San Lucas 8:12-35

¹²Miwara ɨmmikane Dios pit mɨmtu. Sunkana sun urain Satanáne kanpat kit Dios pit kaijchuras, ayuktas, ukkamtu, awa Dios pit nɨjkulamanpa, Dios usparuza watsat mɨlnamanpa.

¹³Mamaz pippane uk pilpara taiztu. Uk pilpara ɨmturuzne Dios pit mɨat kit watsal kulat kit sappara. Mujtɨt waj chi akwa, ɨrattukimain Dios pit mɨarawane, uspane Dios pit mainñamtu, Satanás usparuza kwail kininnashimtu akwa.

¹⁴Mamaz pippane pu pilpara taiztu. Pu pilpara ɨmturuzne Dios pit mɨara. Uspa kal akwa, pial pashiara akwa, watmin uzshiara akwa, pippane Dios pitkanain kunkain. Dios pit pippakanain kwayarɨm.

¹⁵Mamaz pippane wat pilpara taiztu. Dios pit mɨarawane, uspane Dios pit kwisha wat kaijchura watsamtu, pippa waanakima.”

¹⁶“Putmumikane alampara tɨmkasa paltakain, tãn kɨhkasa tamajarukasa paltakain. Sunkana putmumikane alampara kwash kanmu, napmuruz kai izanapa. Sunkana awane Dios kamtamtu aizpa piankamanazi.

¹⁷Mamaz payura awane wan puintɨt aizpa nɨjkulanazi. Awane chiwazha sɨptɨt aizpa piankamat kit kai izanazi.

¹⁸Katmizna, watsal mɨrain. Akkwan kamtumikane an akkwan piankamnazi. We kammumikane us mintu aizpa, us mɨj aizpa, karɨnazi.”

¹⁹Jesúspa akkuhshkas aimpihshtuzkas ussa kashain aara. Akkwan awa akwa, ussa izarachi.

²⁰Mamazne kainara: —Up akkwakas up añaruzkas pianamal kunat kit nua izshiamtu.

²¹Usparuza sɨnkanara: —Ap akkwakas ap añaruzkas pianamal kunamtukas, nane uspawa ap kwalkanain mintuchish. Wan Dios pit mɨmturuzkas Dios kaizta aizpa kimturuzkas ap akkuhshkana mai, ap añakana mai.

²²Maza payune Jesúskas paiña kammuruzkas kanuara waara. Sua usparuza ka kaiznara: —Aiz pi kwakara ɨzhain. Suasne ɨara.

²³Aiz pi paizkara ɨamtuasmin, Jesúsne pittɨt tuazi. Tɨnta inkwa pira pamɨzta. Pine kanuara palakpɨnmɨzta. Kanua pira unainapain.

²⁴Suasne uspane ussa ɨat kit izkulninnat kit kaizara: —Kamtam. Kamtam. Pi kwanapainmakpas. Jesúsne kuhsak kit kaizta: —Inkwane, kari. Pine, kialmun, kizta. Inkwane karɨt. Pine kalpain parɨt.

²⁵Suasne kaiznara: —¿Nɨjkultuchimakkiwas nawa? Uspane ishkuat kit iztaspaat kit usparuzpain ka kizara: “¿Mɨnma kai sunne? Jesús inkwarakas pirakas kaiz kit ɨninkane, inkwakas pikas ussa mɨmtu.”

²⁶Galilea suras puzarawane, uspane Gerasa sura kwakkaara.

²⁷Jesús kanuaras kihsh kit pilta kuntawane, maza pɨpuluras awane, saliz pizarɨt ampune, ussa wanmalta. Akkwan payurakima pĩn kwaarachi. Yalta uztachi akwa, pantióntain tuazi.

²⁸Jesústa iztawane, usne kwian kit ussa wakpuj wain kit ka kaizta: —¿Nawa chima kinash? Katsa Diosne chiyura uz. Nune Dios Painkul i. Nane nua paikumtus, nawa naizninmanpa, kizta.

²⁹Jesús saliztuza puztain kizarakas, salizne sunkana kaizamtuazi. An ñamin sun saliztuzne ussa akkwan piji piztɨt. Awane paiña chihtɨkas mittɨkas cadenakasa kantɨt mɨjazi, ussa watsanpa. Kantɨtkas, usne cadena pakalta, usmin chɨhkulnapa. Suasne salizne ussa pul surakima, awa tuchira, mɨltɨt.

³⁰Suasne Jesúsne salizta mɨmara: —¿Une chi mun? Usne sɨnkara: —Akkwan mun makpas, ka kizta. Akkwan saliztuzne ussa pizarɨt.

³¹Uspane ussa paikuara: “Ainkih kulta aumɨza ɨninmun.”

³²Akkwan kuzune ainki ɨzamamim kumira sait kuamtu. Uspane kuzuruza napna paikuara. Jesúsne usparuza chɨhkara, kuzuruza nappanapa.

³³Suasne saliztuzne ampuras puzat kit kuzuruza pizara. Wan kuzuruzne malpara ãĩn kihshat kit pira taizara. Wanne pi kwaarɨt.

³⁴Sun kit aizpa izarawane, kuzu izmuruzne ishkuat kit sun kwinta pɨpuluras awara, nantas awara, kainana ɨara.

³⁵Sun awane pɨpuluras puzara, sun kit aizpa izana. Uspane Jesústa aat kit an ampura izara. Jesúsne an ampuras saliztuza puzninnara. Sun ampune Jesús panakin uz kit pĩn kwat kit wat minta. Uspane ishkuara.