Yabura 119:72-112

⁷²I xa masenyi fan n bɛ xɛɛma nun gbeti ra.

⁷³I tan nan n daaxi, i tan nan n nafalaxi i xɔnyɛ ra. Fahaamui fi n ma i xa yaamarie kolonfe ra.

⁷⁴I yaragaaxuie xa sɛɛwa n tofe ra, barima n xaxili tixi i xa masenyi ra.

⁷⁵Alatala, n a kolon i xa kiiti tinxinxi ra, n a kolon i n ma fe magoroxi xanunteya nan ma.

⁷⁶Yandi, i xa xanunteya xa n madundu, alɔ i a laayidi n tan, i xa konyi bɛ ki naxɛ.

⁷⁷I xa kinikini n ma alako n xa kisi, barima i xa sɛriyɛ rafan n ma.

⁷⁸Yɛtɛ igboe xa yaagi sɔtɔ, barima n mu fe yo rabaxi e ra e n tɔɔrɔma naxan ma. N tan ɲɔxɔ sama i sago nan xɔn ma.

⁷⁹I yaragaaxuie xa gbilen n ma, a nun naxee i xa masenyi kolon.

⁸⁰N bɔɲɛ xa i xa yaamarie suxu, alako yaagi naxa fa dusu n xun na.

⁸¹A xɔli n ma n xa i xa kisi sɔtɔ, kɔnɔ n xaxili tixi i xa masenyi nan na.

⁸²N i xa laayidi rakamalixi mamɛfe. N a falama n bɔɲɛ kui, «I n madunduma mun tɛmui?»

⁸³N luxi alɔ kundi naxan na raxarafe, kɔnɔ n mu nɛɛmuma i xa yaamarie ra.

⁸⁴N xa mamɛ ti han mun tɛmui, beenun i xa n yaxuie ɲaxankata?

⁸⁵Yɛtɛ igboe gantanyi tima n ya ra. Sɛriyɛ mu na ki.

⁸⁶I xa yaamari birin tinxin. N natanga tɔɔɲɛgɛ ma.

⁸⁷A gbe mu luxi e xa n ma fe kana, kɔnɔ n tondi nɛ i xa yaamarie rabolode.

⁸⁸N nakisi i xa xanunteya ra, alako n xa i xa masenyi suxu.

⁸⁹Alatala, i xa masenyi na koore ma abadan.

⁹⁰I xa xanunteya buma nɛ kelife to bɔnsɔɛ ma han bɔnsɔɛ naxee sa fama. I duniɲa xanxi nan daa.

⁹¹I xa sɛriyɛ buma han to, birin na i xa mangɛya nan bun ma.

⁹²Xa n mu sɛɛwa i xa sɛriyɛ ra nu, n bara bɔnɔ n ma tɔɔrɛ kui nu.

⁹³N mu nɛɛmuma i xa masenyi ra feo, barima i n kisixi e tan nan saabui ra.

⁹⁴N bara n yɛtɛ fi i ma, n nakisi. N tinma i sago suxufe ra.

⁹⁵Mixi ɲaaxie wama n faxafe, kɔnɔ n tan ɲɔxɔ saxi i xa masenyi xɔn ma.

⁹⁶N a kolon duniɲa fe birin ɲɔnma nɛ, kɔnɔ i xa sɛriyɛ mu kanama abadan.

⁹⁷I xa sɛriyɛ rafan n ma. N na n ɲɔxɔ saxi a xɔn ma kudɛ.

⁹⁸I xa yaamarie n findima fahaamula nan na dangi n yaxuie ra, barima e na n bɔɲɛ kui tɛmui birin.

⁹⁹N xaxili fan n karamɔxɔe xaxili bɛ, barima n na n ɲɔxɔ saxi i xa masenyi nan xɔn ma.

¹⁰⁰N fe kolon dangife forie ra, barima n i sago rabatuxi.

¹⁰¹N bara n sanyi ba kira ɲaaxie xɔn ma, n xa bira i xa masenyi fɔxɔ ra.

¹⁰²N mu i xa sɛriyɛ bɛɲin, barima i tan nan yati n xaran na ra.

¹⁰³I xa masenyi ɲɔxun n dɛ kui dangi kumi ra.

¹⁰⁴N xaxili fanyi sɔtɔ i sago nan na. Na kui n bara kira ɲaaxie tan xɔn.

¹⁰⁵I xa masenyi findixi lanpui nan na n san tide, a findi naiyalanyi ra n ma kira xɔn ma.

¹⁰⁶N bara laayidi tongo naxan mu kanama, n fama nɛ birade i xa sɛriyɛ tinxinxi fɔxɔ ra.

¹⁰⁷N bara tɔɔrɔ a gbe ra. Alatala, n nakisi i xa masenyi ra.

¹⁰⁸Alatala, n bara i maxandi, i xa n ma matɔxɔɛ suxu sɛrɛxɛ ra, i xa n xaran i sago ra.

¹⁰⁹N nii na faxɛ ya i tɛmui birin, kɔnɔ n mu nɛɛmuma i xa sɛriyɛ ma.

¹¹⁰Mixi ɲaaxie gantanyi tema n bɛ, kɔnɔ n mu n makuyama i sago ra.

¹¹¹I xa masenyi findixi n kɛ nan na abadan, a n bɔɲɛ rasɛɛwama nɛ.

¹¹²N bɔɲɛ birama nɛ i xa yaamarie fɔxɔ ra abadan.