Tingtoeng 89:2-39

²Sitlohnah loh vaan a khoeng tih, a khuiah na uepomnah na soepboe te kumhal ah ka thui ni.

³Ka coelh taengah moi ka boh tih ka sal David taengah ka toemngam coeng.

⁴Na tiingan te kumhal duela ka thoh vetih na ngolkhoel te cadilcahma phoeikah cadilcahma ham ka hol pah ni. Selah

⁵Te dongah BOEIPA nang kah khobaerhambae te vaan rhoek loh, na uepomnah khaw a cim hlangping khuiah a uem uh.

⁶BOEIPA neh khomong dongah unim aka tluk tih vaan hlang khuiah BOEIPA te u long nim a puet?

⁷Pathen taengah tah, boeiping hlangcim kah baecenol nen khaw a sarhing pai. Te dongah a kaepvai boeih lakah a rhih om pai.

⁸Caempuei Pathen, BOEIPA namah bangla unim aka om?. BOEIPA tah tlung tih na kaepvai ah na uepomnah om.

⁹Tuitunli kah a hoemdamnah te aka taemrhai khaw namah ni. Tuilae a thoh vaengah amih te na domyok sak.

¹⁰Nang loh Rahab na ngawn bangla na bantha neh na phop tih na thunkha rhoek te na sarhi neh na yaal.

¹¹Vaan rhoek khaw nang kah, diklai khaw nang kah bal. Lunglai neh anih dongkah aka om boeih namah loh na suen.

¹²Tlangpuei neh bantang khaw namah loh na suen. Tabor neh Hermon loh na ming neh tamhoe rhoi.

¹³Na ban te thayung thamal sai tih na kut khaw tanglue. Te dongah na bantang kut tah a pomsang.

¹⁴Na ngolkhoel hmuen la duengnah neh tiktamnah om tih sitlohnah neh oltak loh na hmai ah n'doe.

¹⁵BOEIPA kah tamlung aka ming tih na mikhmuh kah vangnah khuiah aka pongpa pilnam tah a yoethen pai saeh.

¹⁶Na ming neh hnin takuem omngaih uh tih na duengnah neh pomsang uh.

¹⁷Amih kah boeimangnah sarhi la nang na om dongah na kolonah neh ka ki khaw na pomsang rhoela na pomsang coeng.

¹⁸BOEIPA tah mamih kah photling, Israel kah a cim, mamih kah manghai ni.

¹⁹Saivai atah, na hlangcim rhoek te mangthui neh na voek tih, “Pilnam khui lamkah ka coelh hlangrhalh taengah bomkung ka mop pah tih ka pomsang coeng.

²⁰Ka sal David te ka hmuh coeng tih kamah kah situi cim neh ka koelh coeng.

²¹Ka kut te anih taengah tawn uh tih ka ban loh nih a thoh ni.

²²Anih te thunkha loh phae pawt vetih dumlai ca long khaw phaep mahpawh loh.

²³Tedae a rhal te anih mikhmuh ah ka phop pah vetih a lunguet khaw ka vuek pah ni.

²⁴Te vaengah anih taengah kai kah uepomnah neh sitlohnah om vetih ka ming neh a ki khaw pomsang uh ni.

²⁵A kut te tuitunli soah, a bantang kut te tuiva rhoek soah ka khueh pah ni.

²⁶Anih loh kai te, “Nang tah ka napa, ka Pathen neh kai ham khangnah lungpang,” n'khue ni.

²⁷Kai long khaw anih te caming omthang neh diklai manghai rhoek kah a sangkoek la ka khueh ni.

²⁸Kamah kah sitlohnah te anih ham kumhal duela ka ngaithuen rhoe ka ngaithuen pah vetih, ka paipi he anih taengah cak ni.

²⁹Te dongah a tiingan te a yoeyah la ka thoh pah vetih a ngolkhoel loh vaan khohnin bangla om ni.

³⁰A ca rhoek loh ka olkhueng he a hnoo uh tih ka tiktamnah dongah a pongpa uh pawt atah,

³¹ka khosing te a poeih uh tih ka olpaek te a ngaithuen uh pawt atah,

³²amih kah boekoek te mancai neh, amih thaesainah te khaw tlohthae neh ka cawh thil van ni.

³³Tedae ka sitlohnah he anih taeng lamloh ka phae pah pawt vetih ka uepomnah te rhi ka lat pah mahpawh.

³⁴Ka paipi he ka poeih pawt vetih ka hmui lamkah aka thoeng khaw ka thovael mahpawh.

³⁵Ka cimcaihnah neh vai ka toemngam tangtae te David taengah khaw ka laithae mahpawh.

³⁶Anih kah tiingan te kumhal duela om vetih a ngolkhoel loh kai hmaiah khomik bangla om ni.

³⁷Hla bangla kumhal ah cikngae vetih khomong soah uepom laipai la om ni,” na ti. Selah

³⁸Tedae na hlahpham tih na hnawt coeng dongah na koelh hlang te na poe.

³⁹Na salpa kah paipi te na hai tih a rhuisam khaw diklai neh na poeih pah.