Titò 3

1

2

3

¹Á ipanonò mu yawe gapay sù ira manguruk. Máwák nga tumulù ira sù ira mammaguray ánna yù ira makáwayyá ta gubermente, á kurugad da yù tunung da. Á máwák nga dán nga naparán ira nga mangabbák nira nu ajjan yù napiá nga ipakuá ra nira.

²Kagiam mu nira ta ari ira mallillíbâ. Ari ira maddaráma, ngam mepasingan ta masippà ira nga minángngikállà ta ngámin nga tatolay.

³Ta mássiki sittam ngámin, arát tam ngaw kánnámmuán yù ikáyâ ni Namarò, á ari ittam nanguruk. Pinotuát tam si Namarò, á nelogò ittam nga nepakkakáttuay kâ Namarò. Á kunnay ittam ta makiaripan sù narákè nga karagatán na baggi tam, ta narákè ánna jikkù yù ággangnguá tam ngaw ánna yù ipagayáyâ tam. Nangabubu ittam, ánna namassil ittam sù ira kábulut tam. Á nakkakáporay ittam gapay, ánna nakkakálussaw ittam.

⁴Ngam nakikanakanâ nittam si Namarò, á jinok na si Apu Kesu ta dabbuno, tapè ipakánnámmu na nittam yù pangayâ ni Namarò ánna pangikállà na nittam. Á iniyígù na ittam nga mangikatalà kuna.

⁵Á yá ipangiyígù na nittam, ari megapu sù napiá nga kingnguá tam, nu ari galâ megapu sù pangikállà na nittam. Á pinakarenuán na ittam nayù Mangilin nga Ikararuá, tapè mári yù liwiliwâ tam. Á iniyawâ na nittam yù bagu nga nonò tam, tapè makáwayyá ittam nga mamalurò sù napiá nga ipakuá na nittam.

⁶Ta iniyawâ na nittam ni Namarò yù Mangilin nga Ikararuá na, megapu kâ Apu Kesu Kiristu, nga mangiyígù nittam.

⁷Á yáyù nga mebiláng ittam ta matunung megapu sù allà na. Á pinataganatán na ittam ta ánâ na, á mesipà ittam kuna, ánna iniyawâ na nittam yù áttole tam, nga awán ta áddè na, nga iddanamát tam.

⁸Kuruk nga mekatalà yù kinagì. Á yáyù nga karagaták ku ta danniaw yù ituddum ta napiá sù ira nga manguruk kâ Namarò, tapè ipe ra yù urà da nga manángngák sù napiá nga akka-akkuád da. Ta mangáppípiá yù ira ngámin nga tatolay megapu sawe napiá nga metuddu.

⁹Ari ka laguk mepappupúlù sù ira makipappereperang ta ubobuk, ta awán ta serbi nayù pamereperang da ta meyannung sù ngágan nayù ira ngaw naggaká nira. Á ari ka dukkurukkì sù ira makiramá nga makipappereperang ta ubobuk nga meyannung sù tunung ni Moyses, ta awán ta tolay nga mábbágán megapu sù ituddu ra.

¹⁰Á nu ajjan yù tolay nga mamuruburion sù ira mangikatalà kâ Apu Kesu, á gammám mu. Á nu arán na ginnán yù kagiam mu, á pidduám mu nga gammán. Á nu arán na paga ginnán, á paguráyám mu laguk. Ari ka kuna dukkurukkikin.

¹¹Ta ammum gemma ta narákè yù nonò na, ta mepasingan megapu sù akka-akkuán na nga ammu na ta narákè.

¹²Á talákkurugak ku nga doban sangaw si Artemas onu si Tikiko ta umay ta giám mu. Á tappì na sangaw, alistuám mu nga umay manápun nikán ta Nikapulis, ta yá urè ta maggiánà bì tán ta áddè ta pappasá na ammián.

¹³Á ta áddè ta awayyám, abbágám mu di Senu nga abugádu ánna yù kabbulun na, si Apolo, tapè ajjan ngámin yù awágad da ta paggagannuâ da ta mánaw nga umay mangituddu.

¹⁴Á ituddum gapay sù ira kábulut tam yù napiá nga akkuád da. Máwák nga malláppà ira nga mattarabáku, tapè málâ da yù awágad da, ánna ajjan yù awayyá ra gapay nga mangabbák sù ira kuruk nga magáwák. Á nu kunnian yù akkuád da, napiá laguk yù pabbalinán nayù kaláppà da.

¹⁵Yù ira ngámin nga kábuluk ku saw, iyabbû da nu kunnasi kayu. Kagiam mu gapay yù pangiyabbû mi sù ira mangayâ nikami megapu sù pangikatalà tam kâ Apu. Á parè bì ta ikákkállà ni Namarò sikayu ngámin.