Y Salmo Sija 33:1-18

¹FANMAGOF gui as Jeova jamyo manunas: sa y manunas bonito na alabansa.

²Fanmannae grasias indandane si Jeova ni atpa: cantaye güe ni alabansa nu y guitala ni y gaecuetdas dies.

³Cantaye güe ni y nuebo na canta: dandan mauleg ni y agang.

⁴Sa y fino Jeova tunas: ya todo y chechoña esta mafatinas ni y minagajet.

⁵Güiya yaña y tininas yan y juisio; ya cariño na güinaeya gui as Jeova, bula y tano.

⁶Pot y fino Jeova esta mafatinas y langetsija: ya pot y jajaja ni y pachotña, todo y inetnonñija.

⁷Güiya munadaña gui un monton y janom gui tase: güiya pumolo gui atmasén y tinadongsija.

⁸Manmaañao as Jeova todo y tano: manmaañao nu güiya todo mañasaga gui tano.

⁹Sa güiya umalog ya jumuyong: güiya manago ya sumaga fitme.

¹⁰Si Jeova munataesetbe y pinagat y nasion; ya güiya munataebale y jinaso y taotao.

¹¹Y pinagat Jeova sumaga para taejinecog: y jinason y corasonña para todo y generasion.

¹²Dichoso y nasion ni si Jeova Yuusña: yan y taotao ni y jaayeg pot erensia para güiya.

¹³Desde y langet jaatan si Jeova: jalilie todos y famaguon Adam.

¹⁴Desde y sagaña na lugat jaatan; jaatitutuye todo y mañasaga gui jilo y tano.

¹⁵Güiya fumatinas y corasonñija todos: yan jaatitutuye todo y chechoñija.

¹⁶Y ray ti umalibre pot y dangculon inetnon sendaloña: y matatnga na taotao ti umasatba pot y dangculon minetgotña.

¹⁷Y cabayo taebale para useguro: sa güiya ti unalibre ni uno nu y dangculon jinilatña.

¹⁸Estagüeja, y atadog Jeova gui jilo y manmaañagüe güe: gui jiloñija y numanangga y minaaseña.