Viaqa 2:3-34

³ʼInega taha yani iʼitea ana ʼita ʼidewani ʼaiwe meana ʼifoqe webui mai tomotau ʼaidega ʼaidega debadia.

⁴ʼInega Niboana Gwalagwalana luveagatunaʼidi ta mali vona be mali vona ʼidiega iveʼale ivonavona Niboana ena venuahaʼu ʼinega. Ta vona diavona lova ge ida alamanidi ʼidiega iveveqae.

⁵Ta tuta baʼe ʼinaya Yaubada ana toʼamayabayavo taudi me Diu mali diʼwe be mali diʼwe ʼidiega imai Ielusalema ʼinaya itoatoa.

⁶Tutana wedilia butuna tomotau inoqolia ʼinega qabudi ivevivihila itauya tovetumaqanayavo ʼidia. Ta ʼaidega ʼaidega bonadi inoqolia ʼinega nuadi voqana qiduana,

⁷ta ivonaya, “Taudi toveqae diavona qabudi me Galili, waisa?

⁸Ta maʼoda ʼinega itaʼa qabuda bonadega iveveqae?

⁹Mana vaina itaʼa me Falitia be, me Midia be, me Elama be, me Mesofotemia be, me Iudia be, me Kafadosia be, me Fonito be, me Eisia be,

¹⁰me Filigia be, me Famifila be, me Itifita be, me Libia ʼabaga Sailini diʼwenaya, ta wese vaina Loma ʼinega kamai. Ta vaina itaʼa me Diu ta wese vaina ge me Diu, ta eda tafwalolo ʼinaya iawafeledi ʼinega ive-Diu.

¹¹Ta wese vaina itaʼa Kilitiega be Aleibiayega. Qabuda kamai diʼwe ʼaidega ʼaidega ʼidiega, ta qabuda tauda bonadega edi vona Yaubada ena fewa waiwaidi weaqina kanoqonoqolia!”

¹²Ta edi nuavoqana ʼinega taudimo iveveqae ivonaya, “Maʼoda iʼaiqa? Tolaʼai ana alamani?”

¹³Ta vaina tomotau tovetumaqanayavo igivenuʼwedi ivonaya, “Nage goʼila waiwaina inuma ʼinega ivekwavakwava.”

¹⁴Ta Fita enavo leveni dina maega itovolo ta bonana qiduanega qabu vonedi vonaya, “Egwavo me Diu ta wese omiʼa Ielusalema gamonaya otoatoa, ʼelovemi! Ta yani baʼe niʼa ʼifoqe matamia ena givesimatalia ʼimia, ʼinega egu vona ona noqolia.

¹⁵Emi nuanua ʼinega ovonaya be imaʼa goʼila waiwaina ada numa ta ada vekwavakwava. Ta gebuʼe, mana baʼe nawale ʼawaʼawai. Ta eda ilivu niʼa oalamania, ge ʼawaʼawai ʼinaya kada numanuma.

¹⁶Vonahaqiaqi, lova Yaubada ena tovesimasimana Ioeli ʼinega vona fofofola tolaʼai niʼa oʼitea ʼimaya weaqina, vonaya,

¹⁷‘Yaubada vonaya, Tuta ʼebeluʼovoa ʼinaya Niboanigu ena guiwaqia tomotau qabudi ʼidia. ʼInega natumiavo meʼolotodi wese mevavinedi egu vona ina simana ʼifoqeyedi. Ta emi kilakai tolaʼai nawale naʼifoqe ena veʼitedi ta ina ʼitea, ta emi ʼoloto kofekofedi veʼwayoqega ina veʼwayoqa.

¹⁸Tuta omoʼe ʼinaya egu tofewayavo meʼolotodi wese mevavinedi Niboanigu ena neidi ta weaqigu ina maduvona fofofola tomotau ʼidia.

¹⁹Ta egu fewa waiwaidi mahalaya ta wese bwaʼobwaʼoya tomotau ena veʼitedi ʼebenuavoqana ʼinega, ʼidewana sulala be ʼaiwe ʼalaʼalata ta wese ʼau qiduana.

