Te Israel me Juda Hani Sigo Tuni Bidigo Po Elalubo Buku Si 14:22-28

²²Tama nosali me badu sogo te aga tudi badu te king bidi nigilali, tama agai boi hwįgi pelama, tama te Elat taun te boi bidi dabego nogode elalubadi ma sali. Tama te taun te me badu pedai badu dolali, te agai me dodolali.

²³Te king Amasia te Joasgo ogwa da, tama agai kibu be te 15 kibu be yai, te Juda hanigo king bidi tama kibu be bidali, Jeroboam, Jehoasgo ogwa, aga te Israel hanigo king bidi nigilama, pedelali. Tama aga te Samaria bulude te king bidi nigilama bidiyu, tama te kibu be te bidi sese si olama, te deli, te 41 kibu beba usu nama bidai dao.

²⁴Tama agai kolesaga te aga sabi bidi Jeroboamgo yali dwai kolesaga tiwai agai me te Genuai Bidi gedude te dwai kolesaga yali. Polobadu te king Jeroboam te aga sabi bidigo te Israel hani kegelama, tama augwaligo te dwai sęgę sabo kolesaga te Genuai Bidigo gedude dwai mu yali. Tama megi te king nigali sabi bidi te Jeroboamgo me, te hasia king Jeroboamgo yali deli kolesaga tiwai naga te sęgę sabo kolesaga eyu, tama bidali.

²⁵Te Jeroboam aga king bidi nigisąbadi, te sogo te boi bidi dabe augwaligo te Israel hanigo umabo tǫ mu te boi bidi dabego sai. Tialima, megi te king nigali Jeroboam agai boi hwįnama, tama te tǫ dabe tigidali ma sali, te tǫ sabo gagalali te not badu te taun Hamat pabo tųdu gagalama, sesa pabogo te saut badu te sigi ąį ge elalubo pesageba usu nigi pali, te ąį nogi Detsi wabo da. Tama te king Jeroboamgo agai te tǫ ma sabo yali kolesagago te Genuai Bidi Godigo wali poba usu nigi pali, Israel hanigo Genuai Bidi. Te tama tiali sę te profet bidi Jonago pedauwalidu wali poba usu nigi pai, te Jona aga aya te Amitaigo ogwa dao. Te profet bidi Jona aga te taun Gathefer bulu bidi deli dao.

²⁶Genuai Bidigo suali, ma te Israel hani augwa boi bidi dabego te augwali tigiba genuai sęgę mu mabo sę eyu, tama augwali mu silibo homu ebo koneani. Tama tialima, te deli deli bidi naga bidada pali. Tama me te augwali tau sabo bidi me deli meni.

²⁷Tama te Genuai Bidigo te Israel hani augwali mu silaibao po me wai menio, tama augwaligo nogi me tigidali silaibao po me wai menio. Tama teyu, agai te king Jeroboam dąį ilali, Jeroboam aga te Jehoasgo ogwa da, te bidigo bomo elama, te Israel hani te boi bidigo nogode augwali ma somainogo dąį ilai.

²⁸Te po te king Jeroboamgo te gasa tigidali haniani sę yali po dao, te po te gasa bukude te elalubao. Te buku augwaligo e tama nogi wabo da, Te Israel Hanigo King Bidi Dabego Yali Sę Po Elalubo Buku dao wabo dao. Te e bukugo te king Jeroboam agai te bomai sę yali po me, me te boi hwįnama te taun Damaskus dali, te taun Hamat dali si ma sali po elalubo buku dao. Polobadu te Juda hani augwaligo te Hamat taun tonaluai dao.