Wane Ni Kwairiinga 2:3-34

³Ma gila ka agasia nga 'ola 'ilaka'u nga uunu sisika, ma ni 'ola lo'oori gila tagala'i ma ka to'oru 'i gouna ta'a lo'oo te'efou na'a gila ogu 'i no'ona.

⁴Ma nga Anoe 'ola Abu ka fa'afonguga te'efou, ma gila ka eta no'o fana alafuunga 'ania nga alafuunga na ta'a matari, 'ilaka'u Anoe 'ola Abu 'e fa'afataga 'ania.

⁵Na alata no'ona, nga ta'a 'i Jiu na'a gila fo'asia God, gila nana'i la'u mola 'i Jerusalem. Gila leka mai fa'asia ni maa'e fanua kwaitatari'a fofona fanua lo'oo 'i wado.

⁶Ma alata gila longoa nga lakotenga lo'oori, ta'a 'e aula gila ka ogufiga. Ma gila ka 'alefo ba'ita, suria ta'a lo'oo na gila tagoto'o, gila alafuu 'ania ni maa'e alafuunga na ta'a kwaitatari te'efou.

⁷Ma suria gila 'alefo ba'ita, gila bi'i fata 'i lo'oo faga 'i talaga, “Ni wane lo'oo gila fafata 'i lo'oo, gila ta'a 'i Galili te'efou lo'oo mola.

⁸Fe'ua na'a meru longoa gila fata 'ania alafuunga ameeru?

⁹Du'ana 'i 'imeeru meru leka mai fa'asia fanua 'i Partia, ma 'i Media, ma 'i Elam, ma 'i Mesopotemia, ma 'i Judea, ma 'i Kapadosia, ma 'i Pontus, ma 'i Eisia,

¹⁰ma fa'asia 'i Frijia, ma 'i Pamfilia, ma 'i Ijip, ma fa'asia fanua 'i Libia galangia 'i Saerin, ma tani ta'a ngaa'i meru leka mai fa'asia 'i Rom,

¹¹ma 'i Krit, ma 'i Arabia. Aia, ma tani ai ameeru gila ta'a 'i Jiu, ma tani ai ameeru la'u gila bi'i lado mola mai fe'enia Jiu 'i buri. Tafe'ua, ma goru longoa na'a ta'a lo'oo gila fata suria ni 'ola ni 'alefosilai na'a God ngaia 'e launge'enia, ma goru ka longo su'aai alafuulaga lo'oo na'a alafuunga 'inato'o adauru!”

¹²Gila 'alefo ba'ita, ma gila bobolosia no'o 'olataa ne'e lau ma gila agasia. Ma gila bi'i orisiga 'i talaga kwairiu ma gila ka 'i lo'oo, “'Olataa lo'oo 'e lau fu'uwane?”

¹³Tafe'ua tani wane ngaa'i gila doo 'aniga ma gila ka 'ilo'oo, “Bala ta'a lo'oo gila go'ufia nga waeni ta'ua lo'oo, ma gouga ka kuta.”

¹⁴La Pita 'e ula fe'enia akwale'e wane ma te'e ai ni Kwairiinga lo'oori, ma ka alafuu ba'iba'ita fana oguogunga lo'oori maka 'ilo'oo, “Mooru ni wane goru futa 'i Jiu, ma 'amooru ta'a te'efou na'a moru to'oru 'i Jerusalem, moru longo madi mai fagu, 'inau 'aku kwairii suria 'ola lo'oo.

¹⁵Nga ta'a lo'oo gila 'ame kuta la'u tofuna gila go'ufia waeni lo'oo, 'ilaka'u na'a moru manata to'ona, tofuna ngaia bi'i nigi mola na mule na mae'ola 'usugani.

¹⁶Nga alafuunga la Joel nga profet ngaia 'e giria laka'u ngaia 'e 'ilo'oo,

¹⁷‘God 'e alafuu 'i lo'oo, Na gani 'i'isi, nau taku kwatea nga Anoe 'ola Abu agu fana ta'a agu te'efou. Ma ni wela amooru, tagila kwairii 'ania fatalagu. Ma ni alakwa amooru tagila agasia nga faata'inga, ma ni wane koko'o 'amooru tagila agasia 'ola 'ania malebolenga aaga.

¹⁸Gwa'a fana ni wane ma ni geni ni taunga'inga tago na'a gila fito'o, nau taku kwatea la'u mola nga Anoe 'ola Abu faga fana 'agila kwairii 'ania fatalagu.

