San Lujc 1:8-61

⁸Tijb dxej ni bayal ree bixhioz noꞌch Zacarías loj, been reeman sirv loj Dios,

⁹ziꞌc na̱j xcostumbr ree bixhioz guin, gudxijt reeman suert din guidoon chu yayal gudxeꞌ goxyaal lën yadooroꞌ Jerusalén, abiꞌ bayal Zacarías cuꞌman goxyaal guin.

¹⁰Laꞌtgaj caguꞌman goxyaal guin, gra ree bejn rigaꞌ luleꞌ cabejdx canab reeman Dios.

¹¹Dxel balüüloj tijb xianjl Dios loj Zacarías, zaꞌliman xladbee altar lod cayu goxyaal guin.

¹²Chi baguiaa Zacarías anjl guin, ad badxejlt xhie nüjnman, dád bidxebaman.

¹³Per rëb anjl guin: ―Zacarías, ad rdxebil ma bacaagdiajg Dios ni gunabil. Chuꞌ xiꞌn xbéngunaal Elisabet, gaquix xinguiaaw abiꞌ yaguꞌl lajx Waj.

¹⁴Yabaa daꞌtil, në zien ree bejn yabaa chi galix,

¹⁵guial gaquix xin lasajc loj Dios. Ad zëꞌtix vin niꞌqui ni gusüdx laax. Abiꞌ diizd chi gadix gal mal zaꞌnë xSprijt Dios laax.

¹⁶Por laax zien ree bén Israel yayejc loj xDad reeman Dios.

¹⁷Laax ned lojman, chuꞌ xSprijt Dios luxdoox gap tëëx guialrniabee ziꞌc Elías, bén badëë xtiidx Dios loj ree bejn, yabeꞌcdxex bén na̱j ree dad con xiꞌn reeman, gulüü tëëx bén ad ruzoobt ree diidx din guzuxnejzix bejn ree guidxgaꞌ reeman laaman chi guiꞌtaman.

¹⁸Dxel rëb Zacarías loj anjl guin: ―¿Xhienaag gagbeen guial gac cumplid ni nal? Din naj con da béngunaan ma nayajcan bengol.

¹⁹Badxiꞌ anjl guinan rëbaman: ―Naj na̱j Gabriel, rünan sirv loj Dios, laaman guxhaal naj zidnëꞌn diidxzaꞌc guie lojl.

²⁰Per yan guial ad bililadxtil da diidxan, yayaꞌnl gop ad zajct guinieel xt guidxin dxej gal xindo guin.

²¹Guiáad ree ben rigaꞌ luleꞌ guin cabëz reeman Zacarías yuꞌ nawëëg reeman guial cayaglaaman lën yadoo guin.

²²Chi bariiman ad rajctri rnieeman, gaz sen rüjnman guial ma bayaꞌnman gop. Dxel gogbee reeman guial yuꞌ xhie baguiaaman lën yadoo guin.

²³Zianz bazaꞌ ree dxej ni been Zacarías sirv lën yadoo guin, dxel zia lidxaman.

²⁴Chi gudëd ree dxej guin, guyu xiꞌn xbéngunaaman Elisabet. Gaay bëëw tib guyuzaman lënü, rëbaman:

²⁵“Ze na̱j ni beennë Dios naj lën ree dxej guie chitëë guzeꞌri ree bejn naj.”

²⁶Ni goc xhoꞌp bëëw, guxhaal Dios anjl la Gabriel luguiedx Nazaret ni rigaꞌ niz Galilea,

²⁷din chignajman tijb biinxdüb lam Li. Ma na̱j tiaꞌ tijb xin la Xiëb laam, xin zëëd loj xdiaa rey Davi.

²⁸Guyu anjl guin lod yuꞌ Li abiꞌ rëbaman: ―¡Xchan Li, Dios ma gulej lüj! Dios zaꞌnë lüj, ma beenleꞌ tëëman lüj loj gra ree béngunaa.

²⁹Chi baguiaa Li anjl guin dád badxa lojm guial rëbaman zian, abiꞌ gunabdiidxim xhie rën guiëb ree diidx guin.

³⁰Dxel rëb anjl guin: ―Li, ad rdxebil din lüj gule Dios beenleꞌ tëëman lüj.

³¹Chuꞌ xiꞌnl, abiꞌ chi galaman yaguꞌl lajman JESÚS.

