SAN LUCAS 1:2-66

²jo fa tsaꞌen yakuyani̱ xi ꞌndani nga tutsꞌinre ko fa tuxkun tsabenii̱ ꞌba xi kitsaꞌexare nga kitsikjaꞌaxtiuya enre Naꞌenna.

³ꞌBa jaskan nga je nda tsiningiya yajaa̱ jó fa kuán ꞌndani nga tutsꞌinre, nda= tjin ngatꞌana̱ ngayeje nga tsja fani tsaꞌen siꞌindura̱ kui tsajmibi ji xuta chinga Teófilo,

⁴tuxi nda xiani ngatꞌare kjuakixi xi je kisakuyari.

⁵Nixtjin nga Herodes reyre nangi Judea kuán, ꞌba nde kio tijña jngu naꞌmi xi Zacarías ꞌmi, xi tu jngu xutare Abías. ꞌBa chjunre Elisabet ꞌmi, jngu xi ntjere Aarón.

⁶ꞌBa ngojó ꞌñu nda kixi ngixkun Naꞌenchana, ꞌba tsajain xi kiskaninejere, ngatꞌa ꞌñu nda tsikꞌetjusun yeje enre ko kjuatexumare Naꞌenchana.

⁷Tunga bi tjinre kiꞌndi, ngatꞌa Elisabet ꞌndi=; ꞌba je ne chinga koni ngojó ngayeje.

⁸Ngu jngu nixtjin nga Zacarías ko xi ñatjen tsaꞌexa tsꞌakore nga saꞌexa joni naꞌmi ngixkun Naꞌenchana,

⁹ꞌba jotsaꞌen je ngare naꞌmi, tu Zacarías fa tsꞌakore nga kui xi kjuaꞌasꞌen ngaꞌnde tsjere ningu nga kuakare tjingusja Naꞌenchana.

¹⁰ꞌBa yejerañu titi tjingusja, ngatsiꞌi xutankjiun inya ngandetsin ningu nga inyafako Naꞌenchana.

¹¹ꞌBa kio, Zacarías kuatsejenre jngu ankjere Naꞌenchana, xi sejña nduju ngate kixire yamixa ña tisun tjingusja.

¹²ꞌBa Zacarías tu ꞌba= kuánre nga tsabe ankje, ꞌba ꞌñu kitsakjun.

¹³Tunga ankje kitsure: —Zacarías, bi kuin, ngatꞌa Naꞌenchana je kjintꞌe nga kichukue, ꞌba chjunri Elisabet sꞌe̱re jngu kiꞌndi xiꞌin xi tsiji xi Juan kꞌuin_ri.

¹⁴ꞌBa ꞌñu tsja ku̱anri, ꞌba nde ꞌñu nkjin xuta ku̱atsjare ngayeje nga tsin,

¹⁵ngatꞌa kiꞌndiri ꞌñu je ku̱an ngixkun Naꞌenchana. Bi kꞌui binu ninga xan ꞌba tse Isennixtjintsjere Naꞌenchana ngajinre kui kionga kje tsinjín.

¹⁶ꞌBa saꞌen nga ꞌñu nkjin xuta xi naxinanda Israel tseꞌe kjuaꞌe ngani ngixkun Naꞌenchana xi Naire mani.

¹⁷ꞌBa kui sejñajinre isennixtjinre ꞌba ko kjuaꞌñure profeta Elías. Kui kuajetitjunre Naꞌenna, ꞌba saꞌen nga xi xicha ma ko xi kiꞌndi ma nda kuaꞌa ngani xinkjin, ꞌba nga xi xtan sikꞌantjaiya kjuafaꞌetsjenre tuxi ku̱anire sikꞌetjusun. ꞌBa ꞌbitsaꞌen sikꞌejñanda naxinando nga skjebetjo Naꞌenna —kitsu ankje.

¹⁸ꞌBa Zacarías tsiningiyare ankjebiu: —¿Jótsaꞌen skuekixiña̱ kibiu? Ngatꞌa je ne chingaa̱, ꞌba chjunna̱ ngayeje.

¹⁹ꞌBa ankjebiu kitsingojore: —An Gabriel= ña̱, ꞌba ngixkun Naꞌenchana tejñaa̱; ꞌba kui kitsikasenna̱ nga kjuakora̱ ji ꞌba xinra̱ en xi nda.

²⁰Enna̱ kꞌuetjusun nixtjin nga tjinnere nga ꞌba ku̱an. Tunga ngatꞌa bi kuakjainri en xi kixinra̱, ku̱anima=ni ꞌba bi ku̱an kuinukjuai ꞌnda nga ku̱an yeje kibi.

