1Jesú masãrẽ yʉꞌrʉocaterore pãjãrã masã cʉ̃ tiropʉ nerẽcãrã niwã. Beꞌro na baꞌase toja waꞌacãrã niwã. Tojo waꞌacã ĩꞌagʉ̃, Jesú cʉ̃ buꞌerãrẽ pijio, nicʉ niwĩ:
2—Yʉꞌʉ ãꞌrãrẽ pajañaꞌa waꞌasaꞌa. Na marĩ meꞌrã nirṍ iꞌtia nʉmʉ yʉꞌrʉꞌʉ. Tojo weerã na baꞌase toja waꞌama.
3Na ye wiꞌseripʉ yʉꞌʉ tojaaduticã, ʉjaboarã maꞌapʉ tʉꞌomasĩse peꞌtiqueꞌa waꞌabosama. Ãpẽrã yoabutiaropʉ aꞌtiꞌcãrã nima, nicʉ niwĩ Jesú.
4Beꞌro cʉ̃ buꞌerã Jesure yʉꞌticãrã niwã: —Marĩ aꞌto masã marĩrõpʉre ¿deꞌro wee ãꞌrã pãjãrãrẽ baꞌase boca ecabosari? nicãrã niwã.
5Jesú narẽ sẽrĩtiñaꞌcʉ niwĩ: —¿Dicʉsepaga pã́ cʉoti? Na yʉꞌticãrã niwã: —Sietepaga cʉoꞌo, ni yʉꞌticãrã niwã.
6Tojo níca beꞌro Jesú masãrẽ dujiduticʉ niwĩ. Cʉ̃ tepagare mii, cʉ̃ pacʉ Õꞌacʉ̃rẽ eꞌcatise oꞌocʉ niwĩ. Beꞌro, peꞌé, cʉ̃ buꞌerãrẽ masãrẽ etidutigʉ oꞌocʉ niwĩ. Na masãpʉre etituriacãrã niwã.
7Waꞌi oꞌmajãrãcãrẽ pejetirãcã cʉocãrã niwã. Jesú na quẽꞌrãrẽ cʉ̃ pacʉre eꞌcatise oꞌotoja, mejãrõta tja etiduticʉ niwĩ.
8Nipeꞌtirã baꞌa yapiyʉꞌrʉacãrã niwã. Beꞌro siete piꞌseri na baꞌadʉꞌaꞌquere seeneo, miisãacãrã niwã.
9Topʉ baꞌaꞌcãrã baꞌparitisetiri mil waꞌtero ʉmʉa nicãrã niwã. Beꞌro narẽ na ye wiꞌseripʉ tojaadutigʉ, Jesú cʉ̃ buꞌerã meꞌrã yucʉsʉpʉ mʉjãsãjãa, Dalmanuta wãmetiropʉ waꞌa waꞌacʉ niwĩ.
11Jesú cʉ̃ buꞌerã meꞌrã Dalmanutapʉ etacʉ niwĩ. Topʉ fariseo masã Jesure tutuaro meꞌrã ucũcãrã niwã. ¿Diacjʉ̃ta Õꞌacʉ̃ macʉ̃ nimiticʉ̃? nírã, cʉ̃rẽ Õꞌacʉ̃ tutuaro meꞌrã weeĩꞌoduticãrã niwã.
12Jesú na tojo nisere caributi, tʉꞌsatigʉ, narẽ nicʉ niwĩ: —Aa. ¿Deꞌro weerã aꞌtocaterocjãrã weeĩꞌodutisari? Diacjʉ̃ta nigʉ̃ti. Ne cãꞌrõ narẽ weeĩꞌosome, nicʉ niwĩ.
13Beꞌro narẽ cõꞌawãꞌcãgʉ̃, yucʉsʉpʉ apaturi mʉjãsãjãa, ape pãꞌrẽpʉ pẽꞌa waꞌacʉ niwĩ.
14Ape pãꞌrẽpʉ pẽꞌarã, Jesú buꞌerã na baꞌatjere miaticãrã niwã. Pã́ niꞌcãgãta cʉocãrã niwã.
15Beꞌro Jesú narẽ aꞌtiro nicʉ niwĩ: —Fariseo masã, tojo nicã Herode na ye levadura pã́ bʉcʉacã weesere mʉsã tʉꞌomasĩña, nicʉ niwĩ.
16Cʉ̃ buꞌerã cʉ̃ nisere tʉꞌotirã, na basu nicãrã niwã: —Marĩ pã́ moocã, tojo nisami, nicãrã niwã.
