Tjakultjurinkunytja 19:26-31

²⁶Yaṉangu ngaa ngurrara tjuṯa tjananya Puulalu marrkuṉangi, Tayananya wiya waḻkuntjaku. Paluru manta Yayitjanya ngurrara kutjupa tjuṯaṯarra tjananya marrkuṉangi. Yalatji paluru tjananya marrkuṉangi, ‘Marangku tjiilpatjanu palyaṉutjakunyu wiya waḻkuntjaku, Katutjanya kutju waḻkura nyinanytjaku.’ Yaṉangu tjuṯalingkungku wangka palumpa kulira Tayananya wiya waḻkuṉi. Nganaṉa tjiilpatjanu palyaṉutja tjinguru tjana wantiku, payimilantjawiyangku.

²⁷Yaṉangu tjuṯangkuya tjiilpatjanu palyaṉutja tjuṯa payimilantjawiyangka, yaalytjirrikula?, waarrkalampa wiyarringanyingka. Yuwankarrangkuya Yayitjanya ngurrara tjuṯangku Tayananya waḻkura nyinapayi, manta kutjupa ngurrara tjuṯangkuṯarra. Kuwarri yaalytjinkula?, Tayananya tjana waḻkulwiyangku wantitjipingka, palumpa tjaatjiṯarra yuḻpurripayingka, yaṉangu tjuṯangkuya tjungurringkula waḻkura yaṉṯayaṉṯantjawiyangka.”

²⁸Wangka yalatji tjana kulira pikarringkula raapangku watjaṉu, kutu, “Tayananya mayutju tiṉa kutjulampa nyinanyi, Yipitjanya ngurrara tjuṯaku.”

²⁹Palulanguruya yaṉangu kutjupa tjuṯangku kulira tjanala tjungurringu. Tjuṯalingkuya tjungurringkula Yiitjuku walytja tjuṯaku pikarringu. Paluru tjana wala yankula wati Kiyatjanya, wati Yaritjakatjanyaṯarra witiṉu, Puulaku puṯu ngurrira. Paluru kutjarra Puulaku walytja, tjungupula yankupayi Puulalawana. Paluru kutjarrapula manta Matjatuniyanya ngurrara. Witira pulanya tjana parrpaṯu katingu puliinakutu. Puliina palula yaṉangu tjuṯa tjungurringkupayi miitingi wangkakitja.

³⁰Palunya kutjarra tjana puliina palula kanyintjala Puulalu kulira yunytjurringu yankula tjanala wangkanytjaku. Yiitjuku walytja tjuṯangku Puulanya marrkuṉu, “Nyuntu tjanala wiya yankula wangkanytjaku, wanti!”

³¹Mayutju tjuṯa Puulaku palya nyinapayi. Paluru tjana wati kutju wantirriyaṉu, Puulanya yalatji marrkuntjaku, “Puliina palulakutu wiya nyuntu yankula wangkanytjaku, pungkutjipingkantaya.”