Tinavete 26:5-32

⁵Ele ta gilana valeana mo koa rini si rau, ke be hiva tozia rini si boka mo, sapu arau si keke koari na Parese, sapu sa puku tie Ziu pu luli va minaki sari na tinaraena sa mami linotu.

⁶Meke sapu tava turu nia rau pa kenu mia gamu hie, si na koa gua sapu raṉea rau sa vina tatara sapu ele ponia Tamasa koari na tiatamamami pukerane.

⁷Asa tugo sa vina tatara sapu okoro vagia ri ka manege rua mami butubutu, sipu vahesia ri sa Tamasa boṉi na rane. Baṉara, koasa laena sa vina tatara tugo mo asa, si ta zutu nia rau hie koari na tie Ziu.

⁸Na vegua ke lopu boka va hinokaria tu gamu, sapu va toa pulei Tamasa saripu mate?

⁹Arau telequ ba ele balabala ia tugo, sapu kaqu taveti rau si soku ginugua, pude maqu qoraqorai gedi sari na tie pu va hinokaria se Zisu pa Nazareti, gua.

¹⁰Meke ele evaṉia tu rau sapu gua asa pa Zerusalema. Pa ṉiniraṉira tadi na ṉati hiama si vekoi rau pa vetu varipusi sari tie te Karisito, meke totoso tava mate si arini si somana va egoi tugo rau sa vina matedi rini.

¹¹Hoke komiti rau si arini koari na sinaqoqi, meke va kilasi rau si arini, pude luara pania sa dia vina hinokara. Pa qua tinaṉaziri, si hoke hata lululi rau sarini pu koadi koari na vasivasileana pa votiki popoa.

¹²Pa keke inene arini si la si rau pa Damasikasi pa vina malumu, na ṉiniraṉira, meke pa ginarunu tadi na ṉati hiama.

¹³Baṉara Aquripa, sipu korapa rane sa popoa, pa korapana sa qua inene la, si dogoria rau si keke kalalasa sapu ṉedala hola nia sa sa rimata, malara gore mae pa maṉauru si asa, meke gona mae pa vari likohaequ rau, meke koa rini pu lulidi koa rau.

¹⁴Hoqa beto pa pepeso si gami doduru, meke avosia rau si keke mamalaiṉi sapu zama mae koa rau pa zinama Hiburu, ‘Saula, Saula, na vegua ke ṉoṉovalau goi, meke hukatau goi si Rau. Va bakora pule nigo si goi, guana bulumakao pu zopu pulea sa kolu tanisa tie pu tagona sa,’ gua.

¹⁵Meke nanasa si rau, ‘Baṉara, esei si goi?’ Meke olaṉa sa Baṉara, ‘Arau Zisu tugo sapu korapa ṉoṉovalau goi.

¹⁶Ba tekulu, mamu turu. Vata dogoro si Rau koa goi, meke vizatigo Rau, pude na Qua nabulu si goi. La mamu tozia koari na tinoni sapu gua ele dogoro guni Nau goi kamahire, meke sapu gua kaqu va dogoro nigo Rau vugo repere.

¹⁷Kaqu va sare igo Rau si goi koari na mua tie Izireli, meke koari na tie Zenitailo vasina pu kaqu garunu la nigo Rau.

¹⁸Kaqu tukeli goi sari na matadi, pude di luaria sa hinuporo, madi mae pa kalalasa; meke pude di luaria sa ṉiniraṉira te Setani, madi mae koe Tamasa; pude madi taleosae koari na dia sinea, meke la somanae koa rini pu tava toṉoto sa dia tinoa, pa dia rinaṉeraṉe koa Rau,’ gua si Asa.

¹⁹Kei baṉara Aquripa, gua asa ke lopu boka va karia rau sa dinogodogorae maena pa Maṉauru.

²⁰Ba podalae tarae mo si rau pa Damasikasi, meke tiqe pa Zerusalema pule, meke tiqe la koari doduruna sa popoa Ziudia, meke gua tugo koari na tie Zenitailo, pude doduru tie si madi luara pani sari na dia sinea, meke kekere mae koe Tamasa. Madi evaṉi sari na tinavete pu va sosodei sari dia kinekere.

²¹Pa ginugua gua asa meke vagi taloa nau rina tie Ziu si rau pa korapa Zelepade, meke hiva va mate au rini.

²²Ba ele va sare au Tamasa si rau, osolae kamo pa rane ṉinoroi. Gua asa ke boka turu si rau tani, pude tozi vura nia koa gamu doduru tinoni, hiteke na lavata, sa guguana sa Karisito. Asa tugo sapu koroto veko nia e Mosese, meke ari na poropita sapu ele ta evaṉa, sapu guahe:

²³Kaqu koa ta sigiti sa Karisito, meke asa sa tie kekenu sapu tava turu pule pa minate, pude kaqu la tozia sa sa kalalasa koari na tie Ziu meke koari na tie Zenitailo, gua.”

²⁴Sipu zama ni Paula saripu gua hire, si velavela ia e Pesitasi si asa, “Paula, pekipeki si goi! Sa mua tinumatumae lohina si va pekipeki igo!” gua si asa.

²⁵Meke olaṉa se Paula, “Qavuna, lopu pekipeki si rau! Na hinokara meke gotogoto si korapa tozi atuni rau.

²⁶Sa baṉara Aquripa si tumaeni nana sari ginugua hire, ke boka varane si rau pude zama atu koa sa. Gilania rau sapu lopu paere koa sa saripu gua hire, sina lopu ta evaṉa pa keke vasina tomena si arini.

²⁷Baṉara Aquripa! Va hinokari tugo goi sari na poropita? Gilania rau sapu va hinokari goi si arini!” gua se Paula.

²⁸Meke zama la koe Paula se Aquripa, “Paula, balabala ia goi si kote boka va kekerau goi si rau pa totoso papakana gua hie, pude ta evaṉae na tie te Karisito?” gua si asa.

²⁹Ba olaṉa se Paula, “Be gelena, babe papakana sa totoso, ba sa qua tinepa koe Tamasa si pude agoi, meke sari doduru pu korapa va avoso mae koa rau pa rane ṉinoroi, si pude mi koa kekeṉoṉo gua arau; ba lopu pude ta pusie seni gua arau hie!” gua se Paula.

³⁰Beto asa si gasa turu taloa sa baṉara Aquripa, sa qavuna Pesitasi, se Benisi, meke sari doduru pule.

³¹Sipu ele taluarae taloa rini, si vari zamai teledia si arini, “Sa tie hie si loke nana tinavete kaleana sapu kote pada pude tava mate nia, na ta pusi nia sa,” gua si arini.

³²Meke zama la koe Pesitasi se Aquripa, “Pada pude ta rupaha mo sa tie hie, be guana lopu tepa la si asa koasa baṉara pa Roma, pude ta pitu koa sa,” gua si asa.