San Juan 6:8-26

⁸Na' sto beena' nak Jesúza' txen lie' Andrés, beṉ' bish' Simón Pédrona', chi'ene':

⁹―Ni ze to bi' xkwid' no'ab' gay' yetxtil de cebada na' zi c̱hop beḻ. Per bizə daa par yog' beṉ'ki.

¹⁰Na'ch Jesúza' chi'e: ―Ḻi yee yog' beṉ'ka' kwe'gake'. Na' dechga yixdo' gana' lle'gake', na' yog'tie' wche', na' to beṉ' byoka'zə gok ka do gayaa mil.

¹¹Na'ch bex̱' Jesúza' yetxtilka', na' bi'e Chioza' yeḻ' chox̱ken, na' bgone' c̱he c̱he beṉ'ka' nakgake'ne' txen na' ḻegake' be'gake' c̱he yog' beṉ'ka' chi' na' ax̱t ka beljgakile'. Na' ḻekzka' bene' c̱he beḻka'.

¹²Na' ka beljgakile', na'ch chi'e beṉ'ka' nakgake'ne' txen: ―Ḻi yitop yog'ḻoḻ dii lao'ka' bichooṉan kwenc̱he bibi gakditj.

¹³Na'ch bitopgake'n, biyakte shlliṉ xet' diika' bichooṉan lao yetxtilka' gay'.

¹⁴Na' ka ble'i beṉ'ka' yeḻ' waka' daa ben Jesúza', na'ch che' ljwellgake': ―Dii ḻi beenin nake' beena' llia bia' yid yell-lioni kwenc̱he c̱hix̱ji'e daa che' Chioza'ne'.

¹⁵Na' daa gokbe'i Jesúza' cheengakile' yic̱he'gake'ne' kwenc̱he wzoagake'ne' iṉabi'e ḻegake', bicheje' ladje'ka' na' wyepe' toze' zi lat' cha'ch lo yaana'.

¹⁶Ka ba chaḻ, beṉ'ka' nak Jesúza' txen biyetjgake' cho'a nisdo'na'.

¹⁷Na' biyoogake' to ḻoo barkw kwenc̱he ziyajgake' yell Capernaúma'. Ba goḻ na' biṉ' yillin Jesúza' kwite'ka'.

¹⁸Na'ch wzolo wzechga be'na' na' wzolo chas chat' nisdo'na'.

¹⁹Na' ka do gay' wa x̱op kilómetro ba wza'len barkwa' ḻegake' lo nisdo'na' kat' ble'gakile' Jesúza' zeje' tlo nisdo'na' zjatiḻe' barkwa' na' ḻe bllebgake'.

²⁰Na' Jesúza' chi'e ḻegake': ―Nad'kzan, ¡bi illeble!

²¹Na' chibagakile' bigoogake'ne' ḻoo barkwa', na' lii bllintekzgake' gana' chwiagake' illingake'.

²²Na' betiyo gokbe'i beṉ'ka' bigaaṉ shḻaa nisdo'na' nan tochga barkwa' got' na' to beṉ'ka' nonz Jesúza' txen biyoogake'n na' bi len Jesúza' biyoolene' ḻegake'.

²³Na' gaozə gana' wdaogake' yetxtilka' ka wde be' X̱ancho Jesúza' Chioza' yeḻ' chox̱ken, bllin sto c̱hop barkw dii za' yell Tibériaza'.

²⁴Na' ka gokbe'i beṉ'ka' aga no Jesúza' nḻa' ni beṉ'ka' nakgake'ne' txen, na'ch biyoogake' ḻoo barkwka' ziyajgake' Capernaúma' jadiljgake'ne'.

²⁵Na' ka bllingake' shḻaa nisdo'na' jadi'gake'ne', na' gollgake'ne': ―Maestro, ¿bat biyedo' ni?

²⁶Na' Jesúza' chi'e ḻegake': ―Dii ḻi nia' le', chiyiljle nad' aga daa wyajni'lati'le bi zejin yeḻ' wakka' benan', san daa wdaozle ax̱t ka beljilen.