²¹ꞌBa yejerañu, xutankjiun inya ngandetsin ningu nga inyakuyare Zacarías ꞌba tu ꞌba= kjimare nga tjiꞌbandayare nga tjiꞌbetju.

²²Tunga kionga tukjiaꞌa ꞌetju, ꞌba bi ma fako xuta xi kio tjindu; ꞌba ꞌbatsaꞌen kuankjinre nga tjin xi kuatsejenre ngaya ngaꞌnde tsjere ningu, ngu tu chuba= tsaꞌenre ko ntsja nga fako. ꞌBa tojo bi kuán kinchja.

²³ꞌBa nga Zacarías je kitsijngu xare joni naꞌmi, kiji ngani ndaba.

²⁴ꞌBa bi ꞌñu nkjin nixtjin jaꞌa, ꞌba Elisabet xi chjunre kisꞌeyaꞌmore kiꞌndi, ꞌba ón sa bi ꞌetju ndaba. ꞌBa kitsu:

²⁵“Naꞌenna ꞌbi kitsaꞌen ngatꞌana̱ nga jaꞌanimara̱, tuxi kjuaꞌaxinni kjuasuba xi tjinꞌinna̱ ngatꞌare xi yakꞌa.”

²⁶Kionga je jaꞌa jon sa, Naꞌenchana kitsikasen ankje Gabriel jngu naxinandare nangi Galilea xi Nazaret ꞌmi.

²⁷ꞌBa kui kikun jngu chjun xungu xi María ꞌmi xi je tijñangi kjua nga kuixanko jngu xuta xi Kuse ꞌmi, xi ntjere rey David.

²⁸ꞌBa ankje jaꞌasꞌen ngaꞌnde ña María tijña, ꞌba kitsure: —Tsiteꞌndara̱ ji xi je kisakuri kjuandare Naꞌenchana. Kui= tijñakori. ¡Ndari ji ngajinre ngatsiꞌi yanchjin!

²⁹ꞌBa nga María tsabe ankjebiu ꞌba kjintꞌe enre, kuakunre ꞌba miningiyare yojore mé= xi tsunire kjuateꞌndabiu.

³⁰ꞌBa meni ankjebiu kitsu nganire: —María, bi kuin. Ngu je kisakuri kjuanda ngixkun Naꞌenchana.

³¹Ngandaꞌe nde kiꞌndi sꞌe̱yaꞌmori: sꞌe̱=ri jngu kiꞌndi xiꞌin, ꞌba Jesús kꞌuin_ri jaꞌenre.

³²Kui jngu xuta xi ꞌñu je ku̱an, ꞌba Kiꞌndire Naꞌenchana xi tijña ngankꞌaa kꞌuinre. Naꞌenchana saꞌen nga kui rey ku̱an joni rey David xi xuta chingare.

³³ꞌBa kuatexumantsjaire naxinandare Jacob, ꞌba kjuatexumare bi kjuetꞌa —kitsu ankjebiu.

³⁴ꞌBa María tsiningiyare ankjebiu: —¿Jótsaꞌen ku̱anni kibi? Ngu bi tjinna̱ xiꞌin.

³⁵ꞌBa ankjebiu kitsingojore: —Isennixtjintsjere Naꞌenchana kjuendejenneri, ꞌba kjuaꞌñure Naꞌenchana xi tijña ngankꞌa kueꞌmori ko nkꞌianre. Kui kjuañu kiꞌindi xi tsin tsje ku̱anni, ꞌba Kiꞌndire Naꞌenchana kꞌuin.

³⁶ꞌBa nde Elisabet, xi xingi, sꞌe̱re jngu kiꞌndi ngayeje, ninga je chinga. Kui xi ꞌndi kikꞌinre tsakaiñu je jon sa nga kui tjiꞌyamore kiꞌndi.

³⁷Ngatꞌa tumé naꞌenre ngatꞌare Naꞌenchana.

³⁸ꞌBa ꞌbatsaꞌen María kitsu: —An chuꞌndare Naꞌenchana= ña̱. Ngatjama ngatꞌana̱ jotsaꞌen ji je kikꞌinnaa̱. ꞌBa kionga je ꞌbi kitsu María, ankjebiu kiji ngani.

³⁹Kui nixtjinbiu, María tsikꞌejñanda ꞌba ꞌñu kitsa kiji jngu naxinandare nangi Judea xi tijñajin ngijñacha.

⁴⁰ꞌBa jaꞌasꞌen ndaba Zacarías ꞌba kitsiteꞌndare Elisabet.

⁴¹ꞌBa nga Elisabet kjintꞌe kjuateꞌndare María, kiꞌndiu kitsiteya ngaya ngatsꞌa, ꞌba kui kitse Isennixtjintsjere Naꞌenchana ngajinre.

