San Lucas 13:2-27

²Mag ichig jaaubaicheewaita Jesuu amag, —¿Pãrau khĩirjuawai, mag Pilato soldaaunau dau augjã chukhu khëchpʉ̈itarr khʉʉn warm khʉʉn agjö Galileapienkha thʉnʉm khãyaujã atcha khaibag pöm sĩsid aawaita mag am khëchpʉ̈ijim khai? ajim anʉm jũrr amag.

³Mag gaaimua khabajim, mamʉ mua pãrag jaaukhimgui ajim anʉm: Pãrauta chadcha pãach khaibag thumaa ãsie ewag khĩirjuwia Ẽwandamag chugpaapi jëeubam chan pãachjã dʉ̈i khëchjurau ajim anaabá, amachigcha.

⁴¿Wa pãrau khĩirjuawai, ar thʉrrdö Siloé aajem igaau di pöm sĩerr burrwai õor dieciocho khëchtarr khʉʉnta tagam khʉʉn Jerusalén phöbör ee naajem khʉʉn khãyaujã iekkhõr pömaacha naajĩwa ajim anʉm, Ẽwandam dau na?

⁵Mag amach appaita Ẽwandam dakhĩir iekkhõr pömaacha narr gaaimuajã khabajimgui ajim anʉm, deeu ichdëupai. Ẽwandam dakhĩran thum ich agjö thʉnʉm, nem khaibag. Pãraujã ĩchab pãach khaibag thumaa khĩirjuwia Ẽwandamag chugpaapi jëeubam chan pãach thum ni ãbjã peerdʉbamgui ajim anaabá.

⁶Mag jaau dichwia ichdëupai mʉg nem ĩgkhaa amag jaaujim aajem: ’Woun ãbmua ich uvadö ee nemjõ igo anʉm jĩir wai sĩejim aajem. Khãai ãb jõm khõchag aadeewai aar oon majim anʉm. Mamʉ mag oon maawai bʉ̈ʉrjã chëba sĩi ë meuu dʉnaajim anaabá.

⁷Magbaawai di aig pachëwia magjim anʉm, chi nemjĩir jaarjemʉg: “Igo jõm khõchgau año thãrjup pam sĩi aar oo khʉrrkha chirʉm; mamʉ chëba sĩerraawai gaai ooimaba aajem. Jãgan jãg sĩpí warag thubapʉ̈i” ajim anʉm. “Magba par chëbam jãg sĩejemgui” ajim anʉm.

⁸Magbaawai, “Patrón jöoi, magan idëu año ãb oo athá” ajim anʉm, chi nemjĩir bʉ̈ phʉajem wounau. “Jãg sim khai, mua warag ag bʉ̈khʉrr wa phʉʉrdʉpʉ̈inaa phʉichichagau i bʉ̈ khuajugui” ajim anʉm, “chëmkhĩir.

⁹Mag bʉ̈ khuabaawai chëmʉn ʉ̈uma” ajim anʉm. “Mamʉ mag bʉ̈ khua nʉmjã ich magpai chëba abarmʉn magan chadau thupʉ̈ijugui” ajim anʉm, chi bʉ̈ jaarjemua.

¹⁰Biek ãb jua ʉ̈i nʉm ed Jesuu Ẽwandam iek jaau sĩejim aajem, judionaan ãba biirdʉwia Ẽwandam iek jaaujem deg.

¹¹Maig ʉʉi ãb sĩejim aajem. Mag ʉʉi mor machpawia dieciocho años sĩi jã bʉrëu khitaajeejim anaabá, bën khaigbam i mor ee dubwia. Magtarr aigmua pöd bʉ̈ʉrjã phõ khajapha thʉrrkhaba ich mag khitaajeejim anʉm.

¹²Jesuu mag oo athaawai dau ee aug khaugwia, i thʉ̈r aunaa irig,

¹³“Mua pʉ monaaukhim” anaa, i ʉ̈r jua ausĩubarm bʉ̈rre phõ thʉrrkha khajappha oo dʉnʉisijim anaabá, monakkha. Mag ich monaaubapäaiwai onegau Ẽwandamag, “Ẽwandam, ĩsin chadau pua mʉ ʉ̈uta abarm. Pʉjö jua theegkham chan mʉg jẽb gaai chukhum. Ʉ̈u abarmgui” ajim anʉm.

¹⁴Mamʉ magbaawai mag amach ãba biirdʉ nʉm ag degam chi pörkha sĩerr Jesús dʉ̈i meeukhabaadëwia jũrr khĩir mor chigpai õragta, —Seman gaai seis diaspai phidkhaju aai nʉmgui ajim anʉm. Mag seis diam een chadau pãadëu bëewia pãach monaaupibat ajim anʉm. Mamʉ oob mʉg sĩi jua ʉ̈i kheeujem ed khabajupama ajim anʉm.

¹⁵Magbaawaita maach Pör Jesuu irig magjim anaabá: —Woun sëunem, ¿khantheeta pʉ mag chitʉ́ma? ajim anʉm. Pãar mag jua ʉ̈ʉijem ed bʉ̈ʉrjã phidkhaba aajem anʉmta, ¿khan jãgwia pãrau pãach cabaai wa phak khãijã dö döpien phë arrjẽma? ¿Jãg nʉm chan magan phidkha nʉm khabahab? ajim anʉm.

