SAN MARCOS 6:10-40

¹⁰Namin ra̱hn Dihvo vo ri ye ihyan chahn: ―Adecotino va̱co ihyan na̱n che nevahnecun ye nchuhn ne, min cuahtenan ne nde tuno ro che nda̱ca ne ya̱n.

¹¹Ihyan ya̱n che hua ntumanecun ye nchuhn ma̱n, che hua ca̱hcovan ye che cuahndudo ne ma̱n ne, conda̱ca ne ya̱n va̱co ye, ne conda̱hde ne ya̱ca che chenan ca̱h ne, ca̱va che tihca̱ na̱hme ne ihyan che hua nda̱hca̱ redin ye. Cua̱co rá̱hn rí nchuhn te cuahn che a nda̱ ro che techeca̱de Dendiohs nunde yahn nducoya̱ca ihyan ne, tahque chuhrihn ihyan chahn che co ihyan ya̱n Sodoma ma̱n, ihyan ya̱n Gomorra ma̱n.

¹²Tuhme cuahn ihyan chahn rahndudo ye che nahn che nto ino ihyan nunde yahn ye.

¹³Namin retenda̱h ye a̱ma ya̱hn vaco chihnga̱ che chenun ihyan, ne racota̱hme ye aceite a̱ma ya̱hn ihyan cah, redin ye che rendoyahn ye.

¹⁴Ro min ne, a̱ma rente ihyan yahn vederihno che redin Dihvo vo, ne checadino rey Herodes. Tuhme ra̱hn rey me: ―A ntuche Jua̱n Bautista va̱n tena̱hn. A ihyan min che redin ye vederihno che tihchan.

¹⁵Na̱hn ihyan ne, ra̱hn ye te ihyan profeta Elías che quechica ye. Na̱hn tun ihyan ne, ra̱hn ye: ―Ihyan ca̱h ne, a̱ma ihyan profeta nduhca̱ ihyan profeta che chahte ye a ra̱hn me.

¹⁶Ate hua chitahno Herodes che rente ihyan chahn, ne ra̱hn se: ―Ihyan ca̱h ne, Jua̱n Bautista ihyan. A ihyan ca̱h che chihquentiyón sanda̱do che chihca ya̱n se da̱ndo ye. Ma̱n ne, a ntuche ye va̱n tena̱hn.

¹⁷Tihca̱ ra̱hn rey me, te a ma̱n se chihquentiyon se sanda̱do che din se preso Jua̱n, chaconuhn se ihyan va̱coya̱hn, dechiche se ihyan nduco cadena. Tihca̱ chahno chi Jua̱n, te tihca̱ nahn Herodías, ta̱hn nda̱hta yahn Felipe, sa̱hn min che dihno rey me. Rey me ne, ndere quenan se nduco te.

¹⁸A ra̱hn Jua̱n ri ye rey me: ―Hua nda̱hca̱ redin ne che quenan ne nduco nda̱hta yahn dihno ne.

¹⁹Nducote tihca̱ ra̱hn Jua̱n ri ye rey me ne, chemin che a̱ma nahn ca̱hno Herodías ihyan. Ate hua chi chihno te ihyan ura min.

²⁰Herodes ne, renevahnecun se Jua̱n, te a devano se te ihyan min ne, ihyan ndah ye, ndiyu ihyan nunde ye. Chemin che hua rahnecun se che ca̱hno te ihyan. Cuahn che rihnevan rey me che rente Jua̱n ne, andahre hua ndah renahn se, ate rihnevan se numacuahn vedeyeno.

²¹Ate nda̱ a̱ma ro che nda̱hca̱ chahno Herodías chi. Din rey me vihcoduche se, ne reca̱h se reh nducoya̱ca intiyahn yahn se ma̱n, ihyan ndina̱n yahn sanda̱do yahn se ma̱n, ihyan na̱hn che vate ye esta̱do yahn Galilea ma̱n.

²²Ura che a vate vihco ye ne, chenda̱ ta̱hn da̱ya Herodías, ndeh te, ne rey me nduco ihyan che vate ye reh ye nduco vih ne, a̱ma ca̱h yeno ihyan. Tuhme ra̱hn rey me ri se ta̱hn: ―Cuique adecodehno che nehn, ne té di.

²³Ca̱h se ndudo yahn se ta̱hn, ne ra̱hn se: ―Adecodehno che nehn, andahre ma̱hn va na̱n che rihquentiyón, té di.

