João 6:8-26

⁸Imepỹ Jezu poetory moroto kynexine, Ximão Peturu akorony, esety Ãtare. Ynara tykase ynororo Jezu a,

⁹—Poeto napyryme rokẽ enepyhpyry seny, 5me tiriiku panõ risẽ pisarara, kana roropa asakoro. Ise awahtao ekarõko ase oya. Moxiã ke, imoihmãkomo? Oty kehxo moxiã atautuhmãko nah? tykase Ãtare.

¹⁰Mame ynara tykase Jezu, —Imoihmãkõ iporohkapotoko, tykase typoetory tomo a. Mame onahpoty kurã pona typorohkapose toto. Typorohse toto emero porehme. 5.000me toto tuhke aexirykomo, orutua kõ rokene. Nohpo tõ roropa tuhke kynexine.

¹¹Morarame tiriiku panõ risẽ tapoise Jezu a, —Kure mase Papa, tykase ynororo. Mame tokamose iporohtyamo a. Tuhke tomãkapose eya. Morararo kana tomãkapose roropa eya. Tõtuhse toto emero porehme. Tuesapare toh toehse.

¹²Tõtuhkehse toto ahtao emero porehme, ynara tykase Jezu typoetory tomo a, —Moxiã napyry akoĩpyry anỹtoko ropa kana akoĩpyry maro, atahnikara aehtohme, tykase Jezu eya xine.

¹³Mame 12me ruto tanỹse eya xine tonahsẽ akoĩpyry ke pehme.

¹⁴Morarame Jezu jamitunuru eneryke tyya xine ynara tykase imoihmãkomo, —Ajohpe pyra, urutõ nymyry mosero, Ritonõpo nenyokyhpyry sero nono pona. Kyneraximahpyrykõ mosero, tykase toto.

¹⁵Morarame orẽpyra tutuisarykõme tyriry se imoihmãkõ exiryke toesyryhmase ropa Jezu toiroro ypy pona.

¹⁶Morotoino kokonie pukuro toehse ahtao ipoetory tõ toytose ikuhpo pona Jezu eraximase repe.

¹⁷Yrome tykohmãse ahtao, Jezu oehpyra ro kynexine. Morara exiryke kanawaka tõtyrise toto Kapanaũ pona toytotohkõme.

¹⁸Okynã pyra tyryrykane konõto toehse. Pohkane konõto toehse roropa.

¹⁹Koeh tykase toto okynã repe, tyryrykane itamurume exiryke. Morarame ikuhpo rãnao toto ahtao Jezu tonese eya xine. Tuna poro ytoytõko kynexine. Tyya xine aepyry eneryke tõserehse toto itamurume.

²⁰—Oserehpyra ehtoko. Ywy ase Jezu, tykase ynororo eya xine kanawaõkomo a.

²¹—Otyriko, tykase toto eya. Mame tõtyrise ropa Jezu kanawaka, toto kãnary aka. Mame axĩ toeporehkase ropa toto pata pona, Kapanaũ pona.

²²Yrokokoro imoihmãkõ moroto ro toh kynexine, Jezu a tonahsẽ emãkapotopõpyry po ro. Tõtuhtopõpyrykõ po roropa toh kynexine. Toemynyhmase toto Jezu poko, aytory onenepyra tokurehse toexirykõke. Ipoetory tõ ytory rokẽ tonese eya xine.

²³Moroto nakuatao imehnõ kãnary rokẽ tonese eya xine, Tiperiati poe aehtyã kãnary.

²⁴Mame Jezu onenepyra toexirykõke moro kanawae toytose toto Kapanaũ pona Jezu enese ropa.

²⁵Mame tonese ropa Jezu ahtao, tõturupose toto, —Otara ahtao hkoh moepyase ropa? tykase toto eya.

²⁶Ynara tykase Jezu eya xine, —Zae rokẽ ourutorỹko ase. Tõtuhse oexirykõke sã rokẽ jupĩko mexiatose, tuesapare toehse oexirykõke sã rokene. Yrome Ritonõpo poe jexiry onenetupuhpyra matose.