Thuchihbu 18:1-11

¹Mihem ama changsehkikhoh sahpa chu ama dei lam jeng-ah akisalal jin, thildih lam ki manchahna jouse adoudal jin ahi.

²Mingol in thil hetthem’a lunglhai ding kiti anahsah pon, ama lung ngaichat jeng bou akhoh sah-jin ahi.

³Phatlouna ahung um teng, thangset nan ahin jui in, kijatona abei teng kimudana aum paijin ahi.

⁴Miching kamsunga kon hung potdoh thuchang hohi twithuh tobang ahin, chihna jong hi vadung ngui heu a twilong tobang ahi.

⁵Miphalou maija langnei hi angaina ahipon, midih chungthu adih’a tan ding jong suh-noh phah lou ding ahi.

⁶Mingol thucheng hin mitoh kinahna ason, akamchenga kon in mol akisei doh bep jitai.

⁷Mingol kamcheng hi ama dinga amanthahna bep ahin, aleigui in ama le ama thangkol’a o-na ding akisemdoh bep ahi.

⁸Aguh a thu poa pangpa thusei jihi, anneh tuitah tobang ahin, akamcheng sohdoh jouse jong mihem lungsunga alhalut paijin ahi.

⁹Atohna chunga mithase hi, mi manthah sahpa toh sopi ahi.

¹⁰Pakai minhi kulpi nasatah tobang ahin, hijeh chun midih in abel-jin hoidohnan aneije.

¹¹Mihaopa nei le gou chu ama din kulpi dettah tobang ahin, akihuhhingna dinga pal kikai bep bep ahi.