Taalie 16:1-25 in Susu

¹ Adamadi natɛ tongoma a bɔɲɛ kui, kɔnɔ maragiri na Ala nan bɛlɛxɛ.

² Adama tan bɛ, a xa kira birin fan, kɔnɔ kiiti sa mangɛ Ala a bɔɲɛ kolon.

³ Wali birin taxu Alatala ra, alako a xa sɔɔnɛya.

⁴ Alatala fe birin yailanxi fe nde nan ma. Hali mixi ɲaaxi daaxi gbaloe lɔxɔɛ nan ma fe ra.

⁵ Alatala yɛtɛ igboe xɔnxi. Ɲaxankatɛ nan a mamɛfe.

⁶ Yunubi xafarima hinnɛ nun dugutɛgɛya nan saabui ra. Alatala xa yaragaaxui mixi ratangama fe ɲaaxi nan ma.

⁷ Mixi ɲɛrɛ ki na rafan Alatala ma, a a niyama nɛ gere xa ɲɔn na kanyi nun a yaxuie tagi.

⁸ Se dondoronti sɔtɔxi tinxinyi ra na nan fisa se gbegbe sɔtɔxi bɛ tinxintareya kui.

⁹ Mixi natɛ tongoma a xa fe rabaxi ma, kɔnɔ na fee ragiri mangɛ na Alatala nan na.

¹⁰ Mangɛ xa masenyi tide gbo, a xa kiiti xa tinxin.

¹¹ Alatala na sikeeli tinxinxi nan bɛ, a xa wali nan na se maniyase kamalixi ra.

¹² Fe ɲaaxi mu rafan mangɛe ma, barima tinxinyi nan mangɛ kibanyi mabanbanma.

¹³ Mangɛe xa hinnɛ na tinxintɔɛe bɛ, nɔndi falɛ rafan e ma.

¹⁴ Mangɛ xa bɔɲɛte mixi faxama nɛ, kɔnɔ lɔnnila fata mangɛ bɔɲɛ ragorode.

¹⁵ Mangɛ xa ɲɛlɛxinyi findima simaya nan na, a xa hinnɛ luma nɛ alɔ nuxui naxee tunɛ ye raminima.

¹⁶ Lɔnni sɔtɔɛ fan xɛɛma sɔtɔɛ bɛ, xaxili fanyi sɔtɔɛ fan gbeti sɔtɔɛ bɛ.

¹⁷ Tinxintɔɛ xa kira mu sigama fe ɲaaxi ma. Mixi naxan a ɲɛngi saxi a ɲɛrɛ ki xɔn ma, na kisima nɛ.

¹⁸ Yɛtɛ igboɲa mixi nan xun nakanama, yɛtɛ iteya mixi nan nalɔɛma.

¹⁹ Lufe yɛtɛ magoree ya ma, na fan naafuli itaxunfe bɛ yɛtɛ igboee ya ma.

²⁰ Hɛɛri na mixi bɛ naxan a ɲɛngi sama fe raba kie xɔn ma. Sɛɛwɛ na mixi bɛ naxan a xaxili tima Alatala ra.

²¹ Mixi sabarixi findima xaxilima nan na. Wɔyɛn ɲɔxunmɛ xaxili fima nɛ mixi ma.

²² Xaxili fanyi simaya nan fima xaxilima ma, xaxilitareɲa findima ɲaxankatɛ nan na xaxilitare bɛ.

²³ Xaxilima a ɲɛngi sama a xa masenyi ma, alako lɔnni fanyi xa mini a dɛ kui.

²⁴ Wɔyɛn fanyi findixi kumi nan na, naxan xaxili nun fate rayalanma.

²⁵ Adama a maɲɔxun nɛ a xa kira fanxi, kɔnɔ a raɲɔnyi a xun tima faxɛ nan na.

¹ عَدَ مَدِ نَتّ تٌنفٌمَ عَ بْحّ كُي، كْنْ مَرَفِرِ نَ عَلَ نَن بّلّشّ.

² عَدَ مَ تَن بّ، عَ شَ كِرَ بِرِن قَن، كْنْ كِيتِ سَ مَنفّ عَلَ عَ بْحّ كٌلٌن.

³ وَلِ بِرِن تَشُ عَلَتَلَ رَ، عَلَكٌ عَ شَ سْونّيَ.

⁴ عَلَتَلَ قٍ بِرِن يَءِلَنشِ قٍ ندٍ نَن مَ. هَلِ مِشِ حَاشِ دَاشِ فبَلٌي لْشْي نَن مَ قٍ رَ.

