Yabura 119:107-164

¹⁰⁷N bara tɔɔrɔ a gbe ra. Alatala, n nakisi i xa masenyi ra.

¹⁰⁸Alatala, n bara i maxandi, i xa n ma matɔxɔɛ suxu sɛrɛxɛ ra, i xa n xaran i sago ra.

¹⁰⁹N nii na faxɛ ya i tɛmui birin, kɔnɔ n mu nɛɛmuma i xa sɛriyɛ ma.

¹¹⁰Mixi ɲaaxie gantanyi tema n bɛ, kɔnɔ n mu n makuyama i sago ra.

¹¹¹I xa masenyi findixi n kɛ nan na abadan, a n bɔɲɛ rasɛɛwama nɛ.

¹¹²N bɔɲɛ birama nɛ i xa yaamarie fɔxɔ ra abadan.

¹¹³N filankafui xɔnma, kɔnɔ i xa sɛriyɛ rafan n ma.

¹¹⁴N kantari nun n makantama na i tan nan na, n xaxili tixi i xa masenyi ra.

¹¹⁵Wo wo masiga n na, wo tan mixi kobie, alako n xa Ala xa yaamarie ratinmɛ.

¹¹⁶N dɛmɛn alɔ i a laayidi ki naxɛ, alako n xa kisi. I naxa fe kana n xaxili tixi naxan na.

¹¹⁷I xa ti n fanga ra, alako n xa kisi. N ya tixi i xa yaamarie ra.

¹¹⁸I xa tondi mixie ra naxee e makuyama i xa sɛriyɛ ra, barima madaxuɲa nun wule na e xa fe birin kui.

¹¹⁹I mixi kobie ɲɔnma nɛ yi duniɲa ma, alɔ xabui gbeti gbi bama ki naxɛ. Na nan a ra i xa masenyi rafan n ma.

¹²⁰N fate sɛrɛnma i xa magaaxui ra, n hanmɛxi i xa kiiti ra.

¹²¹N walima nɔndi nun tinxinyi nan na. I naxa n lu n yaxuie yi ra.

¹²²I xa n ma fe sɔɔnɛya i sɛnbɛ ra, I naxa lu yɛtɛ igboe xa nɔ n na.

¹²³N ya tixi i xa kisi ra tɛmui birin, a nun i xa masenyi tinxinxi.

¹²⁴Hinnɛ i xa konyi ra i xa xanunteya kui. N xaran i xa yaamarie ra.

¹²⁵Fahaamui fi n tan, i xa konyi ma, alako n xa i xa masenyi kui kolon.

¹²⁶Mixie na i xa sɛriyɛ matandife. Alatala, a lanma i xa ti e ya ra yakɔsi.

¹²⁷I xa yaamarie rafanxi n ma dangife xɛɛma fanyi ra,

¹²⁸n to a maɲɔxun i sago tinxin, n kira birin xɔnma nɛ naxan mu findi nɔndi ra.

¹²⁹I xa masenyi n dɛ ixarama, n a rabatuma na nan ma.

¹³⁰I xa masenyi kui matofe, a xaxili fima nɛ xaxilitaree ma.

¹³¹A na n nii ra n xa i sago kolon.

¹³²I ya rafindi n ma, i xa hinnɛ n na, alɔ i darixi a raba ra ki naxɛ i xanuntenyie bɛ.

¹³³I xa n ti i xa masenyi fari, i naxa lu fe ɲaaxi yo xa nɔ n na.

¹³⁴N ba adamadie xa nɔɛ bun ma, alako n xa i xa yaamarie ratinmɛ.

¹³⁵I yatagi nɔrɛ rayanba i xa konyi ma, i xa n xaran i xa yaamarie ra.

¹³⁶N luma wa ra a gbe ra, barima n a kolon mixie mu i xa sɛriyɛ ratinmɛma.

¹³⁷Alatala i tinxin, i xa kiitie fan tinxin.

¹³⁸I xa masenyi tinxin, a man findixi nɔndi yati nan na.

¹³⁹N bɔɲɛ raɲaaxuma nɛ n ma, barima n yaxuie mu e tuli matima i xa masenyi ra.

¹⁴⁰I xa masenyi bara a yɛtɛ xa nɔndi masen, a rafan n tan i xa konyi ma.

¹⁴¹Hali n xurun, mixie yoma n ma, n mu nɛɛmuma i sago ma.

¹⁴²I xa tinxinyi buma abadan. I xa sɛriyɛ nɔndi na a ra.

¹⁴³Sunnunyi nun tɔɔrɛ n suxuxi, kɔnɔ i xa yaamarie nɔxun n bɛ.

¹⁴⁴I xa sɛriyɛe tinxin abadan. Fahaamui fi n ma alako n xa kisi.

¹⁴⁵Alatala, n na n dɛ rawafe i bɛ n bɔɲɛ birin na. N yaabi, alako n xa nɔ i xa yaamarie ratinmɛde.

¹⁴⁶N na n dɛ rawafe i bɛ. N nakisi, alako n xa nɔ i sago rabade.

¹⁴⁷N kelima beemanu subaxɛ xa a li, n i maxandi i xa n dɛmɛn. N xaxili tixi i xa masenyi nan na.

¹⁴⁸N mu xima kɔɛ ra, n na n maɲɔxunma i xa masenyi nan tun ma.

¹⁴⁹I i tuli mati n xui ra i xa xanunteya xa fe ra. Alatala, n nakisi i xa kiiti bɛrɛ ra.

¹⁵⁰Mixie bara maso n na, naxee wama fe ɲaaxie xɔn. E makuya i xa sɛriyɛ ra.

¹⁵¹Kɔnɔ i tan Alatala, i makɔrɛ n na, i xa yaamarie findixi nɔndi nan na.

¹⁵²N a kolon kabi a rakuya, i bara i xa masenyi mabanban alako a xa bu abadan.

¹⁵³N ma tɔɔrɛ mato, i xa n nakisi, barima n mu nɛɛmuxi i xa sɛriyɛ ma.

¹⁵⁴I xa n xun mafala, i xa n xun sara. N nakisi alɔ i a laayidi ki naxɛ.

¹⁵⁵Kisi makuya mixi ɲaaxie ra, barima e mu birama i xa yaamarie fɔxɔ ra.

¹⁵⁶Alatala, i xa kinikini gbo. N nakisi i xa kiiti bɛrɛ ra.

¹⁵⁷N gerefae wuya, kɔnɔ n mu gbilen i sago fɔxɔ ra.

¹⁵⁸I yanfamae tofe raɲaaxu n ma, barima e mu i xa masenyi suxuma.

¹⁵⁹A mato, i xa yaamarie rafan n ma. Alatala, n nakisi i xa xanunteya xa fe ra.

¹⁶⁰I xa masenyi nɔndi na a ra, i xa kiiti tinxinxi buma nɛ abadan.

¹⁶¹Mangɛe n tɔɔrɔma hali n mu fe ɲaaxi yo rabaxi e ra, kɔnɔ n gaaxuma i xa masenyi ya ra n bɔɲɛ birin na.

¹⁶²N sɛɛwaxi i xa laayidi ra, alɔ mixi naxan geeni xungbe sɔtɔxi.

¹⁶³N wule xɔnxi, a raɲaaxu n ma, kɔnɔ i xa sɛriyɛ n xanuntenyi na a ra.

¹⁶⁴N i matɔxɔma sanmaya solofere lɔxɔ yo lɔxɔ i xa kiiti tinxinxi xa fe ra.