San Juan 4:6-40

⁶Ruy ná bzia ni rniideb, bzia xte Jacob. Ne cun Jesús abdxany cazany ax guriny ruu bziaqui zéedti gac laidxi.

⁷Chiy de xpɨnny güedeb láani guɨdxqui par güesiideb ni iquiindeb. Horqui ax bdzɨny tuby gunaa Samaria ruu bziaqui zeldeeb nis, ax raipy Jesús laab: —Bguaad nare duudx nis.

⁹Per cun de bniety Israel quɨt rchaatideb de bniety Samaria, ax cuaby gunaaqui lony: —Bɨny Samaria nare ne, ¿xílesani rnaabbiu nis luaa ne bniety Israel laabiu?

¹⁰Chiy raipy Jesús laab: —Belrulati racbiiu ni rcaaz Dios inɨɨdxny liú, ne belrulati racbiiu tú canaab nis liú, liú snaabu nis nare ne nare snɨɨdxa liú nis ni rguaad guelnabány.

¹¹Chiyru raipy gunaaqui Jesús: —Dad, niclɨ quɨt xi caabiu par cuéebiu nis, ne bziac quesentiand guétni. ¿Calílesa chacáabiu nis ni rguaad guelnabány?

¹²Bziac desdɨ to xpɨngulnɨ Jacob bsannény dunnɨ, ne lagac nisquɨ bquiinbɨ ziyza de lliinbɨ cun de ladxaa xtendeb. Anre, ¿tatix mazru sacbiu que laab?

¹³Chiy raipy Jesús laab: —Irate de ni rée nisquɨ rdxágacdebni stuby.

¹⁴Per elquɨ ni guée nis ni ideeda, quɨtru chúuti dxi idxábni. Te pur nis ni ideedab zacni nez láanbɨ zec tuby rut quɨt rbezti rachy nis, ax anapbɨ guelnabány par chazy.

¹⁵Chiyru raipy gunaaqui laany: —Dad, bguaadbiu nare nisqui par quɨtru ibíiti idxaa nis, niclɨza quɨtru guedldéetiani ruc.

¹⁶Jesús raipy laab: —Quegüetɨdx chialu, chiyru gueedu.

¹⁷Gunaaqui ax cuaibbɨ: —Quɨtti chiala. Chiyru raipy Jesús laab: —Guldícu quɨtti chialu

¹⁸te pur aguc gaay chialu ruu, ne anre bniety ni rbezníu niclɨ gati chialu racbɨ. Pur ningui, didxldíc ná ni rniiu.

¹⁹Chi bindiag gunaaqui ziy, ax raipbɨ laany: —Dad, rdxaluaa dec laabiu nábiu tuby profet xte Dios.

²⁰De to xpɨngul gulalnɨ quia danyquɨ btodeb Dios, per laat ni nát bniety Israel rniit dec Jerusalén ná par iton Dios.

²¹Jesús ax cuaibny: —Gunaa, güeldilaaz nare dec teru idzɨny dxi ni itot Xtadnɨ Dios sin quɨt gueedtit niclɨ quia danyquɨ niclɨza Jerusalén.

²²Laat niclɨ quɨt gántɨ tú rtot. Per dunnɨ nanchuun tú rton te pur lo de bniety Israel zá ni gún perdón bniety.

²³Ne anacre abdzɨny dxi ni irate de ni guldípac rto Dios, stodebny zec ni riáld pur Spíritu Sant xtenny. Te pur ziy rcaaz Xtadnɨ Dios gún de ni rto laany.

²⁴Dios ná Spírit ne de ni rto laany ná par itodebny dibyquia dibylaazdeb pur Spíritu Sant.

²⁵Chiyru raipy gunaaqui Jesús: —Nare nánna dec ná par gueed Mesías ni láza Crist. Ne chi gueedny laany quixteeny lon irate.

²⁶Jesús raipy laab: —Nareniy Crist ni rzeetu, laaniy caninény liú.

²⁷Horqui ax bdzɨny de xpɨnny ne bdxalodeb pur ni cayuenény tuby gunaa diidx. Per nic tubydeb quɨt ninabdiidxti laany xi rcaaz gunaaqui, o xiy cayueedeb.

²⁸Chiy gunaaqui bsáanacbɨ rii xtenbɨ ruu bziaqui, ax zégacbɨ láani guɨdx rut güegatsbɨ de bniety:

²⁹—Gultaguiaa tuby bniety ni agunii naa irate ni abaania. ¿Ladxa gati laabɨy Crist?

³⁰Chiyru bdiiadeb láani guɨdxqui par güedeb rut zuguaa Jesús.

³¹Per lalzi ni zé gunaaqui láani guɨdxqui, de xpɨny Jesús raipdeb laany: —Maistrɨ, bquiinbiu.

³²Per laany raipny laadeb: —Nare a ni iquiinia rápa, per quɨt gántit xa náni.

³³Ax guzulo rnabdidxsaa de xpɨnny: —¿Ladxa nuu ni bdeed xi bquiinny?

³⁴Chiyru raipy Jesús laadeb: —Guelrquiiny xtena ná gúna zec ni rcaaz Dios ni bxiaald nare, ne yaloza gúna ni guniiny gúna.

³⁵Laat rniit: “Rieedx stap búiu par sulo gac de cosech.” Per nare rniia laat: Guldiaslo, gulguiaa lo de yáan aguld idopni.

³⁶Ne bniety ni rtopni, rcáab ni riáldbɨ pur dzɨɨny ni runbɨ. Chiy de cosech ni rtopbɨ a ná par rut nuu guelnabány par chazy. Ziy xquel ax zeclɨ ni rzibinni ne zeclɨza ni rtopni tubylote rzaclaazdeb.

³⁷Didxldíquɨy ni rnii bniety: “Irɨny ni run dzɨɨny chiy irɨny ni rtop de guelnazaac.”

³⁸Nare bxiaalda laat par chatoptɨ de guelnazaac rut niclɨ quɨt baantit dzɨɨny. Irɨnquɨ de ni baany dzɨɨny, chiy laat güetop, güetopzit de guelnazaac rut baandeb dzɨɨny.

³⁹Zieny de bniety Samariaqui güeldilaaz Jesús pur xtiidx gunaaqui, chi raipbɨ laadeb: “Aguniiny nare irate ni abaania.”

⁴⁰Pur ningui, chi bdzɨny de bniety Samariaqui rut zuguaa Jesús ax banlasdeb lony par suguanény laadeb. Chiy guzuguanény laadeb tiop dxi.