Lucas 13:2-27

²Jesús nzhé lo re xaa: —¿Cho kwaan nzak gu? ¿Che nzak gu mas nzebra re xaa ne jwalt ke stub naz re xaa Galilea, zee sbaa mle xaa xaa?

³Lee na nii lo gu, nanakta sbaa; nu chelee re gu nalaat naletra gu kwaan nawent nu wii gu lo Dios, sbaaka noka re gu yet.

⁴Nu, ¿cho kwaan nzak gu? Leezha mla yoo ndok tich chiimchon xaa tub pa le Siloé zee ngut re xaa. ¿Che nle re gu xgab nzebra re xaa jwalt ke stub naz re xaa Jerusalén?

⁵Bare na nii na lo gu, nanakta sbaa; nel chelee re gu nalaat gu re kwaan nawent kwaan kale gu nu nawiit gu lo Dios, sbaaka noka re gu yet.

⁶Zee lee Jesús mzaa stub kwent nabix ne lo re xaa nu nzhé xaa: —Tub xaabyi nzo tub xan yag ig leen xleyo xaa pa nzhaan xaa. Nu ngukwaan xaa xle loya, per nyent xle loya.

⁷Zee nzhé xaa lo re xaa nkee zhiin lo xaa: “Wii, nzhala chon liin nzekwaan na ig lo yag ne, per nik tub welt zer yizhal na xle loya. Bchooga nal, zee naleta tras leen xleyo na.”

⁸Per lee xaa nkee zhiin lo xaa nzhé: “Xaa nabeyy, blaaya stub liin. Nal le nzhul naya nu ko na bon xana,

⁹cheleeya zaaya xle stub liin, wena; per cheleeya nazaata xle zee choog naya.”

¹⁰Jesús kaseed re xaa zhe sab, mbizh kwaan nzholl re xaa Israel lo Dios, pa nkasa re xaa Israel nseed xaa xtizh Dios.

¹¹Nu baa nzo tub ngwnaa, me nzhala chiimchon liin nded me bid lo tub mbi mal kwaan nanlaat nli tich me.

¹²Gorna ngune Jesús lo me, zee mrezh xaa me, zee bii me gax lo xaa nu nzhé xaa lo me: —Ngwnaa, nal gorne lee lu yakwen lo yalyizh cheen lu.

¹³Nu mzhib xaa yaa xaa cho me, nu leeka gorzee lee tich me ta mli nu mzelo me mbill me lo Dios.

¹⁴Lee xaa nabeyy pa nkasa re xaa nseed xaa xtizh Dios mzhaal xyan, nel ngune xaa lee Jesús msekwen ngwnaa ne zhe sab. Zee nzhé xaa lo re xaa nzhi baa: —Xop mbizh nkee xaa zhiin tub sman, zee yiid gu zee sekwen xaa gu. Per nanzhaalt yiid gu zhe sab, zee sekwen xaa gu.

¹⁵Zee lee Jesús nzhé lo xaa nabeyy pa nkasa re xaa: —¡Gu nak xaa nkade nu nanlet gu kwaan wen! ¿Che nanxekt gu xngoon gu nu xburr gu zhe sab, zee yisego gu ma nis?

¹⁶Nu lee ngwnaa ne, me nak dii cheen Abraham, ¿che nyent mod zhe sab xek be me lo yalyizh kwaan mkado Maxuu me nzhala chiimchon liin?

¹⁷Gorna ngulo nzhé Jesús kwaane, rese xaa mnayii ne Jesús mton, per lee re myet nix doo ngok lextoo xaa ngune xaa re kwaan gro kwaan mle Jesús.

¹⁸Zee lee Jesús nzhé lo re xaa: —Nal za na stub kwent nabix ne zee ne gu xomod nak pa nabeyy Dios.

¹⁹Leeya nak kwenta tub bizh cheen mostas kwaan mgaan tub xaa xleyo xaa. Mlena nu ngoka tub yag, nu lee re mbyin mdexkwaa xlaaz ma lo re ram cheena.

²⁰Noka nzhé Jesús: —Nal lee na za stub kwent nabix lo re gu zee ne gu xomod nak pa nabeyy Dios.

²¹Leeya nak mod lebadur kwaan ngo tub ngwnaa leen chon medid arin, zee yixooba.

²²Jesús mseed re myet xaa nzho re yezh gro nu re yezh win gorna nzhaze xaa nzha xaa naz Jerusalén.

²³Nu lee tub xaa mnabdizh lo xaa nu nzhé: —Xaa Nabeyy, ¿che nazyent xaa le gan yalnaban kwaan tira? Zee lee Jesús nzhé lo xaa:

²⁴—Bseyezh gu yek gu zeeb gu pwert nanyag, nel wlipa na nii na lo gu, zyen doo xaa nzhekla zeeb pwert, per nyent mod zeeb xaa.

²⁵’Nu gorna lee xaa nak li yoo, zoli saaw roo yoo, lee re xaa lake naz jwer kwezh roo yoo nu yé xaa: “Xaa Nabeyy, xal roo yoo zeeb nu”. Zee keb Xaa Nabeyy lo xaa: “Nanlabeyyt na gu nu nixa nanet pa naz nze gu”.

²⁶Zee lee re gu yé lo xaa: “Re nu ndaw kwaan lu, nu lu nak xaa mseed re sawlazh nu leen naz”.

²⁷Per lee xaa né lo gu stuba: “Nanlabeyyt na re gu. Bachii re gu lo na, xaa nzeb jwalt.”