³²Laaman gac bén zojbloj, guiniee ree bejn laaman Xiꞌn Dios bén yuꞌ xanyabaa. Güün dux Dad ree Dios laaman rey ziꞌc goc xdiaagulalaman Davi,

³³din nabeeman bén Israel ree xt goctëëz, abiꞌ xguialrniabeeman ad yuꞌt dxej loxan.

³⁴Dxel rëb Li loj anjl guin: ―¿Xhienaag chuꞌ da xiꞌnan awa achut bénguiaaw nabannëꞌn?

³⁵Badxiꞌ anjl guinan rëbaman: ―Por xSprijt Dios chuꞌ xiꞌnl, abiꞌ xguialrniabee Dios bén yuꞌ xanyabaa gusiaawan guijquil con xbalan. Zeel xiꞌnl bén gal, gacaman naya nali abiꞌ guiniee ree bejn laaman Xiꞌn Dios.

³⁶Ziangajc lasaꞌl Elisabet ma yuꞌ xiꞌnman, majsi ma najman bengol, bén rëb ree bejn ad zajct chuꞌ xiꞌn, per yan ma gojc xhoꞌp bëëw yuꞌ xiꞌnman.

³⁷Din Dios graczi zajc güünman.

³⁸Dxel rëb Li loj anjl guin: ―Dios na̱j bén rniabee naj, gacza ziꞌc rënman. Ziat anjl guin.

³⁹Lën ree dxej guin wej Li cari daꞌt tijb guiedx ni rigaꞌ la̱d ree guiaꞌ niz Judea,

⁴⁰dxel guyum lënü lidx Zacarías, bagajpdiozim Elisabet.

⁴¹Chi biguiejn Elisabet chaꞌm cugajpdiozim laaman, laa baniib gajc xindobëz yuꞌ lënman, dxel guyu xSprijt Dios luxdooman guidiblagaa.

⁴²Abiꞌ gunee Elisabet rejs, rëbaman: ―¡Dios ma beenleꞌ lüj loj gra ree béngunaa, beenleꞌ tëëman bejndobëz yuꞌ lënl!

⁴³¿Chuza najn zeel zidganaj xniaa da Diosan naj, bén rniabee?

⁴⁴Din biguiejnzan chaꞌl bagajpdiozil naj, laa baniib gajc da bindoon lënan guial babaam.

⁴⁵Xiquilbaal guial bililadxil, din gac ziꞌc bagojn Dios lüj.

⁴⁶Dxel rëb Li: Ruzatan Dios zagdxe,

⁴⁷rabaanëꞌ tëën laaman, guial ragnëman naj.

⁴⁸Guial baguiaaman naj, majsi biin rüjnzi sirv lojman naj. Abiꞌ diizd yan xt goctëëz guzaꞌt ree bejn naj, guiëb reeman xiquilbaam.

⁴⁹Din Dios, bén rniabee, dád zroꞌ na̱j ni ma beennëman naj. Naya naliman.

⁵⁰Ad rbëzt rayaman graczi ree bén ruzoob xtiidxaman.

⁵¹Zroꞌ na̱j ni ma beenman con xguialrniabeeman. Baseꞌnman xixgab ree bén rüjn benroꞌ,

⁵²biquiedaman guialrniabee loj ree bén rniabee, guiáad loj ree bén ad zojblojt badëëman guialrniabee loj reeman.

⁵³Badëëman guialnazaꞌc loj ree bén biaadx guialraw, guiáad ree benrijcw basaꞌnman laa reeman zezi.

⁵⁴Gognëman bén Israel ree, xbejnman, abiꞌ ad bayanladxtaman nayaman laa reeman,

⁵⁵ziꞌc rëbaman loj dux béngulal ree, Abraham në loj ree xdiaaman.

⁵⁶Abiꞌ bayaꞌnnë Li Elisabet cost choon bëëw, dxel baguiaj lidxim.

⁵⁷Chi bidxin dxej gojl xiꞌn Elisabet najx xinguiaaw.

⁵⁸Abiꞌ gogbee ree lasaꞌman në ree bén zojb gajxh guial baya Dios laaman, dád babaa reeman bignaj reeman laaman.

⁵⁹Chi ma gojc xindobëz guin toxman, dxel binë reeman laax guyux sen ni ru ree bén Israel. Abiꞌ guyën reeman naguꞌ reeman lajdoox Zacarías ziꞌc la xdadix,

⁶⁰per gunee xniaax, rëbaman: ―Ad zayutan zian. Rayal gaquim Waj.

⁶¹Dxel rëb reeman lojman: ―¿Chexquiza zeel gaquix Waj? Achut ree lasaꞌl la zian.