Yabura 39:1-13

¹Dawuda xa bɛɛti bɛɛtibae xa mangɛ Yedutun bɛ

²N bara a fala, «N fe birin nabama, alako n naxa yunubi raba n dɛ ra. N fe birin nabama, alako n naxa na wɔyɛnyi mɔɔli fala mixi ɲaaxie ya xɔri.»

³N ma tɔɔrɛ xungbe kui, n naxa dundu, n mu sese fala, n naxa n sabari tun.

⁴N bɔɲɛ nu satunma, n ma tɔɔrɛ naxa lu alɔ tɛ dɛxɛxi. Na bara a niya n xa yi wɔyɛnyi fala,

⁵«Alatala, a masen n bɛ n faxama tɛmui mundun, n ma simaya sigama han minden, alako n xa n sɛnbɛ xa xurunyi kolon.

⁶I bara n ma simaya radunke, a xɔn mu kuya sɔnɔn. Adama luma alɔ foye naxan dangima.» Ɲɛngi rate.

⁷Adama luxi nɛ alɔ niini, naxan minima, a fa dangi. A naafuli malanma, kɔnɔ naxan fama a sɔtɔde, a mu na kolon.

⁸N Marigi, n fa n xaxili tima nde ra? I tan nan gbansan nɔma n malide.

⁹N nakisi n ma yunubie birin ma. I naxa n nayaagi daxuie ya xɔri.

¹⁰N bara dundu, n mu sese falama, barima i tan nan na walife.

¹¹I xa fure ba n ma, beenu i xa n naɲɔn tɔɔrɛ kui.

¹²I mixi ɲaxankatama a xa yunubi xa fe ra. Naxan nafan adama ma, i na bama a yi. Na fe luma nɛ alɔ kuli naxan bogise fanyi xun nakanama beenu mixi xa a matongo. Adamadi misaalixi foye nan na naxan dangima. Ɲɛngi rate.

¹³Alatala, n ma dubɛ suxu, i xa i tuli mati n ma maxandi ra. I xa n wa xui mɛ, barima i xa xɔɲɛ nan n na. N luma alɔ n benbae, n mu buma yi duniɲa bɛndɛ fuɲi fari.