²⁴Ndiquenda̱h te, ne cuahn te ca̱carune te chaco te, ne ra̱hn te: ―¿Deh ca̱cá? Ndahconan chaco te: ―Cuique tin Jua̱n Bautista.

²⁵Ndeta̱hno chenda̱ tun te na̱n che quenun rey me, ne ra̱hn te ri te sa̱hn: ―Ma̱n ne, náhn che te ne u meniyon tin Jua̱n Bautista chete a̱ma cuh.

²⁶Tuhme a̱ma chi ra̱n rey me. Ate nducote a ca̱h se ndudo yahn se ta̱hn na̱n nducoya̱ca ihyan che vate ye min nduco se ne, chemin che dinahn se ndudo yahn se.

²⁷A ura min no chihquentiyon se a̱ma sanda̱do che ca̱hn se ngua se tin Jua̱n.

²⁸Chahn sanda̱do me va̱coya̱hn, chihca ya̱n se da̱ndo Jua̱n. Quenda se tin ye chete a̱ma cuh, ne ca̱h se ta̱hn. Ta̱hn min ne, quenda te ca̱h te chaco te.

²⁹Cuahn che checadino ihyan che chinduco ye Jua̱n te a chih ye ne, chahn ye chengua ye ihyan, ne chihche ye ihyan.

³⁰Adive ne, ndaconan ihyan apóstol chahn, ndo da̱ma ye nduco Dihvo vo, ne neca̱h cuande ye ihyan nducuahn che din ye ma̱n, nducuahn che chicuahn ye ma̱n.

³¹Tuhme ra̱hn Dihvo vo ri ye ihyan chahn: ―Cuhn vo nduco nchuhn a̱ma cua̱n na̱n che dema̱n, cuahtetuhno vo tah. Tihca̱ ra̱hn ye, te a̱ma ya̱hn ihyan, ihyan che renda̱ ye ma̱n, ihyan che rena̱hn ye ma̱n, ne nde che cheh ye hua rinun yahn ye.

³²Tuhme quenun Dihvo vo chete a̱ma ba̱rco nduco ihyan apóstol chahn, ne cuahn ye a̱ma cua̱n na̱n che metah duhva.

³³Ate a̱ma ya̱hn ihyan ndihchero ye che cuahn ye, ne nchana̱n ye ihyan. Tuhme chica ihyan chahn ya̱n va̱co ye, ne rica ca̱h ye, cuahn ye cua̱hn na̱n che cuahn Dihvo vo, nde tahque nun nda̱ ye min.

³⁴Cuahn che ndiquenda̱h Dihvo vo chete ba̱rco me ne, a̱ma ya̱hn ihyan ndida̱ma ye. Quenan va̱hino ye ihyan chahn, te nduhca̱ itecuche che metah duh che redin cuda̱do ite ne, tihchan ye. Tuhme cana̱n Dihvo vo, chicuahn ye ihyan a̱ma ndeh na̱n dehtenduh.

³⁵Cuahn che a chi chino me ne, nda̱ ihyan apóstol chahn na̱n Dihvo vo, ne ra̱hn ye ri ye ihyan: ―Muhn ne, ya̱hn na̱n che metah duhva, ne ma̱n ne, a chi chino.

³⁶Cuedechuh ne ihyan sih cua̱hn ya̱n che nino, ca̱va che cua ye che cheh ye, te muhn ne, metah deh che cheh ye.

³⁷Ra̱hn Dihvo vo ri ye ihyan: ―Nchuhn coca̱h ne, cheh ihyan sih. ―Tumerune ihyan chahn ihyan: ―Nahn o ciento tume denario che cua nuhn pa̱n, cheh ihyan sih. ¿A nahn ne che tihca̱ din nuhn ne?

³⁸Tuhme ra̱hn Dihvo vo ri ye ihyan chahn: ―¿Ta̱va pa̱n va yahn nchuhn? Cuahn ne quendihchero ne. Cuahn che ndihchero ihyan chahn ne, ra̱hn ye ri ye ihyan: ―Va uhn pa̱n nduco o ya̱hca.

³⁹Dechuh Dihvo vo ihyan apóstol chahn che ca̱hma ye nduco nducoya̱ca ihyan che cuahte ye na̱n yune cue, coda̱ma ye a̱ma a̱ma cua̱n nduco vih.

⁴⁰Tihca̱ dinahn ye, ne a̱ma o cua̱n ne, chahte a̱ma ciento ye, ne ta̱ma te o cua̱n ne, chahte o raco ndiche ye.