Te Israel me Juda Hani Sigo Tuni Bidigo Po Elalubo Buku Deli 8:23-47

²³tama gedu haluasa po te tiwai wali, “God, Israelgo Genuai Bidio, te nage tiwai god me deli te dagalu ugwadu ma te tǫ aiyadu me bidibeo. Tama da te nago gedude bugagia bilibaso da, tama te dwai kolesaga me yabo homu isiąyu ebaso da, teda nago te naga sę ebo bage da dali te dąų wali bomai po te bugagia wali pomainu elama, tama sesemane sogo nago da godolo mu ebo dao.

²⁴Naga digi nago te eno aya Devit te naga sę bidi dali polobadu te bomai po dąų wali, tama naga digi te po bugagia wali pelama, tama megi da, nago naga te dąų wali bomai po te usu nani dao,” wali.

²⁵“Tama megi da, te God, te Israel dabego Genuai Bidi, eno nageba te nago gasa bomai po te eno aya Devit dali dąų wali pode te nageba hanalu obao,” wali. “Nago agaba te tama po wali, ‘Devit, te nago wai puluba hanigo te wali po sesemane sogo bugagia wali peyu, tama eno gedude dolo biliyu, te nago ebo tiwai gilama ebaso da, teda sesemane sogo te eno nago hanide te bidi me deli te Israel bagego king pedalumainu yaibao,’ wali.

²⁶Awe, te Israelgo God, eno homugo nago te eno aya Devit dali te dąų wali bomai po usu numainu homu ebao,” wali.

²⁷“Tiali goli, God, te mu tama nage te tǫba bidagasainu homu ebo da, agawe? Dagalu te genuai pesage mu tama da, tiali goli te nage bidabo pesage te genuai me elalube. Tama magi baso te eno nago be sę yani te be te nago usu da waibawe? Te be usu egobeo.

²⁸Tiali goli God, eno Genuai Bidi, eno homugo te nago ena naga sę bidigo gedu haluasa po wabo, me eno hanalubo po, te nago odomainu homu ebao, tama megi eno nagebolo bomonama hanalubo po te tiwai sę nago emainu homu yai.

²⁹Nago te po wali, te nago we bidi te nage pąba asomainu yabo be da po wai. Tama eno homugo nago te beba tigidali sogode tonalumainu homu ebao, te giligade me hulide, tama ena nago sę bidi eno te beba tonaluyu, te gedu haluasa po nageba wabo sogo da, teda nago eno te gedu haluasa po wabo odobo usu yaibao.

³⁰Genuai Bidi, nage te naga bulu te dagalude bidibao. Tiali goli, te ena nago sę ebo bidi me te Israel dabe, te naga we bidi hani dabego, te beba tonalu, te nageba gedu haluasa po obaso da, teda nago dago te gedu haluasa po wabo odolama, tama te dago sęgę sela sąyao,” po wai.

³¹“Te bidi me deligo te gasa bidiba dwai sę ebaso, tama augwali te beba aselama, tama te nago alta pąba pelama, tama agai te aga te dwai sę mu ebeo dąų wabo po obaso da,

³²teda Genuai Bidi, nage te dagalude bidiyu, tama nago augwali sigo te po wabo odolama, tama augwaligo te po tų dodolao. Tama nago te dwai sę yali bidiba te dwai dene ilama, tama te dwai kolesaga agaba wei ponao. Tama nago te dwai sę isiąwani bidiba te wiegi yai sę eyu, te agai dwai sę isiąwani te bidiba ola mayu, te tama tiao,” wali.

³³“Tama da Israel dabe, naga we bidi dabego, te boi bidi dabeba hwįbode tama nago te augwaligo da aiyaba elalumainu yai, magi baso meni, dago te nageba dwai sę ebaso, tama nosali dago homu ma begeliyu, te nage dologode bidiyu, tama da nago te be tomoba aselama, tama gedu haluasa po weyu, te dago dwai sęgę sela sąya po hanalubaso da,

³⁴teda Genuai Bidi, nage te dagalude bidiyu, tama nago te naga we bidi dabego gedu haluasa po wabo odolama, tama dago dwai sęgę sela sąyao,” wali. “Tama te boi bidi dabego da te gasa tǫ pedaiba selasa pobaso da, teda nago digi da te dena wąį nǫų dabebolo te nago polobadu da mani te tǫba ma odasa asu yao,” po wai.

³⁵“Tama naga we bidi dago dwai sę nageba ebaso, tama nago te dwai sę wei ponoyu, te tulubage dąų weyu palia sobaso, te nosali dago ge nenama, homu begeliyu, tama nage dologoba aselama bidiyu, tama dago te beba tonalu, tama nageba gedu haluasa po obaso da,

³⁶teda Genuai Bidi, nage te dagalude bidiyu, te gedu haluasa po odoyu, tama nago te da Israel naga sę ebo we bidi dabego sęgę sela sąyu yao. Nago dabolo te doloba pai kolesaga wali pomainu ola mao. Tama te dago tǫ da olama bidimainu nago te polobadu naga we bidi dabolo mani tǫba te tulubage ma mayu tagala palao,” te po wai.

