Solomon 4:11-16

¹¹Henduen be te teneb is keemis te menge hazek nu, minahal ku. Uya, is dilè nu henduen be te zuen duen teneb wey gatas. Is kehemut te kumbalè nu ne iring kehemut te kayu he sidru ziyà te Lebanon.

¹²He pelanggè ku he minahal, henduen ka te pemuleey he midsireduwan he zuen duen edtudà he serebseb.

¹³Ebpemeǥas heini te pumigranata wey zuma pa he utew meupiya he menge veǥas. Dekelà is egkekuwa kayi he pehemut he hina, nardu,

¹⁴asapran, kalamu, sinamun, nekedseselekawà he kelasi te veyewà, mira, alus, wey zuma pa he utew mehemut he menge pehemut.

¹⁵Uya, iring ka te pemuleey he edtudaan te serebseb he ebpuun diyà te menge vuvungan he Lebanon.

¹⁶Sikiyu is keramag he ebpuun diyà te zizaya wey zivavà. Hiyupa niw is pemuleey ku su wey mekepeyapat is kehemut kayi. Ipehendiyà is minahal ku te pemuleey zin su wey mekekaan te kinemeupiyahan he menge veǥas te pinemula kayi.