⁵ عَلَتَلَ يّتّ عِفبٌي شْنشِ. حَشَنكَتّ نَن عَ مَمّقٍ.

⁶ يُنُبِ شَقَرِ مَ هِننّ نُن دُفُتّفّيَ نَن سَابُي رَ. عَلَتَلَ شَ يَرَفَاشُي مِشِ رَتَنفَمَ قٍ حَاشِ نَن مَ.

⁷ مِشِ حّرّ كِ نَ رَقَن عَلَتَلَ مَ، عَ عَ نِيَمَ نّ فٍرٍ شَ حْن نَ كَنيِ نُن عَ يَشُييٍ تَفِ.

⁸ سٍ دٌندٌرٌنتِ سْتْشِ تِنشِنيِ رَ نَ نَن قِسَ سٍ فبٍفبٍ سْتْشِ بّ تِنشِنتَرٍيَ كُي.

⁹ مِشِ نَتّ تٌنفٌمَ عَ شَ قٍ رَبَشِ مَ، كْنْ نَ قٍيٍ رَفِرِ مَنفّ نَ عَلَتَلَ نَن نَ.

¹⁰ مَنفّ شَ مَسٍنيِ تِدٍ فبٌ، عَ شَ كِيتِ شَ تِنشِن.

¹¹ عَلَتَلَ نَ سِكٍيلِ تِنشِنشِ نَن بّ، عَ شَ وَلِ نَن نَ سٍ مَنِيَسٍ كَمَلِشِ رَ.

¹² قٍ حَاشِ مُ رَقَن مَنفّيٍ مَ، بَرِ مَ تِنشِنيِ نَن مَنفّ كِبَنيِ مَبَنبَنمَ.

¹³ مَنفّيٍ شَ هِننّ نَ تِنشِنتْييٍ بّ، نْندِ قَلّ رَقَن عٍ مَ.

¹⁴ مَنفّ شَ بْحّتٍ مِشِ قَشَمَ نّ، كْنْ لْننِلَ قَتَ مَنفّ بْحّ رَفٌرٌدٍ.

¹⁵ مَنفّ شَ حّلّشِنيِ قِندِ مَ سِمَيَ نَن نَ، عَ شَ هِننّ لُمَ نّ عَلْ نُشُي نَشٍيٍ تُنّ يٍ رَ مِنِمَ.

¹⁶ لْننِ سْتْي قَن شّيمَ سْتْي بّ، شَشِلِ قَنيِ سْتْي قَن فبٍتِ سْتْي بّ.

¹⁷ تِنشِنتْي شَ كِرَ مُ سِفَمَ قٍ حَاشِ مَ. مِشِ نَشَن عَ حّنفِ سَشِ عَ حّرّ كِ شْن مَ، نَ كِسِمَ نّ.

¹⁸ يّتّ عِفبٌحَ مِشِ نَن شُن نَكَنَمَ، يّتّ عِتٍيَ مِشِ نَن نَلْيمَ.

¹⁹ لُقٍ يّتّ مَفٌرٍيٍ يَ مَ، نَ قَن نَاقُلِ عِتَشُنقٍ بّ يّتّ عِفبٌييٍ يَ مَ.

²⁰ هّيرِ نَ مِشِ بّ نَشَن عَ حّنفِ سَمَ قٍ رَبَ كِيٍ شْن مَ. سّيوّ نَ مِشِ بّ نَشَن عَ شَشِلِ تِمَ عَلَتَلَ رَ.

²¹ مِشِ سَبَرِشِ قِندِ مَ شَشِلِمَ نَن نَ. وْيّن حْشُنمّ شَشِلِ قِمَ نّ مِشِ مَ.

²² شَشِلِ قَنيِ سِمَيَ نَن قِمَ شَشِلِمَ مَ، شَشِلِتَرٍحَ قِندِ مَ حَشَنكَتّ نَن نَ شَشِلِتَرٍ بّ.

²³ شَشِلِمَ عَ حّنفِ سَمَ عَ شَ مَسٍنيِ مَ، عَلَكٌ لْننِ قَنيِ شَ مِنِ عَ دّ كُي.

²⁴ وْيّن قَنيِ قِندِشِ كُمِ نَن نَ، نَشَن شَشِلِ نُن قَتٍ رَيَلَنمَ.

²⁵ عَدَ مَ عَ مَحْشُن نّ عَ شَ كِرَ قَنشِ، كْنْ عَ رَحْنيِ عَ شُن تِمَ قَشّ نَن نَ.