Tingtoeng 74:1-15

¹Asaph kah Hlohlai Pathen aw ba aih nim yoeyah la na hlahpham aih? Na thintoek loh na rhamtlim kah boiva taengah mawngmawng khuu.

²Hlamat kah na lai na hlangboel khaw, na rho la na tlan koca khaw, kho na sak thil Zion tlang te khaw poek lah.

³Hmuencim khuikah thunkha rhoek te yoeyah pocinah neh boeih talh ham na khokan te pomsang lah.

⁴Nang kah tingtunnah khui ah nang aka daengdaeh rhoek te kawk uh tih miknoek khaw amamih kah miknoek te a khueh uh.

⁵Thing ding ah a so la hai aka thueng bangla tueng.

⁶Tedae ah hai neh a thuk a thingthuk boeih khaw thilung neh nawn a phop uh.

⁷Na rhokso te hmai neh a hoeh uh tih na ming aka phuei tolhmuen te diklai duela a poeih uh.

⁸A lungbuei nen tah, “Rhenten m'phae coeng,” a ti uh tih, diklai ah Pathen kah tingtunnah boeih te a hoeh uh.

⁹Mamih kah miknoek khaw m'hmu uh pawh. Tonghma om voelpawt tih mamih khuiah aka ming thai he mevaeng hil nim a om pawt ve?

¹⁰Pathen loh me hil nim rhal loh a veet vetih thunkha loh na ming he a yoeyah la a tlaitlaek venim?

¹¹Balae tih na kut na yueh. Na rhang kah na oltlueh khui lamloh na bantang kut neh khap kanoek saw.

¹²Tedae Pathen he hlamat lamkah diklai tollung ah khangnah aka saii ka manghai pai ni.

¹³Namah loh tuitunli te na sarhi neh na kak sak tih tui tuihnam rhoek kah a lu te na phop pah.

¹⁴Nang loh Leviathan kah a lu te na neet tih kohong ham neh pilnam ham caak la na paek.

¹⁵Namah loh tuisih soklong khaw na hep tih tuiva puei khaw na haang sak.