36“Iit tawatag: Sawa to kinik David ineep izi taan, ye imbesmbees pa Maaron itaghon Maaron ŋgar toni. Ve sawa to imaat, titavia toman nditimbu, ve paatu imbuuz ila naal lolo.
37Eemoghon ŋgeu to Maaron ipamundigini pa mateeŋ ne, paatu imbuuz maau.
38“Tovenen yam toŋvetaz, alooŋ! Yei nivotia saveeŋ payam leso awatag kat tovene: Tutuuŋ to Mose, nene irau igham mulin ghiit kat pa pataŋani to sosor toit ne maau. Eemoghon ila Yesu uraat toni, Maaron ireu sosor toit kat. Tamtoghon tisob to tighur ila to Yesu, ye pale ipas di tivot pa samia tapiri, ve ireu sosor todi isob ilale, leso tineep deŋiadi ila Maaron mata.
40“Tovenen yam apatum gham. Pa vene, mbeb to yes propeta tisavia ne ivot payam. Saveeŋa ineep tovene: