Solomon 5:6-15

⁶Eno ena abagi sunumi dalali. Tiali goli, aga pai yalio, tama eno aga subeo. Eno agai wali pode homu kone palama, tama eno haliga dwai mu yalio. Te eno aga gegebo sę yali, tiali goli eno aga me subeo. Eno aga i wali, tiali goli agai eno i weyu me ponobeo.

⁷Te taun bagulali moni obo tonalubo bidigo ena suali. Te augwaligo ena elama, te eno tigi dolama, tama augwaligo eno bulali ugwa saket sali.

⁸Te Jerusalem we dabe, te dagego eno abagi wali bidi subaso da, dagego te tiwai po dąų walama, agabolo wao, eno aga homu godolo mu elama, te eno nogo sągą dili kimi meni yai elalubo po walao.

⁹Nage gasa sawi yai we, tama nago tigidali we aiyaba elalualio. Nago te bidi aga mena tobage bidi dawe? Te da gasa we dabego bidi aiyaba elaluali homu ebaso, tama nago homugo dago te tiwai po dąų omainogo ebawe?

¹⁰Eno abagi wali bidi te aga bomai bidi mu da, te agai gesabidi gasa sawia pai mu da, tama te tǫde bidi nedabo usu isiąbo te hauwa tausen bidi mu aiyaba elaluai dao.

¹¹Agai gesabidi ula te gol tiwai. Agai tobolu nisi te husugu yai mu, te husugu bago tigi nisi tiwai elalubo.

¹²Agai gedu begelebo sę umabo mu iduali, te ąį pauwai ba te ąį sesegede tolalubo tiwai gilama yai.

¹³Te agai naboge badu tobolu nisi te wiegi yai, te gide wiegi yai denami yai plaua dabe elalubo tiwai yalio. Agai pedauwali te sawi yai plaua tiwai elaluali. Agai wabo po wiegi yai mu ebaso, te denami ebo wiegi yai sanda tiwai elalualio.

¹⁴Agai nogo te wiegi yai mu tama. Tama agai te gasa tedali au gasagi yai ring dabe te aga nogo dani au ilama muani. Agai tigi tedela mu yai, te tigi ula umabo mu yalio. Tama agai kukulu augwaligo te sisi dugusu yai te gasa au tedali yai masigigo au ilalio.

¹⁵Agai sągą si augwaligo te wiegi yai tedela yai masigigo nigali pos si tiwai elama, tama te mu udula pai gol pedai si elalubo pedai badu dolaluali. Te noma yai polalubo mu te ni sida wiegi yai dabe tiwai, me te Lebanon genuai bulu du dabe elalubo tiwai yalio.