Y Salmo Sija 94:1-14

¹O Jeova, Yuus Jao, ni y inemog iyomo; O Yuus Jao, ni y inemog iyomo, famanuen maesajao ni y minalag.

²Jatsa jao julo, jago y jues y tano: nae ni y apasñija y mansobetbio.

³Jeova, asta ngaean y manaelaye, asta ngaean y manaelaye nae ufanmagana?

⁴Sija manmefno, sija sumangan sinaguat yan todo y chumochogüe y tinaelaye manbanidoso.

⁵Sa sija yumamag ya japedasitos y taotaomo, O Jeova, yan janafanpinite y erensiamo.

⁶Sija pumuno y biuda yan taotao juyong, yan japuno y manaetata.

⁷Sa ilegñija: Si Jeova ti ujalie, ni si Yuus Jacob ti ufanatituye.

⁸Fanatituye, jamyo managuaguat gui taotao: yan jamyo mangaduco, ngaean nae infanmalate?

⁹Ya ayo y plumanta y talanga, ada ti ujungog? ya ayo y fumatinas y atadog, ada ti ulie?

¹⁰Ya ayo y cumastiga y taotao sija ada ti ujanafanunas? ayoja y fumanagüe y taotao ni y tiningo?

¹¹Si Jeova jatungo y jinason y taotao, na sija puro jinaja.

¹²Dichoso y taotao ni y unnaregla güe, O Jeova, yan ufanagüe güe ni y tinagomo;

¹³Sa jago siña numae gui descanso guinin y jaanin y chinatsaga, asta qui y joyo maguadog para y manaelaye.

¹⁴Sa si Jeova ti janasuja y taotaoña, ni ti udingo y erensiaña.