Tang Ko Pitang 5:3-10

³Ku gu mu’ i luf madag; are mangfan ngku ni gun’ bayay? Ku gu luknag rifrifen eg; are mangfan ni ngkug alitnag bayay?

⁴Gamareg e ke tay pa’ ko mab, ma kugu t’on ko felfelan’ nike chugur ngog.

⁵Ma ku gu fal’eg rogog ni nggu pag nga naun. Ke sug e myrrh u pa’ag, buglipa’ag e ke garda’ ko myrrh, ni ggogoy e man’ ko mab.

⁶Gu bing e mab ngak gamareg, ma dakimo’ nike yan. Kargum’ ni bochan ni nggu rung’ag laman! U gu changarnag i yan mada gu pir’eg; U gu pining made fulweg lungug.

⁷Pi tamatnag ko binaw e ra pir’eged gag; miyad pirdi’iyeg ngar maad’adgad ngog; fapi matnag ni yad bay ko yoror ko binaw a ra gochthiyed e thal ni wuru’ e mad rog.

⁸Mmicheged ngog, gimed e ppin nu Jerusalem, ni fa’anra mu pir’eged e en gamareg, migmed yog ngak ni kug m’ar ni gube yik’ nga chogowen.

⁹Re pin th’abi pidorang u fithik’ e ppin, mog en gamarem, yu gub thil u fithik’ gubin e girdi’? Ri mang e rib fel’ rok e re mo’on nir ni thingar gu michmichgad ngom?

¹⁰En gamareg e ba pichoay ma ba gel; yigo’ ir u fithik’ ragag e biyu’.