¹⁹Mai nau taku agea ni 'ola ni 'alefosilai 'ubulana lalo 'i langi, mai nau taku agea ni 'ola ni 'alefosilai fofona fanua lo'oo 'i wado. 'Ubulana fanua lo'oo 'i wado nga ta'a tagila agasia nga 'abu na wane 'e mae, ma nga eele, ma nga gwasusu.

²⁰Ma 'ubulana lalo nga ta'a tagila agasia nga sina te'e logo, ma nga singari te'e meku 'ilaka'u nga 'abu. Sui ma nga gani ba'ita lo'oori 'e bi'i nigi mai, na'a God te'e eefasia nga ta'a lo'oo te'efou.

²¹Ni dai na ngaia 'e kwaisoe fana kwaibooninga na Alafa, Alafa te'e fa'amooria.’”

²²Ma la Pita ka fata la'u 'i lo'oo, “Mooru ta'a 'i Israel, moru gwaalongoa fana alafuunga lo'oo suria la Jisas wane fa'asia 'i Nasaret! God 'e faate'enia famooru na'a ngaia 'e alea mai tofuna ni 'ola ni 'alefosilai, ma ni 'ola 'e tegela'a ngaia 'e agea. Moru su'a te'efou no'o na ni 'ola lo'oo ne'e lau 'i laloamooru.

²³Aia, ma God ka su'ana, ma ngaia ka fadaa no'o fana 'agila kwatea la Jisas famooru, 'amoru kwa'ia, ma moru ka alamia fana ta'a gila 'ame Jiu, 'agila mudu'ia na 'ai folo.

²⁴Tafe'ua ma God 'e tata'ea la'u fa'asia nga maenga, ma ka rubea fa'asia nga nonifiinga na maenga, suria ngaia 'e 'ato fana nga maenga 'ani dau fafia la Jisas.

²⁵Mai na'o la Defete laka'u 'e giri suria nga 'ola na'a Kraes 'e iiria, ‘Nau ku agasia God ngaia 'i na'ogu furifuri, mai nau ku sia ma'u mola, suria ngaia 'e nana'i fe'eninau.

²⁶Ma tofuna 'ola lo'oo, nau ku aile'a ba'ita, ma nga fatalagu ka fongu 'ania aile'anga. Nau 'akui fito'o, na'a God te'e tata'e nau la'u mola,

²⁷tofuna God, ngaia 'e 'ato fana 'i'oo 'ani rugasi nau fana nga maenga, mai 'i'oo sia alami nau mola, nga wane ni taunga'inga abu amu 'aku si'ini 'ubulana giru gwa'u.

²⁸Moko faate'enia fagu na'a nau taku moori la'u mola. Ma tofuna 'i'oo to'oru fe'eni nau, 'i'oo to'o fa'afongu nau 'ania aile'anga.’”

²⁹Ma la Pita ngaia ka alafuu la'u maka 'i lo'oo, “Wane goru futa, ngaia 'e le'a fana 'aku alafuu wataga famooru suria nga wawarifu dauru la Defete nga kiingi. Ngaia 'e mae, ma gila ka kwaiatoa no'o. Ma nga giru gwa'u aana 'e nana'i galangia dauru mola tala'ina lo'oo.

³⁰Ngaia na'a la Defete 'ame alafuu la'u suria ngaia 'i talana alata ngaia 'e giria 'ola laka'u. Ngaia nga profet, ma ngaia 'e su'a mola na nga fataarunga'inga ala God fana. God 'e fataarunga'i fana ngaia te'e arua nga wane na fufutanga ala Defete ngaia te'e kiingi.

³¹La Defete ka aga su'a no'o ai, 'olataa na'a God te'e agea, ma la Defete ka alafuu suria nga tata'enga ala Kraes fa'asia nga maenga, ma God 'ame rugasia 'ubulana lefu na maenga, ma nga nonina 'e sia si'ini mola.

³²La Jisas laka'u, God 'e tata'ea fa'asia nga maenga, ma meeru te'efou meru agasia.

³³God ngaia 'e fa'aba'ita la Jisas fana ngaia 'ani ba'ita fe'enia, ma God ka kwatea nga Anoe 'ola Abu fana, 'ilaka'u ngaia 'e fataarunga'i 'ania. Aia, ma nga 'ola lo'oo moru agasia, ma moru ka longoa tala'ina, ngaia na Anoe 'ola Abu na'a la Jisas 'e kwatea mai fameeru.

³⁴La Defete 'ame fane no'o fani Langi. Ngaia na'a, ngaia 'ame fata suria ngaia 'i talana alata ngaia 'e alafuu mola 'i lo'oo, ‘God ngaia 'e fata 'i lo'oo fana Alafa agu: “'Oi nana'i gula le'a agu, moko ba'ita fe'eni nau,