²⁰ʼInega babaʼau navelovanea, ta wese waiʼena nalusulalia. Ta ʼinega Kaiwabu ena ʼaubena qiduana ta simatalina naʼifoqe.

²¹Ta ʼeguma taha toga Kaiwabu ana wawega nanoqi iula weaqina e ʼetoyavua vataya nalobea.’”

²²Ta wese Fita vonedi vonaya, “Omiʼa me Isileli, egu vona baʼe ona noqolia Ieisu Nasaleta ʼolotona weaqina. Niʼa oalamania Yaubada ena fewa waiwaina Ieisu ʼinega veʼitemi ʼidewana ʼebenuavoqana be ʼebenuaʼewa ta wese ʼebeʼita qabudi ʼidiega.

²³Lova Yaubada Ieisu nimamia aʼuya. Ta omiʼa tokwava maega Ieisu otutuveʼewea ʼetoluai ʼinaya ta oluveʼaligia. Ta yani baʼena Yaubada ena nuanua ʼinega niʼa madualamania.

²⁴Ta Yaubada Ieisu ʼaligega giveyaʼitoto ʼeviviea, ta ʼaliga ena visiqa ʼinega ʼetoyavuia. ʼInega ʼaliga nana ge ana fata Ieisu dakafia ta daʼeno vataya.

²⁵Lova Deibida madusimana ʼifoqe Ieisu weaqina vonaya, ‘Kaiwabu tuta qabuna yaʼitea diʼweguya toatoa ta givewaiwaiegu, ʼinega ge ana fata be ena mwaniniva.

²⁶ʼInega yaqaiawa qiduana ta yahawatuboya mana ʼwafigu nawale nayaʼitoto ʼevivi ʼaligega,

²⁷mana ge una nogegu be tuta kuena toʼaliga edi ʼebetoa ʼinaya ena toa, ta wese yaʼa Gwalagwalagu ge ʼwafigu una awafelei be nadavula.

²⁸Ta yawai vataya ana ʼeda niʼa uveʼitegu, ʼinega nawale qaiawa qiduana ena lobea matauya.’”

²⁹Ta Fita wese vonaya, “Taigwavo, yavona aqiaqi ʼimia, vona baʼe gebu tubuda Deibida weaqina, mana Deibida nana kahalamania lova ʼaliga ta itavunia. Ta guduma nana baʼe ʼitaga kaʼiteʼitea.

³⁰Deibida Yaubada ena vona niʼa alamani aqiaqiea mana tauna taha tovesimasimana. Lova Yaubada ena vona fofofola ʼinaya ʼawatamatamana nawale ena gadeyega taha Kini natovolo ta ena ʼebetoa kaikaiwabuna ʼinaya natoabui.

³¹Deibida niʼa alamania baʼe yani nana nawale naʼifoqe, ʼinega vonaya, ‘Yaubada gebu nanogei toʼaliga edi ʼebetoa ʼinaya be wese ʼwafina gebu naʼuluma.’ Ta Deibida ena vona baʼe Keliso ena yaʼitoto ʼevivi ʼaligega weaqina.

³²ʼInega Yaubada Ieisu giveyaʼitoto ʼeviviea ʼaligega, ta imaʼa qabuma niʼa aʼitea ta asimanea.

³³ʼInega Yaubada ena waiwaiega givaneqea mahalaya ta baʼitagana ʼataqinaya toatoa. Ta Tamana lova vona fofofolayea Niboana Gwalagwalana namai ena tomotauyavo ʼidia, ta baʼitagana niʼa guiwaqia ʼimaya. Baʼe vona fofofola nana ana aqiaqi niʼa oʼiteʼitea ta wese onoqonoqolia ʼimega.

³⁴Mana Deibida gebu tauna ena vane mahalaya weaqina davona, ta ʼesi Ieisu weaqina simana vonaya, ‘Yaubada niʼa vona egu Kaiwabu ʼinaya, ʼAtaqiguya una toabui