Liban. Mixie gboma nɛ taa kui alɔ bɔxi sɛxɛ.

¹⁷Mangɛ Ala xili gbo abadan! Dan mu na a xili ma soge bun ma. Si birin barakɛ sɔtɔma nɛ a saabui ra, e fa a matɔxɔ.

¹⁸Isirayila Marigi Alatala tantu. A keren nan kaabanakoe rabama.

¹⁹A xili xungbe xa tantu abadan. Duniɲa birin xa a xa binyɛ kolon. Amina! Amina!

²⁰Yisayi xa di Dawuda xa maxandie raɲɔnyi nan na ki.