17Jesú na tojo nisere masĩgʉ̃, aꞌtiro nicʉ niwĩ: —¿Deꞌro weerã mʉsã “Baꞌase mooꞌo”, niti? ¿Mʉsã tʉꞌomasĩweti yujupʉ? Mʉsã ejeripõꞌrã bʉtiyʉꞌrʉaꞌa.
18Mʉsã ye caperi meꞌrã ĩꞌaꞌa. Mʉsã ye oꞌmeperi meꞌrã tʉꞌoꞌo. ¿Tojo weemirã, yʉꞌʉ todʉporopʉ weeꞌquere wãcũtibutiati?
19Todʉporopʉ niꞌcãmocʉsetiri mil masãrẽ niꞌcãmocʉsepaga pã́ meꞌrã ecawʉ. ¿Dicʉse piꞌseri na baꞌadʉꞌaꞌquere seeneorĩ? nicʉ niwĩ. Cʉ̃ buꞌerã cʉ̃rẽ yʉꞌticãrã niwã: —Doce piꞌseri seesãawʉ̃, ni yʉꞌticãrã niwã.
20Jesú narẽ ninemocʉ niwĩ: —Apeye quẽꞌrã sietepaga pã́ meꞌrã baꞌparitisetiri mil masãrẽ ecawʉ. Tita quẽꞌrãrẽ ¿dicʉse piꞌseri seeneonoꞌrĩ? nicʉ niwĩ. Na cʉ̃rẽ yʉꞌticãrã niwã: —Siete piꞌseri seeneonoꞌwʉ̃, nicãrã niwã.
21Na tojo níca beꞌro Jesú narẽ nicʉ niwĩ: —To pũrĩcã tere masĩmirã, ¿deꞌro weerã tʉꞌomasĩweti yujupʉ? nicʉ niwĩ.
22Jesú cʉ̃ buꞌerã meꞌrã ditarare pẽꞌa, ape pãꞌrẽ Betsaida wãmetiri macãpʉ pẽꞌajacãrã niwã. Topʉ na ejacã, Jesú tiro niꞌcʉ̃ caperi ĩꞌatigʉre miiejacãrã niwã. Na Jesure aꞌtiro sẽrĩcãrã niwã: —Ãꞌrĩrẽ ñapeo yʉꞌrʉoya, nicãrã niwã.
23Tojo weegʉ Jesú caperi ĩꞌatigʉ ya omocãpʉ ñeꞌe, macã sumutopʉ tʉ̃awãꞌcãcʉ niwĩ. Beꞌro Jesú cʉ̃ ye ʉꞌseco meꞌrã caperipʉ tuuwaꞌrecʉ niwĩ. Tojo weetojanʉꞌcõ, Jesú omocãrĩ meꞌrã cʉ̃ ye caperire ñapeocʉ niwĩ. Beꞌro cʉ̃rẽ sẽrĩtiñaꞌcʉ niwĩ: —¿Mʉꞌʉrẽ apeyenojõ bajumitito? nicʉ niwĩ.
24Cʉ̃, cʉ̃ ye caperire ĩꞌapãa, aꞌtiro nicʉ niwĩ: —Masãrẽ ĩꞌaꞌa, ĩꞌagʉ̃. Yucʉpagʉ weronojõ bajurã sijacã ĩꞌaꞌa, nicʉ niwĩ.
25Cʉ̃ tojo nicã tʉꞌogʉ, Jesú cʉ̃ ye caperipʉ apaturi ñapeonemocʉ niwĩ. Topʉta cʉ̃ añurõ waro ĩꞌabutiacʉ niwĩ. Nipeꞌtisere queoro ĩꞌacʉ niwĩ.
26Beꞌro Jesú cʉ̃rẽ cʉ̃ ya wiꞌipʉ oꞌótõrõgʉ̃, aꞌtiro nicʉ niwĩ: —Macãpʉ waꞌaticãꞌña. Ne niꞌcʉ̃ tocjʉ̃rẽ yʉꞌʉ mʉꞌʉrẽ yʉꞌrʉoꞌquere wereticãꞌña, nicʉ niwĩ.
27Beꞌro Jesú cʉ̃ buꞌerã meꞌrã Cesarea Filipo wãmetiri macã pʉꞌto nise macãrĩpʉ waꞌacãrã niwã. Na to waꞌaropʉ cʉ̃ buꞌerãrẽ sẽrĩtiñaꞌcʉ niwĩ: —¿Deꞌro masã ucũti yʉꞌʉre? nicʉ niwĩ.
