Yabura 37:2-29

²E lisima nɛ mafuren alɔ ɲooge, e faxama nɛ alɔ sansie.

³I xa i taxu Alatala ra, i xa fe fanyi rabatu. I xa lu yi bɔxi ma, nɔndi xa findi i xa baloe ra.

⁴Alatala xa findi i waxɔnfe ra. Na kui a i waxɔnfe ragirima nɛ.

⁵I i xaxili ti Alatala ra, a birin taxu a ra. A tan nan fe ragirima.

⁶Ala fama i xa nɔndi makɛnɛnde alɔ a soge raminima ki naxɛ gɛɛsɛgɛ. A i xa xunnakeli makɛnɛnma alɔ soge naxan yanbama yanyi ra.

⁷I bɔɲɛ raxara Alatala ya i, i xa mamɛ ti, Ala na na. I naxa mixi ɲaaxi tɔɔnɛ hali a xa fe birin sɔɔnɛyaxi.

⁸I naxa xɔnɔ, i i bɔɲɛ magoro. Na tɔɔnɛ lu na, a mu fee sɔɔnɛyama i bɛ.

⁹Ala fama mixi ɲaaxie raɲɔnde, kɔnɔ naxee e xaxili tixi Ala ra, e fama yi bɔxi sɔtɔde kɛ ra.

¹⁰A mu buma mixi ɲaaxie xa lɔɛ duniɲa ma. E mu toma dɛdɛ.

¹¹Naxee bɔɲɛe magoroxi, e tan nan fama yi bɔxi sɔtɔde kɛ ra, e lu bɔɲɛsa kui.

¹²Tinxintare tinxintɔɛ yanfama, a xɔnɔ a ma.

¹³Kɔnɔ Marigi yelema na mixi ɲaaxi ma, barima a a kolon a fama naxan sɔtɔde.

¹⁴Mixi ɲaaxie santidɛgɛma bama a tɛɛ i, e xali fan suxu, alako e xa misikiinɛ nun setare tɔɔrɔ, e xa tinxintɔɛ kɔn naxaba.

¹⁵Kɔnɔ e tan nan fama faxade e yɛtɛ xa santidɛgɛma saabui ra. E xa xalie fama girade.

¹⁶Se xuri naxan na tinxintɔɛ yi ra, a fisa mixi ɲaaxie xa bannaya bɛ,

¹⁷barima Alatala e sɛnbɛ kanama nɛ, a fa tinxintɔɛ mali.

¹⁸Alatala ɲɛngi saxi mixi fanyi xɔn. E kɛ buma nɛ abadan.

¹⁹E mu yaagima tɔɔrɛ tɛmui, e lugama nɛ kaamɛ waxati.

²⁰Kɔnɔ mixi ɲaaxie faxama nɛ. Alatala yaxuie luma nɛ alɔ fiili, naxan sɛxɛ lisima, a fa gan.

²¹Mixi ɲaaxi doni tongoma nɛ, kɔnɔ e mu a fima. Mixi fanyi tan mixie kima a xa fonisireya kui.

²²Alatala xa barakatɔɛe yi bɔxi sɔtɔma nɛ kɛ ra, kɔnɔ Ala naxan dankama, na kanyi fama halakide.

²³Naxan ɲɛrɛ ki rafan Alatala ma, a na kanyi malima nɛ a xa duniɲɛigiri kui.

²⁴Hali a sa dinkon, a mu birama, barima a bɛlɛxɛ na Alatala yi ra.

²⁵Kabi n dimɛdi tɛmui, han n xɛmɔxi ra, n mu tinxintɔɛ keren toxi Ala naxan nabɛɲinxi, naxan xa die taami makulama.

²⁶Tinxintɔɛ ki tima, a mixie donima. A xa die barakɛ sɔtɔma nɛ.

²⁷I xa fe kobi lu na, i xa fe fanyi raba. Na kui i simaya xɔnkuye sɔtɔma nɛ.

²⁸Sɛriyɛ rafan Alatala ma. A mu a xa hinnɛntee rabɛɲinma. A e kantama nɛ abadan. Kɔnɔ mixi ɲaaxie bɔnsɔɛ fama nɛ halakide.

²⁹Tinxintɔɛe fama nɛ yi bɔxi sɔtɔde kɛ ra, e lu be abadan.