YAASINƆ 31:2-31 - Luda yã takada kũ Bisã yão

YAASINƆ 31:2-31

Click on verse(s) to share them!

²Deramɛɛ, ma nɛ́? Bↄ́mɛɛ, ma nɛ́'ina? À kɛ̀ deramɛɛ, nɛ́ kũ ma a lɛ́ sɛ̀ Ludanɛ?

³Ǹsun n wó dɛ nↄgbɛ̃nↄ kĩnaaro, ǹsun zɛ́ kũ àdi kínanↄ yaka sɛ́ro.

⁴Lemuɛli, sèwɛ̃ de kínanↄ pↄ́mina ũro, í gbãna de kpatablerinↄ pↄ́mina ũro,

⁵de òsun mi, dokayãnↄ sãńgu, ò yã gↄ̃gↄ̃ takasidenↄnɛ faya sariro yãi.

⁶À í gbãna kpá gbɛ̃ kũ òtɛn ganↄa, à sèwɛ̃ kpá pↄsiradenↄa

⁷ò mi, ń takasi sãńgu, ń yã'ũmmana súngↄ̃ dↄńgu doro.

⁸Ǹ yã o gbɛ̃ kũ oni fↄ̃ ò yã oronↄ gɛ̃nɛ ũ, ǹ yã sí gbɛ̃ kũ ò kpanyĩri vĩronↄnɛ.

⁹Ǹsungↄ̃ yĩtɛnaro, ǹ yãkpatɛ kɛ a zɛ́a. Ǹ takasidenↄ kũ wɛ̃ndadenↄ yã nna kpáḿma.

¹⁰Dí mɛ́ ani nↄ laakaride lee? A bɛ̀ɛrɛ vĩ de gbɛ̀ bɛ̀ɛrɛdenↄla zã̀.

¹¹A zã dìgↄ̃ a náani kɛ kũ nɛ̀sɛdoomɛ, pↄ́ mana ke dì kĩaaro.

¹²Yã manan àdigↄ̃ kɛ a zãnɛ, adi kɛ yã vãninlo ari a wɛ̃̀ndi lɛ́n.

¹³Àdi sãkã kũ bàwisio wɛtɛ à a ↄzĩ kɛ kũ pↄnnao.

¹⁴Àdi gɛ́ pↄ́ble sɛ́ zã̀ lán gó'itɛ lagatarii bà.

¹⁵Àdi futɛ gukɛ̃kↄ̃ana à pↄ́ble kɛ a ↄndenↄnɛ, àdi zĩ kpaatɛtɛ a nↄkparenↄnɛ.

¹⁶Àdi zĩtɛ mana wɛtɛ à lú, àdi geepi línↄ pɛ́pɛn kũ a zĩda bↄ̀kↄↄ ↄgↄo.

¹⁷Àdi gbãna dↄ a pia asa ũ à gã̀sãwa bobo a zĩa.

¹⁸Àdigↄ̃ dↄ̃ kũ áni ɛtɛ le, a fitilaa dìgↄ̃ nana gwãanimɛ.

¹⁹A ↄ dìgↄ̃ porona àgↄ̃ buutãbↄ kũna, àdigↄ̃ kɛkɛ ũ wã kũ a ↄnɛo.

²⁰Àdi ↄ poro wɛ̃ndadenↄnɛ, àdi ↄ lika takasidenↄi.

²¹Àdi ĩampurugↄrↄ vĩna kɛ a bedenↄ yã musuro, zaakũ a ↄndenↄ dì uta didikↄ̃amɛ.

²²Àdi wutɛbↄ bizanↄ tã a zĩda, a pↄ́kasanↄ bi táaru biza kũ biza gaaruradenↄmɛ.

²³A zã dì tↄ́ bo fàaibokia, àdigↄ̃ vutɛna gu dokↄ̃nↄ kũ bùsu gbɛ̃ zↄ̃kↄ̃nↄ.

²⁴Nↄgbɛ̃ pìi dì pↄ́dangãn kɛ àgↄ̃ yía, àdi gère tã à kpá a lagatarinↄa.

²⁵Àdigↄ̃ gbãna kũ gakurio dana pↄ́kasa ũ, a kunna zia yã dì swɛ̃̀ kɛ̃aguro.

²⁶Ɔ̃ndↄ̃yã dìgↄ̃ da a lɛ́n, àdi yã dańnɛ kũ yenyĩo.

²⁷A wɛ́ dìgↄ̃ pɛ́ a ↄn yãkɛnaai, àdi pↄ́ ble ma'ãnlo.

²⁸A nɛ́nↄ dì futɛ ò sa mana onɛ, a zã dì a sáabu kpá à pi:

²⁹Nↄgbɛ̃nↄ kokari vĩ dasi fá, ama mↄkↄ̃n mɛ́ ń deńla ń pínki.

³⁰Kakana mana dìgↄ̃ náani vĩro, nↄmanakɛ dì gɛ̃ zɛ́lamɛ, nↄgbɛ̃ kũ à Dikiri vĩna vĩn òdi sáabu kpá.

³¹Ǹ zĩ kũ à kɛ̀ àre kpáa, ǹ a tↄ́ kpá a yãkɛnaa musu batun.