2 Deramɛɛ, ma nɛ́? Bↄ́mɛɛ, ma nɛ́'ina? À kɛ̀ deramɛɛ, nɛ́ kũ ma a lɛ́ sɛ̀ Ludanɛ?
3 Ǹsun n wó dɛ nↄgbɛ̃nↄ kĩnaaro, ǹsun zɛ́ kũ àdi kínanↄ yaka sɛ́ro.
4 Lemuɛli, sèwɛ̃ de kínanↄ pↄ́mina ũro, í gbãna de kpatablerinↄ pↄ́mina ũro,
5 de òsun mi, dokayãnↄ sãńgu, ò yã gↄ̃gↄ̃ takasidenↄnɛ faya sariro yãi.
6 À í gbãna kpá gbɛ̃ kũ òtɛn ganↄa, à sèwɛ̃ kpá pↄsiradenↄa
7 ò mi, ń takasi sãńgu, ń yã'ũmmana súngↄ̃ dↄńgu doro.
8 Ǹ yã o gbɛ̃ kũ oni fↄ̃ ò yã oronↄ gɛ̃nɛ ũ, ǹ yã sí gbɛ̃ kũ ò kpanyĩri vĩronↄnɛ.
9 Ǹsungↄ̃ yĩtɛnaro, ǹ yãkpatɛ kɛ a zɛ́a. Ǹ takasidenↄ kũ wɛ̃ndadenↄ yã nna kpáḿma.
10 Dí mɛ́ ani nↄ laakaride lee? A bɛ̀ɛrɛ vĩ de gbɛ̀ bɛ̀ɛrɛdenↄla zã̀.
11 A zã dìgↄ̃ a náani kɛ kũ nɛ̀sɛdoomɛ, pↄ́ mana ke dì kĩaaro.
12 Yã manan àdigↄ̃ kɛ a zãnɛ, adi kɛ yã vãninlo ari a wɛ̃̀ndi lɛ́n.
13 Àdi sãkã kũ bàwisio wɛtɛ à a ↄzĩ kɛ kũ pↄnnao.
14 Àdi gɛ́ pↄ́ble sɛ́ zã̀ lán gó'itɛ lagatarii bà.
15 Àdi futɛ gukɛ̃kↄ̃ana à pↄ́ble kɛ a ↄndenↄnɛ, àdi zĩ kpaatɛtɛ a nↄkparenↄnɛ.
16 Àdi zĩtɛ mana wɛtɛ à lú, àdi geepi línↄ pɛ́pɛn kũ a zĩda bↄ̀kↄↄ ↄgↄo.
17 Àdi gbãna dↄ a pia asa ũ à gã̀sãwa bobo a zĩa.
18 Àdigↄ̃ dↄ̃ kũ áni ɛtɛ le, a fitilaa dìgↄ̃ nana gwãanimɛ.
19 A ↄ dìgↄ̃ porona àgↄ̃ buutãbↄ kũna, àdigↄ̃ kɛkɛ ũ wã kũ a ↄnɛo.
20 Àdi ↄ poro wɛ̃ndadenↄnɛ, àdi ↄ lika takasidenↄi.
21 Àdi ĩampurugↄrↄ vĩna kɛ a bedenↄ yã musuro, zaakũ a ↄndenↄ dì uta didikↄ̃amɛ.
22 Àdi wutɛbↄ bizanↄ tã a zĩda, a pↄ́kasanↄ bi táaru biza kũ biza gaaruradenↄmɛ.
23 A zã dì tↄ́ bo fàaibokia, àdigↄ̃ vutɛna gu dokↄ̃nↄ kũ bùsu gbɛ̃ zↄ̃kↄ̃nↄ.
24 Nↄgbɛ̃ pìi dì pↄ́dangãn kɛ àgↄ̃ yía, àdi gère tã à kpá a lagatarinↄa.
25 Àdigↄ̃ gbãna kũ gakurio dana pↄ́kasa ũ, a kunna zia yã dì swɛ̃̀ kɛ̃aguro.
26 Ɔ̃ndↄ̃yã dìgↄ̃ da a lɛ́n, àdi yã dańnɛ kũ yenyĩo.
27 A wɛ́ dìgↄ̃ pɛ́ a ↄn yãkɛnaai, àdi pↄ́ ble ma'ãnlo.
28 A nɛ́nↄ dì futɛ ò sa mana onɛ, a zã dì a sáabu kpá à pi:
29 Nↄgbɛ̃nↄ kokari vĩ dasi fá, ama mↄkↄ̃n mɛ́ ń deńla ń pínki.
30 Kakana mana dìgↄ̃ náani vĩro, nↄmanakɛ dì gɛ̃ zɛ́lamɛ, nↄgbɛ̃ kũ à Dikiri vĩna vĩn òdi sáabu kpá.
31 Ǹ zĩ kũ à kɛ̀ àre kpáa, ǹ a tↄ́ kpá a yãkɛnaa musu batun.