⁴²ꞌBa meni ko jngu jnda xi ꞌñu, kitsu: —¡Naꞌenchana ngisa ꞌñu kitsichikuntaꞌenri ko mare ngatsiꞌi yanchjin xi yakꞌa, ꞌba kitsichikuntaꞌen kiꞌndi xi sꞌe̱ri!

⁴³Tunga, ¿ꞌyá= nina̱ an, nga nare Xuta chingana̱ kjuaꞌekunna̱?

⁴⁴Ngatꞌa nga kjintꞌia̱ kjuateꞌndari, taꞌa kiꞌndina̱ kitsiteya ko kjuatsja ngajinna̱.

⁴⁵¡Á ndaniri ji xi kuakjainri nga ku̱ajngu en xi Naꞌenchana kitsuri!

⁴⁶ꞌBa meni María kitsu: Nga ko fani inimana̱ tsichji_ra̱ Naꞌenchana,

⁴⁷ꞌba tsitsjaa̱ ngatꞌa tseꞌe Naꞌenchana xi tsikꞌangina̱.

⁴⁸Ngatꞌa je jaꞌanimara̱, an xi chuꞌnda nimare kuán, ꞌba ꞌndani ngandaꞌe xuta kuetsuntsjaina̱: “Á ndaniri ji.”

⁴⁹Ngatꞌa xi ꞌñu tjinre kjuaꞌñu ꞌba xi tsje je kitsaꞌen tsajmi yaꞌe ngatꞌana̱.

⁵⁰Kui faꞌanimare xuta xi bekun, xi kisꞌe ko xi tjin ko xi sꞌe̱.

⁵¹Yakutsejen kjuaꞌñure nga kitsaꞌen tsajmi yaꞌe, ꞌba kitsitsojoya xuta xi nkꞌa ꞌbaxje yojore.

⁵²Jaꞌaxinre kjuaꞌñure xi rey, ꞌba nkꞌa kitsikꞌendu xi ni̱ma̱.

⁵³Ko xi nda kitsitsere xi tsajainre xi chine, ꞌba xi nyina tu tjejen ntsja nga ꞌete.

⁵⁴Tsakaseko naxinanda Israel, xi xuta chuꞌndare, ꞌba bi kichiyajinre nga kjuaꞌanimare

⁵⁵jotsaꞌen kitsuyatitjunre xuta chingana Abraham ko ntje xi jaskan sꞌe̱re kitsu María.

⁵⁶ꞌBa María jánru sa tsikꞌejñako Elisabet, ꞌba jaskan kiji ngani ndaba.

⁵⁷Kionga je echu nixtjin nga Elisabet sꞌe̱re kiꞌndi, kisꞌere jngu kiꞌndi xiꞌin.

⁵⁸ꞌBa kionga xi ndai niꞌyare ko xi xinkjin kjintꞌe nga Naꞌenchana jaꞌanimare Elisabet, ꞌba nde kitsitsjako.

⁵⁹ꞌBa xi majinni nixtjin, kuañajan tsiꞌi nga kitsaꞌen circuncidar kiꞌndiu, ꞌba kuamejénre nga jaꞌenre naꞌenre kuaꞌa, nga Zacarías kꞌuin.

⁶⁰Tunga nare kitsu: —Junjun. Juan kꞌuin.

⁶¹ꞌBa kikꞌinre: —Tunga niꞌyá xi xingi ꞌba ꞌmi.

⁶²ꞌBa ꞌbatsaꞌen tu chuba= kitsaꞌenre nga tsiningiyare naꞌenre kiꞌndiu, tuxi skueni mé= jaꞌen sjare.

⁶³ꞌBa Zacarías tsiꞌa jngu yate chi tuxi siꞌinduni ꞌba ꞌbitsaꞌen kitsiꞌindu: “Juan kꞌuin.” ꞌBa ngatsiꞌi xi kio inya tu ꞌba= kuánre.

⁶⁴ꞌBa ndekuini chubabiu Zacarías kuán kinchja ngani ꞌba ꞌetutsꞌinre nga kitsichjire Naꞌenchana.

⁶⁵ꞌBa ngatsiꞌi xi tjindu tiña ndaba kuakunre, ꞌba ngayéje ngaꞌnde tseꞌe Judea kjiꞌyare mé= xi kuán.

⁶⁶ꞌBa ngatsiꞌi xi ntꞌere enbi ꞌejin kakun, ꞌba ꞌbitsaꞌen miningiyare yojore: “¿ꞌYá= tsé ku̱an kiꞌndibi kionga ku̱achinga? Ngatꞌa kjuaꞌñure Naꞌenchana tijña ngajinre.”