San Juan 5:9-32

⁹San nima non tlakatl owalpajtik, okajkok ipetl iwa onéjnenki. Non tonati okatka sábado ijkuak mosewia n judíos.

¹⁰Pero n tlayakankeh judíojteh okilijkeh n tlakatl non opajtik: —Axa sábado, mach weletis tikmamas mopetl.

¹¹N tlakatl okinnankili: —Akin onechpajti inewia onechili: “Xikajkokui mopetl iwa xiajti.”

¹²Ijkuakó okitlajtlanijkeh: —¿Akin omitsili: “Xikajkokui mopetl iwa xiajti”?

¹³Pero n tlakatl non opajtik mach okimatia akin okipajti, porke ompa okatkah miakeh tlakah iwa n Jesús ayakmó ompa okatka.

¹⁴Okachi satepa Jesús okajsito n tlakatl kan Weyi Tiopa iwa okili: —Techkaki, ken axa yotipajtik, ayakmó oksepa xitlajtlakolchiwa, porke weletis mitsajsis ok se kokólistli okachi temojti.

¹⁵N tlakatl oyá, iwa okinmatiltito n tlayakankeh judíojteh Jesús okipajti.

¹⁶Yika, n tlayakankeh judíojteh okitotojtokayah n Jesús porke okinchiwaya ninteh milagros itech sábado.

¹⁷Pero Jesús okinmili: —Notajtsi nochipa tekiti, yika Ne noiwa nitekiti.

¹⁸Yika, n tlayakankeh judíojteh okachi okinekiah kimiktiskeh, iwa amo san por okixpanawiaya n sábado yej porke noiwa okijtoaya Dios Itajtsi, kemi yetoskia Ye noiwa Dios.

¹⁹Jesús noiwa okinmili: —De milajka, de milajka nomechilia: Ne Akin Ni Tekone amo niweleti nikchiwa itla, san Ne noselti, yej nikchiwa tlan nikita kichiwa Notajtsi. Porke nochi tlan Notajtsi kichiwa Ne noiwa nikchiwa.

²⁰Iwa Notajtsi nechtlasojtla iwa nechititia nochi tlan Ye kichiwa, iwa okachi wejweyi milagros nechnextilis para nomechtlajtlachialtis.

²¹Porke ijkó kemi Notajtsi Dios kinyolitia non yomikkeh, ijkó noiwa ikone n Dios kinmaka yolílistli akimeh Ye kineki kinmakas.

²²Porke Notajtsi amaka kiyolkuitia, yej onechmák nochi itlanawatil para Ne maniteyolkuiti,

²³para nochteh n tlaltikpaktlakah makiweyijkachiwakah Ikone Dios ijkó kemi kiweyijkachiwah Dios. Akin amo kiweyijkachiwa n tekone, amo kiweyijkachiwa Dios akin okualtítlanki.

²⁴'De milajka, de milajka nomechilia: akin kikaki notlajtol iwa kineltoka Notajtsi Dios Akin onechaltítlanki, ye kipias yolílistli non ayik tlami iwa amaka kitlajtlakoltis. Kijtosneki yomiktoka pero axa ya kipia nemílistli non ayik tlami.

²⁵De milajka, de milajka nomechilia: ajsitiwits n ora, iwa yoajsiko, ijkuak non yomikkeh nechkakiskeh Ne Akin Ni Tekone de Dios, iwa akimeh nechkakiskeh yolitoskeh.

²⁶Ijkó kemi Notajtsi inewia kipia yolílistli, Ne Ikone noiwa onechmák weletílistli para maniktemaka yolílistli.

²⁷Noiwa onechmák tekiwájyotl para manitetlajtlakolti, Ne Non onimochi ni tlakatl.

²⁸Amo ximotlajtlachialtikah, porke ajsiki n ora ijkuak nochteh non yomikkeh iwa tooktokeh kikakiskeh itlajtol.

²⁹Iwa kisaskeh de inmiketekochwah. Akimeh okichijkeh tlan kuali, moyolitiskeh iwa mach ok ayik mikiskeh, iwa akimeh okichijkeh tlan amokuali, moyolitiskeh para kinyolkuitiskeh.

³⁰'Ne amitla weleti nikchiwa san tlan notech kisa. Ne nitetlajtlakoltia ijkó kemi Notajtsi Dios nechnawatia, iwa nitetlajtlakoltia kemi moneki, porke mach nikchiwa san tlan ne nikneki, yej nikchiwa tlan kineki Notajtsi Akin onechaltítlanki.

³¹Tla nomechiliskia san tlan kisa itech ne, tlan nikijtoskia amitla ipati.

³²Pero onka ok se akin tlajtoa de Ne, iwa nikmatok nik tlan Ye kijtoa de Ne milák.