1Bandi ya evyo, niwawona malaika wane wemire mmoja-mmoja membe zonne za duniya‑yi. Waziwiya mepo zonne za duniya‑yi, zisivunge nrima wala mbahari wala mmuti mmojawapo.
2Nimmona laika mwengine tena, akilawirira upande wa malawira-juwa, ákiwa nawo selu ya Nlungu hai. Iye kawakuwira na shauti ulu pakulu malaika wane ware wawagabizire uwezo wa kwaribu duniya‑yi pamoja na bahari, akiwambira javi:
3“Musaribu nrima wala bahari wala miti, satinawataya selu pacenye pawo watumisi wa Mwenyezimungu.”
4Nambiriwa isabu ya wanu wataiwe selu‑wo, wákiwa alufu miya na arubaini na nne, wa piya marikolo a waIziraeli:
5wataiwa selu wanu alufu kumi na mbiri wa rikolo ra Yuda, alufu kumi na mbiri wa rikolo ra Rubeni, alufu kumi na mbiri wa rikolo ra Gadi,
6alufu kumi na mbiri wa rikolo ra Aseri, alufu kumi na mbiri wa rikolo ra Naftali, alufu kumi na mbiri wa rikolo ra Manase,
7alufu kumi na mbiri wa rikolo ra Simiyoni, alufu kumi na mbiri wa rikolo ra Lawi, alufu kumi na mbiri wa rikolo ra Isakari,
8alufu kumi na mbiri wa rikolo ra Zabuloni, alufu kumi na mbiri wa rikolo ra Yusufu, na alufu kumi na mbiri wa rikolo ra Benjami.
9Bandi ya evyo, niwona junudi ya wanu iliki nzima, wanu wengi sawawalangika. Wákiwa wa piya mataifa‑ya, marikolo, kabila na luga, wemira mbere ya kiti na mbere ya Kondoo. Wavala mavazi melupa vu, wasukula makuti mmakono,
10wakinyangula pakulu-pakulu, wakamba: “Kuvushiwa kulawa ka Nlungu wetu, ekare pakiti cake, na kulawa ka Kondoo!”
11Malaika piya wemira wazunguriza kiti cire, wazee, pamoja na viyumbe hai wane ware. Wasujudi mbere ya kiti cire kuno wakintukuza Mwenyezimungu,
12wakamba: “Aamina! Swifa, utukufu, fahamu, shukurani, inshima, uwezo, na nguvu, mwanyewe ndi Nlungu wetu, daima milele. Aamina!”
13Nzee mmoja akinidairi javi: “Wanu wavarire mavazi melupa‑wa wanani? Wankulawa ndepi?”
14Nikinjibu: “Mwenye wangu, uwe ndi wijiwa!” Basi iye akinambira: “Ndi ware iwapitire hali ya kulumbatiwa pakulu ware. Ewo wafula nguwo zawo, walangaza, julu ya damu ya Kondoo.
15Ndimana wawa mbere ya kiti ca Mwenyezimungu, na wankuntumika mahala pake takatifu usiku na nsana. Na ire ekare pakiti akuwa pamoja nawo awakengera.
16Aiwakola njala tena wala aiwakola nyotwa tena. Ariwoca juwa anta suku mmoja, wala awavujuka,
17konta Kondoo ari mbere ya kiti‑yo akuja kuwa Nsunga wawo. Iye awalongoza kumiviriro ya maji a uhai. Na Mwenyezimungu awafuta mmaso mwawo masozi piya.”
