Y Salmo Sija 135:6-19

⁶Jafaja y malagoña si Jeova, esteja jafatinas, gui langet yan y tano, yan y tase, yan todo y manadong na lugat.

⁷Janafangajujulo y asgon sija guinin y uttimon y tano; janalalamlam para uuchan; janachinile y manglo gui güinajaña.

⁸Ni y janalamen y finenana na finañago guiya Egipto, todo y taotao yan y gâgâ.

⁹Ya manago señat sija yan mannamanman gui talo guiya jago, O Egipto: gui as Faraon yan todo y tentagoña.

¹⁰Ya janalamen y mandangculo na nasion, yan japuno y manmatatñga na ray sija.

¹¹Si Sehón ray y Amorreo yan si Og ray Basán, yan todo y raeno sija guiya Cananea:

¹²Ya mannae para erensia ni y tanoñija: para erensian y taotao na guiya Israel.

¹³Y naanmo O Jeova, gagaegue para taejinecog; y majasomo, O Jeova, para todo y generasion sija.

¹⁴Sa si Jeova ujusga y taotaoña, ya ugaease ni y tentagoña sija.

¹⁵Y idolos y nasion sija, salape yan oro, y checho y canae y taotao sija.

¹⁶Guaja pachotñija, lao ti manguecuentos: guaja atadogñija, lao ti manmanlilie;

¹⁷Guaja talangañija; lao ti manmanjujungog; ni uguaja jinagong gui pachotñija.

¹⁸Ayo sija y fumatinas estesija ujafanparejoja yan sija: magajet na cada uno ni y umangoco sija ni ayosija.

¹⁹O guma Israel, bendise si Jeova: O guma Aaron, bendise si Jeova.