¹⁶Pãrau pãach nemchaainjã mag dö döpi khʉrrkha nʉmta, ¿khan jãgwia mʉg ʉʉi ĩchab warrgar jöoi Abrán khararrau ʉ̈khaajerr ag Ẽwandam gaai ʉ̈kha simta pöd i monaauju khaba sĩ, jua ʉ̈ʉijem ed awia? Jãg sim aig ijã ĩchab dieciocho años meperau i pʉrnaa ö jʉ̈ wai simjö simta ẽerpʉ̈i nʉm khabahab ajim anʉm, jãg bënëu i ogdʉpʉ̈imkhĩir.

¹⁷Jesuu mag amach öbeerbapʉ̈im ũrwia i oomapha aajem khʉʉn thum chigaa aphöbaadëjim anaabá, amachta. Mag am chigaa nʉm ee, tagam khʉʉn thum aig narr khʉʉnau amach daúa Jesuu mag nem wau sim oo nʉm gaaimua onee nʉm iekhau Ẽwandamag, “Ʉ̈u chadcha pua marag pʉch jua theeg oopibarm Ẽwandam; ag na marau mʉgjö chan nem ooba aajemgui” a iekha naajim aajem.

¹⁸Mag iekhakhagmamua ĩchab magjim anʉm ich Jesuu: ’¿Pãrau khaphʉ nʉ, jãga sim abarí Ẽwandam iek mua jaau chitʉm, maimua khanjöta sim a mua pãrag jaaubarkhiin? ajim anʉm.

¹⁹Magnaa ichdëupai, Mʉg Ẽwandam iekhan mostaza daudam woun ãbmua ich nemjĩir ee jĩirjemjöta sĩerrʉm. Ichta nemjĩir daudam thumaam khʉʉn khãyaujã bʉ̈rʉʉcha khitʉm. Mamʉ mag khitʉmʉn nem bãau khaphí bãauwia sĩi pabʉ̈ pöm ãdëe dʉnʉisiejemgui ajim anʉm. Mag ãdëe dʉnʉisiewai nemchaaindamau ag gaai amach didam ëuphöbaadeejem. Ich agjöta simgui ajim anʉm ĩchab mʉg Ẽwandam iek mua pãrag jaau chitʉmjã. Mʉʉgwaiwe chan khapan khabata ʉ̈kha durrum; pari mag durrumuata warag nem pöm aaidʉbapäaiwai, õor khapankham khʉʉnau ʉ̈khajugui ajim anʉm.

²⁰Maimua deeu ichdëupai amag, ’Pãrau khĩirjuawai ¿jãga sim abarí Ẽwandamau ich iek aaidʉpi nʉm, maimua jũrr khan dʉ̈ita mua pãrag jaaubarkhiin? ajim anʉm.

²¹Ich iiu aawai ich iek aaidʉpi nʉmʉn, ʉʉi ãbmua arin dʉ̈rrcha sim ee levadura pʉ̈itarrjöta sĩerrʉmgui ajim anʉm. Levadura bʉ̈rʉʉ pʉ̈itarrjã maadëu aaidʉmam chan ooba aajem; mamʉ mag simuan arin thum ʉrpi aaujem. Ich agjöta simgui ajim anʉm ĩchab Ẽwandam iek mʉg mua jaau chitʉmjã. Mʉʉgwaiwe chan õor pöm mʉg wëjöm ee agtha pömcha aaidʉba sim. Mamʉ mʉg atagta durr warpham magwe aaidʉbaadee thumaam khʉʉnau ũrab khaba ũrjugui ajim anʉm, ich Jesuucha.

²²Jesuu ich mag Ẽwandam iek jaau nʉrraajeejim aajem phöbörpierr, didam khapan khaba dʉnʉnʉidʉm eem magwe ich nʉrrʉmpierr. Mag mamua warag Jerusalenag maa ajim aajem.

²³I mag nʉrrʉm ee ãbmua irig, —Señor, ¿ʉ̈gthar öbërju khʉʉnta khapanaacha nʉ wa okhooju khʉʉnta khapanaacha nʉwa? ajim anʉm. Magbaawai Jesuu irig,

²⁴—Ʉ̈gthar öbëraagan, puertdidam bʉ̈rʉʉ khitʉm ee dubaagpamjöta aajemgui ajim anʉm. Muan pãragan, mag puertdidam phĩrkhi khitʉm eeta dubju ẽkhabat a chirʉm. Mʉg atag õor pöm ag ee dubam khõsi ajup mamʉ, mag thʉnʉm khʉʉn eem ãbjã pöd dubbajugui ajim anʉm.

²⁵Pãrau dubaag ẽkhawiajã ya chi dikhʉ jöoyau phãarbapʉ̈im chan, par pãrau daaugajãrmua, “Señor, maar weeu athá” awiajã, jũrr ierrmua irua pãrag, “¿Pãar jamaam khʉʉnauma? Pãar chan mʉ aiguim khʉʉn khabamgui” aju, warag weeu aubaju aawai.

²⁶Magbaawai pãach weeu aumkhĩir, pãrau irig magjurau: “¿Pua maar khaugbata chirʉ́? Maar pʉ dʉ̈i ãba thach khoojerr khʉʉn khabahab. Pʉ khabajieb maar maestro. Pua ante maar phöbör ee Ẽwandam i jaauba aajeejieb” aju irig.

²⁷Mamʉ magbaawai irua ĩchab pãrag magju: “Ya mua pãrag jaaubarm. Mua chan tag pãar khaugbam. Pãach sĩi nem khaigbam appai wau wënʉrraajerr khap, pãadëu warag pãachta mʉ aigmua chawag ërëubaadët” a iekhajugui ajim anʉm, Ẽwandamau pãrag.