Pisalem 89:2-39

²Au e iloo bolo do aloho la deai dono hagaodi ai, gei do manawa dahi le e hai hua beelaa, hagalee hulihuli loo e hai gadoo be di langi.

³Goe gu helekai, “Au guu hai dagu hagababa ang gi dagu dangada ne hilihili aga. Au ne hagababa ang gi dagu dangada hai hegau go David boloo,

⁴‘Tangada mai i lodo do madawaawa gaa hai di king i nia madagoaa huogodoo. Au ga madamada humalia do madawaawa king gi mau dangihi gaa hana hua beelaa.’”

⁵Meenei Dimaadua, digau o di langi e dadaahili i nia mee haga goboina ala e hai Kooe. Digau ala e dabu e daahili e haga hagaamu do manawa dahi.

⁶Meenei Dimaadua, ma deai tangada i di langi i nua e hai be Goe ai. Ma deai tangada di langi e tungaadahi adu gi di Goe ai.

⁷Tagabuulinga o digau ala e dabu le e mmaadagu i di Goe, digaula huogodoo e hagalaamua Goe.

⁸Meenei Yihowah go di God Koia e Aamua, ma deai tangada ono mogobuna be Goe ai. Meenei Dimaadua, ma Kooe hua dela e manawa dahi hua i nia mee huogodoo.

⁹Ma Kooe dela e dagi di moana maaloo, gei go Kooe dela e mee di hagakila nia beau llauehaa.

¹⁰Kooe dela ne haga magedaa di manu hagamadagudagu dangada go Rahab, ga daaligi a mee gii made. Ma Kooe dela ne haga magedaa o hagadaumee i oo mahi aamua.

¹¹Di langi i nua la di mee ni aau, mo henuailala labelaa. Ma Kooe dela ne hai henuailala mo ono haga honu huogodoo.

¹²Kooe dela ne hai bahi i ngeia mo bahi i ngaaga. Di Gonduu Tabor mo di Gonduu Hermon e dadaahili mo di tenetene adu gi di Goe.

¹³E damanaiee go o mogobuna, gei e aamua huoloo go oo mahi!

¹⁴Do henua e hagamau gi di tonu mo di hai hegau donu. Di aloho mo di manawa dahi e modongoohia aga i nia mee huogodoo ala guu lawa ai dau hai.

¹⁵E maluagina go nia daangada ala e daumaha adu gi di Goe gi nia daahili, ala e mouli i di maalama o do dumaalia!

¹⁶Digaula e tenetene mai loo luada gaa dae loo gi di boo i di gili do ingoo, ge e haga hagaamu do dumaalia damanaiee.

¹⁷Goe gu gaamai gi gimaadou di mogobuna damanaiee bolo gi aali i nia madagoaa huogodoo. Ma go do aloho dela ne hidi mai ai gimaadou ga aali.

¹⁸Meenei Dimaadua, ma Kooe dela ne dugu mai gi gimaadou di madau hagaloohi. Go Kooe dela go di God Dabu o Israel dela ne dugu mai gi gimaadou di madau king.

¹⁹I lodo hua di moe dela adu gi mua gei Goe gu helekai gi au gau hai hegau manawa dahi boloo, “Au gu hagamaamaa tangada dauwa e dau, gei Au gu hilihili aga dagu dangada i lodo nia daangada, gaa wanga gi mee dono lohongo king.

²⁰Au gu haga noho aga dagu dangada hai hegau go David belee hai di king i dagu hagatulu a mee gi di lolo dabuaahia.

²¹Ogu mahi ga madalia a mee i nia madagoaa huogodoo, gei ogu mogobuna ga hagamaaloo a mee.

²²Ono hagadaumee ga deemee loo di nadau hai baahi anga, gei digau huaidu ga deemee di aali i mee.

²³Au ga dagadagahi gi lala ono hagadaumee, gei e daaligi gi daha digau huogodoo ala e de hiihai gi mee.

²⁴Au e aloho i mee, gei e hagalaamua a mee, gei Au gaa hai a mee gi aali i ono hagadaumee i nia madagoaa huogodoo.

²⁵Au ga haga damanaiee dono henua, tugi i di Tai Mediterranean gaa tugi i di Monowai Euphrates.

²⁶Gei mee ga helekai mai gi di Au, ‘Kooe go dogu damana go dogu God. Kooe go dogu hagaloohi mo dogu hagamouli.’

²⁷Gei Au gaa dugu a mee bolo dagu dama madua, dela e aamua i nia king huogodoo.

²⁸Gei Au e dadaahi hua dagu hagababa dela ne hai gi mee i nia madagoaa huogodoo, di hagababa deenei e hana hua beelaa, deai dono hagaodi ai.

²⁹Tangada mai i dono madawaawa gaa hai di king i nia madagoaa huogodoo, dono henua le e noho hua beelaa i di waalooloo o di langi i nua.

³⁰“Gei maa dono madawaawa ga de hagalongo gi agu haganoho, gei hagalee daudali agu mee ala ne haga noho,

³¹gei maa digaula ga haga balumee hua agu helekai, ge hagalee hogi e haga kila aga agu haganoho,

³²malaa, gei Au ga hagaduadua digaula i nadau huaidu. Gei Au ga daaligi digaula i nadau ihala.

³³Gei Au hagalee modu dogu aloho i David, be e haga hala dagu hagababa dela ne hai gi mee.

³⁴Au hagalee e oho dagu hagababa dela ne hai ang gi mee, be e daa dahi mee i di hagababa dela ne hai ang gi mee.

³⁵“Au gu hagamodu hagadahi i dogu ingoo dabu boloo: Au hagalee loo e hai kai tilikai ang gi David.

³⁶Dono madawaawa e hana hua beelaa i nia madagoaa huogodoo, gei Au ga hagaloohi dono henua i di waalooloo o di maahina o di laa.

³⁷Dono lohongo king gaa noho mau hua beelaa be di malama, dela e gila mai hua beelaa i lala di langi.”

³⁸Meenei God, Goe e hagawelewele gi dau king dela ne hilihili aga, Goe guu hudu a mee gi daha, guu dugu gi daha mo Goe.

³⁹Goe gu oho dau hagababa dela ne hai ang gi dau dangada hai hegau, gei guu hudu gi lala dono hau king gi lodo di gelegele.