³⁷“Tama te genuai nasi te dago tǫba pedalubaso, ma te genuai gasi me deli pedalubaso, ma te posolai wali asu, tama te gide nai dabe dolabo gasi me deli pedalubaso, ma te kuli mano hauwa umabo mu asiyu, te nai dabe silibaso, ma te boi bidi dabego hwįagasu te dago hanude te da bagua sagasobaso, ma te haniani gasigo da dolobaso,

³⁸tama nosali da Israel dabe me deli te naga we bidi dabe, te sęgę agaba pedaluyu, tama aga yali dwai sę koneyu elama, tama te tempel beba tonalu, tama aga nogo ugwaba siyu, tama nageba gedu haluasa po obaso da,

³⁹teda Genuai Bidi, nage te naga bulu te dagalude bidiyu, tama nago agai gedu haluasa po wabo odolama, tama agai sęgę sela sąyu, te aga tau sao. Nago naga te nago tigidali bidigo homu koneani, tama tiyu, nago te tigidali deli deli bidigo kolesaga dagaliyu, tama augwa te yali kolesagade usu nama, te dene wei ponobo dao.

⁴⁰Te nago tama tibaso da, teda da naga hani bidi dabe te nago dago wąį nǫų dabebolo te mani tǫde bidiyu, te tigidali sogo nage dologode bidaibao,” te po wali.

⁴¹“Te gasa bulu tǫ pedaide bidibo Israel hani isąwai bidi dabego te nago genuai nogide po odoyu, tama te nago te naga we bidi dabe tau siyu, te genuai sę dabe mu ebo po wali. Tama te bidi dabe augwali me deligo te nageba lotu wabo homu ebaso, tama te aga page bulu tagalama, tama te tempel be pąba aselama, tama nageba gedu haluasa po obaso da,

⁴³teda Genuai Bidi, nage te naga bulu dagalude bidiyu, tama nago agai gedu haluasa po wabo odolama, tama nagebolo hanalu, te yao wali sę te sę nago yao. Tama tiyu, te tigidali bulu bidi hanigo te nage koneama, te nage dologode bidaibao, te da Israel dabe, te nago we bidi dabego ebo tiwai gilama yaibao. Tama te augwa koneama, eno te sę yani be, te nago be elalubaso, tama te pesageba te we bidi dabe nage pąba asomainu te tama tiao,” po wali.

⁴⁴“Tama nago te naga we bidi dabe da te me badu me te boi bidi dabeba hwįgi pomainu tagala palalima, tama augwaligo nago te sa muani taunba dali, te tempel beba dali si tonalu, tama augwaligo gedu haluasa po obaso da,

⁴⁵teda Genuai Bidi, nage te bulu dagalude bidiyu, tama te nago augwaligo gedu haluasa po wabo odolama, te nago te olo mu tau sabo wiegi yai kolesaga elama, te augwali tau sao,” po wali.

⁴⁶“Tigidali we bidigo dwai sę ebo da. Tama nosali te Israel dabego te dwai sę nageba ebaso, tama nago augwali dali wado po weyu, tama nago te boi bidi dabego augwali aiyaba elalumainu elama, te augwali kalabus elama, tama augwali te pąde elalubo bulu tǫba, ma te digibulu tǫba selasa pomainu ilama,

⁴⁷tama nosali augwali te boi bidi dabego bulu tǫde bidiyu, tama augwaligo te augwa yali dwai sęde homu hauwa kone paliyu, te augwaligo homu begelibaso da, teda Genuai Bidi, nago augwaligo te gedu haluasa po wabo odao. Mu tama, augwali te boi bidi dabego tǫde kalabuside bidiyu, tama augwaligo nageba konealubo homu dąų weyu, te nageba naga homu koneyu, tama ge nenama, homu mu begelama, tama augwaligo te nago augwaligo wąį nǫų dabeba sa muyu mani te tǫba tonalu, te e hanuba dali te nago eno sę yani beba tonalu, te we bidi dabe nage pąba asainu ebo homu elama, tama te augwaligo gedu haluasa po te tama waibao, ‘Te hobede mu da, da te dwai sę ebo kolesagade biliyu, tama te dwai kolesaga haniani yali dao,’ te po obaso da, teda nage te naga bulu dagalude bidiyu, tama te nago augwaligo gedu haluasa po wabo odolama, te nago olo tau mabo wiegi yai kolesaga eyu, te augwali tau sao,” po wai.