Y Salmo Sija 35:2-17

²Mantiene y patang yan guinegüe, ya tojgue para unayudayo.

³Ya chule y lansa ya patang y chalan contra ayo y pumetsisigueyo: alog ni antijo: Guajo y satbasionmo.

⁴Polo ya ufanmamajlao, ya ufanquinenfunde y umaliligao y antijo: polo ya ufanalo tate ya ufanmamajlao y jumajaso y taelayejo.

⁵Polo sija ya calang y paja gui menan y manglo: ya y angjet Jeova ufanchineneg sija.

⁶Polo y chalanñija ya jomjom yan palagse: ya y angjet Jeova ufanpinetsigue sija.

⁷Sa sin causa manatog para guajo y lagua gui joyo: ya sin causa manmanguadog joyo para y antijo.

⁸Polo ya ufato guiya güiya ya yinilang ni ti jatungo: polo ya y lagua ni janaaatog, ucone maesagüe: yan y jalom yinilang nae upodong güe.

⁹Ya umagof y antijo gui as Jeova: ya umagof gui satbasionña.

¹⁰Todo y telangjo y ilegñija: Jeova, jaye parejumo? ni unalibre y mamoble gui mas manmetgot qui güiya: magajet na y mamoble yan y mannesesitao, guinin y jachulelejguan?

¹¹Mangajulo testigon mandague: ya jafaesenyo ni y ti jutungo.

¹²Manaeyo ni taelaye pot y mauleg, ya manataelaye y antijo.

¹³Lao guajo anae manmalango sija, magagojo y luto: junatriste y antijo yan umayunat: y tinaetaejo tumalo jalom gui pechoco.

¹⁴Mamomocat yo ya ileleco: Güiya buente y gachongjo, pat y chelujo: ya tumecon yo triste calang uno ni y umuugung pot si nanaña.

¹⁵Lao anae desgrasiaoyo, sija manmagof ya mandaña: ya y gosnamaase mandaña contra guajo ya guajo ti jutungo: sija matitegyo ya ti manbasta.

¹⁶Parejo yan y áplacha na minefea gui fandango, janachéchegcheg y nifenñija guiya guajo.

¹⁷Jeova, asta ngaean nae unatan? nalibre y antijo gui yinilangña, yan y beya y corasonjo gui león.