Y Salmo Sija 72:3-13

³Ya y beca sija chumule y pas gui taotao yan y mandiquique na ogso sija pot y tininas.

⁴Güiya ufanjusga y mamoble na taotao, güiya ufañatba y famaguon y mannesesitao, yan ufanyinamag y manmachaleg.

⁵Sija ufanmaañao ni jago mientras gagaegue y atdao, yan y pilan gui todo y generasion yan y generasion.

⁶Güiya tumunog papa taegüije y ichan gui jilo y manmautot na chaguan: taegüije minatmon janom ni y nafotgon y tano.

⁷Ya y jaaniña sija, mumamta y tininas; ya y pas sumenmegae asta qui jocog y pilan.

⁸Güiya uguaja minagasña locue guinin y tase asta y tase, yan guinin y sadog asta y uttimon y tano.

⁹Ya ayo y mañasaga gui desierto, manecon gui menaña; ya y enimiguña sija mamanjojoflag gui eda.

¹⁰Y ray sija guiya Tarsis yan isla sija ufanmañuñule ninae: yan y ray sija guiya Sabá yan iya Seba ufanmannae ninae.

¹¹Magajet, y ray todos ujatomba sija gui menaña: yan y nasion todos usinetbe güe.

¹²Sa güiya unalibre y nesesitao an jumagang; yan ayo locue y peble an ni y taya uinayuda.

¹³Güiya unafanmañotbla y mamoble yan y mannesesitao yan ujasatba y anten y mannesesitao.