1Hwa bukba God mo Sisas Kraisim fainaba mangwal sa ikagna pugufe. Sisas ambangel sa Godim patalfug enam ogfuni. Ehe enaig esena heafna of lanai elim kam mo faigim ningihiana.
2Kaba Jon, mangwal sa ka mungwali fahigiageg nasa ka ambala enam osihi. Hwaba Godna mo afa ena nufuna mom Sisas Krais ogfug.
3Amban sa hwa buk osuwigfiba sama sifakale. Ambangel sa higig afa patalfug ena mo hwa buk la go enaig esog mangwal sa sumi yi pugufe ehengel gafa sifakali. Afa mas managei eba ikagna pugufe.
4Kaba Jon ka hwa ginof nem elegeg la gohug Esia nai provins sios elim faig. Sama God nem esmunagim kwaganig faibi sama olug enesieg nem gohunifi. Sonaig God bigim fafaife eba ehe autunai fegim afa glaunai feg afa autunai la gafa gwese gofufe, afa elegeg la gohug sungwabug heafna pegag sime la afohie.
5Afa Sisas Krais eba nufunam ambala sihiaule afa ehe goseg lahagim afa buihiag, afa ehe mungwali bite nai misog elim Ainiyag fenig. Ehe bigim fwina membenigim, afa lahagim asa heafna tafna amtakwalig nihe mo la nai bigim tigfe lambigim,
6afa lambkug heafna bog megam aitig fwahagim afa bigim esenigbi asa big pris figim sa big heafna God Apiim gafugafini. Afa sa Sisas Krais ehe wahkig unehlag kwania flanam asa mungwali nangwagihiage gofufe. Eba esefe.
7Afa sa ne nanguibi leangona wahe blofe afa mungwali el i afa Sisasim tigi kahliule el i gafa asa ehem nangufi afa bitenai el mungwali enaig puguiagim oniginim wewatife. Eba nufunam enaig pugufe.
8Afa God Ainiyag ehe mungwali kigmogna feg esog, “Kaba kike ka goseg afa kike ka sum feg.” Eba ehe autunai fegim afa glaunai fegim afa autunai la gwese gofufe.
9Ka Jon nengelni nilite, ka Sisasim patalkugum afa ka enag kinig flag asa ati ne nengel gafa enaig flig. Enaig big esigbi eba ati big wasneigim saiyeg Godna bog megam nenge afo. Afa ka Godna mo sihigba ena nufunam moba Sisas ogfug asa ka enag kinig flagim afa kam Patmos ailan gam ningihig.
10Afa enanam Ainiyagna osuna Godna Sungwabug kam sulufla wanikina afa ka higinaba elni mengig la fuf lofug kana masigim fwina moasina.
11Enaig esona og, “Mangwal sa ne mungwali fahigegba asa ne buk la ginofenam elegeg la gohug siosim fai. Ena siosba Efesus, Smerna, Pergamum, Taiataira, Sardis, Filadelfia, afa Laodisia.”
12Afa koka anwenafe amban maia esogo asa ka wahigife nangunaba afa sa elegeg la gohug lam afohiafna. Afa ena lamba eba gol.
13Afa lam olyiba eba el lofug gofenamba afa ehena lofug mo mungwanam peka kigim safla gufna afa minailof fatina enaba gol ehe.
14Afa ehena misog i lapog i fwinam busiagena ofenaiba lambo busug enaig fena. Afa ehena nofugba suwi meleg lofug kukoitifego.
15Afa ehena mongfifagba ofenaiba kapa yimieg ombusug afa ehena moagba ofenaiba bu sisewug kwania lagi.
16Afa ehe heafna nihiginai ningana elegeg la gohug bagnofut kike lambgu. Afa ehena mengig la naiba bainat sambaga sig ahgo enaig pugukag. Afa ehena nofbusugba osu lofug fwina pukofakag.
17Afa maia ehem nangugba afa ehena kig mong la kam pegim lahag lofeg. Afa sa kam heafna nihiginai ningana tuhugim afa esog, “Nofeka embefe, eba kikehe gof fegim afa ka sumi feg.
18Afa ka kike nofkikena feg. Autunam ati kam lahana, afa sa nangu, ilawaba ka nofkikena wahkig gofufe. Asa lahag i afa melig pigiegna kembig i ambe kam ahnai skaufenig.
19“Afa sa ati ne enaigim nangug haig haig sa ilawo go afa haig haig sumi yi pugufe, sa ne enam ginofe.
20Afa mangwalim sa ne lambusig ena mogim ka nem osihina. Elegeg la gohug bagnofut kana nihiginai ninga la go eba elegeg la gohug siosna of lanai el afa elegeg la gohug lam eba elegeg la gohug sios.”
