Yabura 37:22-38

²²Alatala xa barakatɔɛe yi bɔxi sɔtɔma nɛ kɛ ra, kɔnɔ Ala naxan dankama, na kanyi fama halakide.

²³Naxan ɲɛrɛ ki rafan Alatala ma, a na kanyi malima nɛ a xa duniɲɛigiri kui.

²⁴Hali a sa dinkon, a mu birama, barima a bɛlɛxɛ na Alatala yi ra.

²⁵Kabi n dimɛdi tɛmui, han n xɛmɔxi ra, n mu tinxintɔɛ keren toxi Ala naxan nabɛɲinxi, naxan xa die taami makulama.

²⁶Tinxintɔɛ ki tima, a mixie donima. A xa die barakɛ sɔtɔma nɛ.

²⁷I xa fe kobi lu na, i xa fe fanyi raba. Na kui i simaya xɔnkuye sɔtɔma nɛ.

²⁸Sɛriyɛ rafan Alatala ma. A mu a xa hinnɛntee rabɛɲinma. A e kantama nɛ abadan. Kɔnɔ mixi ɲaaxie bɔnsɔɛ fama nɛ halakide.

²⁹Tinxintɔɛe fama nɛ yi bɔxi sɔtɔde kɛ ra, e lu be abadan.

³⁰Tinxintɔɛ lɔnni nan masenma, sɛriyɛ nan minima a dɛ kui.

³¹A Marigi Ala xa sɛriyɛ na a bɔɲɛ kui, a mu birama kira xɔn.

³²Mixi ɲaaxi tinxintɔɛ yanfama, a xa a faxa.

³³Kɔnɔ Alatala mu tinxintɔɛ luma a yaxuie sagoe. A mu tinma e xa a tɔɔɲɛgɛ kiiti tɛmui.

³⁴I xaxili ti Alatala ra, a xa kira suxu, alako a xa i rakeli, i xa yi bɔxi sɔtɔ kɛ ra. Na tɛmui i mixi ɲaaxie toma nɛ e halakixi.

³⁵Tɛmui dangixi n bara sɛnbɛma ɲaaxi nde to. A xungbo alɔ wuri tofanyi.

³⁶Kɔnɔ n to dangi a yire a firin nde, n naxa a li a xa fe xuben. N naxa a fen, kɔnɔ n mu a to.

³⁷I xa mixi fanyi nan mato, tinxintɔɛ nan igbɛ. Na mixi mɔɔli findima barakatɔɛ nan na.

³⁸Kɔnɔ yunubitɔɛe tan fama nɛ sɔntɔde, e bɔnsɔɛ birin fa halaki.