Yɛbəc 19:19-33

¹⁹Kɔ afum akɔ ŋanayɔnɛ dure mɔ, ŋaŋc-kɛrɛ səbuk səŋan sa dure kɔ ŋaŋcɔf si fɔr ya afum fəp kiriŋ. Kəway ka səbuk sasɔkɔ kənabəp mɛŋcəmbəl ma gbeti wul wəco kəcamət (50.000).

²⁰Ti disrɛ kətam ka toloku ta Wəbɛ kəsam kɔ kəsɔtɔ fənɔntər.

²¹Ntɛ teŋcepər mɔ kɔ Pol olompəsnɛ kəkɔ dare da Yerusalɛm pəc-cepərɛnɛ tɔf ya Masedon kɔ Akaya. K’oloku: «K’iŋkɔbɛrɛ Yerusalɛm-ɛ, mɛnɛ idekɔsɔ-mɔmən Rom.»

²²Kɔ Pol osom Masedon amar ɔn mɛrəŋ Timote kɔ Erasto, mba kɔ nkɔn Pol eyi mataka mɔlɔma atɔf ŋa Asi.

²³Tɛm tatɔkɔ tɔ pəyama-yama pɔpɔŋ pɛnayi Efesi teta dɔpɔ da kəlaŋ ka Wəbɛ Yesu.

²⁴Wəgbɛc wəlɔma ɛnayi di, pac-we kɔ Demeteri, pəc-tubucnɛ kəlompəs ka wɔlɔ wa tɛrəŋka mpɛ aŋc-we Artemi mɔ. Agbɛc a wɔlɔ wa gbeti wawɔkɔ ŋaŋc-sɔtɔnɛ wi daka dɛlarəm.

²⁵Kɔ Demeteri oloŋka agbɛc kɔ akɔ ŋaŋc-dinɛ yɛbəc yayɔkɔ mɔ, k’oloku ŋa: «Arkun! Nəŋcərɛ ti bel-bel a yɛbəc yayɛ y’ andinɛ.

²⁶Mba nənəŋk kɔ nəne a nnɔ Efesi kəbəp ka atɔf ŋa Asi Pol pampɛ ɛsɛp kəsɔŋɛ afum alarəm kəlaŋ haŋ pəc-kafəli ŋa mera kəloku a mɛrəŋka mmɛ waca wa fum wolompəs mɔ, bafɔ canu cɔ.

²⁷Moloku mamɔkɔ mɛntam kəsɔŋɛ yɛbəc yosu kəlɛcɛ. Tɔsɔŋɛ sɔ teta kəlɔ ka tɛrəŋka Artemi tɔyɔ sɔ abɔc. Afɔde sɔ pac-loku a Artemi tɛrəŋka a kanu kɔ, kanu kəran nkɛ afum fəp ŋaŋkor-koru nnɔ atɔf ŋa Asi, kɔ doru kɔr-kɔr mɔ.»

²⁸Ntɛ afum ŋane moloku mamɔkɔ mɔ, kɔ mɛtɛlɛ meŋcepərər ŋa, kɔ ŋayɛfɛ kəkulɛ-kulɛ: «Artemi kanu ka Efesi kəyɔnɛ kəpɔŋ!»

²⁹Kɔ pəyama-yama papɔkɔ posumpər dare fəp, kətəŋnɛ disrɛ kɔ afum ŋambəpsɛnɛ abaŋka ŋaŋan ŋɔpɔŋ. Kɔ ŋaliŋəs asol a Pol Kayus kɔ Aristarko, aŋɛ ŋanayɛfɛ Masedon mɔ, kɔ ŋaŋkekərɛ.

³⁰Pol ɛnafaŋ kəkɔ-mentərnɛ afum fɔr kiriŋ, mba acɛpsɛ a Wəbɛ darəŋ ŋanawosɛnɛ fɛ kɔ ti.

³¹Abɛ alɔma a atɔf ŋa Asi, aŋɛ ŋanayɔnɛ anapa a Pol mɔ, ŋanasom afum nnɔ eyi mɔ ŋac-lɛtsɛnɛ kɔ a ta pəkɔ dəndo abaŋka ŋaŋan ŋɔpɔŋ de!

³²Kɔ pəyama-yama poŋcop afum dacɔ, aŋɛ ŋac-kul-kulɛnɛ ntɛ, akɔ ŋac-kul-kulɛnɛ tɔkɔ. Afum alarəm ŋa dacɔ ŋanacərɛ fɛ ntɛ o ntɛ anabəpsɛnɛnɛ mɔ.

³³Kənay kaŋkɔ dacɔ kɔ afum alɔma ŋalɔmər Alɛksandər, nwɛ aSuyif alɔma ŋanacɔŋəs kəkɔ-lok-loku fɔr ya afum kiriŋ mɔ. Kɔ Alɛksandər ɛfɛk kəca, pəfaŋ kəlok-loku pəyacnɛ.