Sumbaogha 8

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

¹Kabong aneko saingnil ingkiogne sembe palilamap. Allahri Nuhap lebe aroba kabongag wa'iekne tanekoap sembe ekon tan koma seneraglamogti, phoana poghogpa, mag longoro walbaogne neneko lo'oe tangtang kuluklamog.

²Mag so'oag agha punguro walelamogne taneko kom nenelamogti, imag agha kulukul alamogne taneko kom nenero lepto unulamog abeneko mag longkaogne taneko lo'oe tangtang kuluklamog. Mag aneko lo'oe taogne wal lambare agha lo'oe taog.

⁴Wal saekne, ik ko'olom tarabare taog sum eneko kabong aneko Ararat sip yim tamag saingnil ingkiog.

⁵Saingnil ingkiogpa, wal wilindi wamekpa, mag aneko lo'oe tangtang kuluklamogha wal sa'ongeag, ik selek sum eneko yim lag tangtang palamog.

⁶Inipna teng nhon epto naualbare wamogti Nuh ponekori keken lepto soroba aneko kubogti winang hamale sae laplobog. Sae laplobogpa, piogha aneko yan kom paghabog mag aneko lo'oe tangtang kuluklamog.

⁸Lo'oe talamogpa Nuh ponekori, “Mag aneko ya'ag lo'oe tal, to?” aro winang mem winang nhon sae laplobog, aghana mag aneko mog so'o ni nikniamogpa winang aneko puna-ag orogti nen samoro kabong anekoag pul aogpa, Nuh poneko sae la'aro winang aneko saelbaogti, nen kabong ae lomag toro pibog.

¹⁰Toro pibogti, ik saekbare wamogha nen mem winang aneko sae laplobog.

¹¹Sae laplobog sum eneko ae sinag winang anekori kal zaitun ma'al erenne nhon singkamogti, payaogpa, Nuh ponekori, “Mag lo'oe tal,” aro el taog.

¹²Nen ik saekpare wamogha Nuh ponekori winang aneko nen sae laplobogpa piogha aneko nen samoro yaog kom.

¹³Nuh poneko mangkaeka heng kun taibuka taubuka ulamogha teng no'op tarabare eptopne saekpare (601), wal selekne, ik selek sum eneko mag aneko ya'ag lo'oe taogpa, Nuh poneko ae imag sobaogne neneko lelekto tilamogpa, mag lo'oe tangto mog so'o mektobag tibaog.

¹⁴Ik teng phende eptopne wilindip sum taogpa, mog so'o ya'ag mekog.

¹⁵Mekogpa Allahri yubu lelamogti,

¹⁶“An anenge kelabo meap, anmabori kelaboap lambahut!

¹⁷Lebe aroba so'oag yabiropneap, im toman yabiropneap, nubunge ologne mangap taikti, mog so'o tala-tala wamukangba ni poa lambalulam!” seog.

¹⁸Wene seogpa, Nuh ponekori elkelap, elmaboap, elmabori kelaboap kabongag agha lanalamekti,

¹⁹lebe aroba taneko sisa a'ero poa lambahiek.

²⁰Lambaekti abeneko Nuh ponekori, “Nuni Allah sembe mhong towalengkanun,” aro kirik yangkaogti, lebe aroba so'oag yabiropneap, im toman yabiropneap, Allah sembe pimnep saogne sisa a'ero uropne nhon-nhon obogti, aukag tabog.

²¹“Nuhri taplange Na sembe wali sembaldi tapla,” aro Nuni Allah awi sembaogti, wanaag agha seneraghogti, “Amik, nimiri malia ulamikne sembe Nari so'o ane yo'obanun kom. Nimi ologhag nolamang liag agha wana malinge seneraglamangne sembe Na wana sesog, aghana hain eptoba ni amik nen kom nembahinun kom.

²²Mog so'o ane orog tan koma wamleba, wero mero tero, sonap boboap, ebare mag, inipna kwelekna wamlul,” seog.