28Na cʉ̃rẽ yʉꞌticãrã niwã: —Ãpẽrã mʉꞌʉrẽ “Juã wãmeyeri masʉ̃ nimi”, nima. Ãpẽrã “Dʉporocjʉ̃pʉ Õꞌacʉ̃ ye queti weremʉꞌtãrĩ masʉ̃ Elía nimi”, nima. Ãpẽrã “Noꞌo nigʉ̃́ Õꞌacʉ̃ ye queti weremʉꞌtãrĩ masʉ̃ nígʉ̃ nisasami”, nima, nicãrã niwã.
29Beꞌro Jesú narẽ sẽrĩtiñaꞌnemocʉ niwĩ tja: —¿Mʉsã waro, yʉꞌʉre deꞌro wãcũti? nicʉ niwĩ. Cʉ̃ tojo nicã, Pedro yʉꞌticʉ niwĩ: —Mʉꞌʉ Õꞌacʉ̃ beseꞌcʉ Cristo niꞌi, nicʉ niwĩ.
30Pedro tojo níꞌquere Jesú ne ãpẽrãrẽ weredutiticʉ niwĩ.
31Tuꞌajanʉꞌcõ, cʉ̃ buꞌerãrẽ aꞌtiro ni buꞌenʉꞌcãcʉ niwĩ: —Yʉꞌʉ Õꞌacʉ̃ macʉ̃ masʉ̃ weronojõ upʉtigʉ pũrõ piꞌetigʉsaꞌa. Tojo nicã judío masã bʉcʉrã, paꞌia wiorã, Moisé ojaꞌquere buꞌeri masã yʉꞌʉre ʉatirãsama. Yʉꞌʉre wẽjẽrãsama. Na tojo weemicã, iꞌtia nʉmʉ beꞌro masãgʉ̃saꞌa, nicʉ niwĩ.
32Narẽ tʉꞌota basioro weremeꞌrĩcãꞌcʉ niwĩ. Tere tʉꞌogʉ, Pedro aperopʉ Jesure pijiwãꞌcã, tuꞌticʉ niwĩ.
33Beꞌro Jesú majãmiĩꞌa, cʉ̃ buꞌerãrẽ ĩꞌa, Pedrore tuꞌticʉ niwĩ: —Waꞌaya. Mʉꞌʉ wãtĩ weronojõ ucũꞌu. Mʉꞌʉ Õꞌacʉ̃ wãcũsere masĩweꞌe. Masã na wãcũwʉaronojõ wãcũꞌu, nicʉ niwĩ.
34Beꞌro Jesú cʉ̃ buꞌerãrẽ, tojo nicã masãrẽ pijio, werecʉ niwĩ: —Noꞌo yʉꞌʉre ẽjõpeosirutugʉnojõ cʉ̃ weesĩꞌrĩrõnojõ weeticãꞌto. Yʉꞌʉ ʉaro peꞌe weeato. Noꞌo yʉꞌʉre sirutusĩꞌrĩgʉ̃ “Jesure ẽjõpeogʉ, wẽrĩbosaʉ” nitigʉta sirutuato.
35Yʉꞌʉre ẽjõpeose meꞌrã ñaꞌarõ yʉꞌrʉsĩꞌrĩtigʉ, yʉꞌʉre ẽjõpeoduꞌugʉnojõ pecameꞌepʉ bajurionoꞌgʉ̃sami. Apĩ wẽjẽsere uiti, yʉꞌʉre ẽjõpeonuꞌcũgʉ̃nojõ peꞌe yʉꞌʉ meꞌrã catinuꞌcũgʉ̃sami.
36Niꞌcʉ̃ aꞌti turi cjase nipeꞌtisere wapataꞌa, cʉ̃ ejeripõꞌrã peꞌere bajuriogʉ, ¿ñeꞌenojõrẽ wapataꞌabosari?
37Pecameꞌepʉ waꞌagʉ, cʉ̃ ya ejeripõꞌrãrẽ deꞌro wee wapayewĩrõmasĩtisami.
38Aꞌti turicjãrã masã ñaꞌarõ weeri masã yʉꞌʉre ẽjõpeotirã nima. Na waꞌteropʉ yʉꞌʉre, tojo nicã yé quetire bopoyasãticãꞌña. Mʉsã bopoyasãcã, yʉꞌʉ Õꞌacʉ̃ macʉ̃ masʉ̃ weronojõ upʉtigʉ aꞌtiro weegʉsaꞌa. Aꞌti turipʉre yʉꞌʉ pacʉ asistese meꞌrã, cʉ̃rẽ werecoꞌterã meꞌrã apaturi aꞌtigʉ, yʉꞌʉ quẽꞌrã mʉsãrẽ bopoyasãgʉ̃saꞌa, nicʉ niwĩ.
