San Juan 4:4-51

⁴Hane ndiya xi cjui me jan ne, tjin xi cuatju me ngujo nandya tsëhë distritu Samaria.

⁵Hya xi camá ne, cafehe me ngu nandya tsëhë distritu Samaria xi hmí rë Sicar, ngu nandya xi tacun tiña tsëhë nangui xi casua Jacob quihndi rë me José jemu hatsëë camahani.

⁶Hane cahndë́ vëhë ne, tacun ngu ndava nandá xi casahmi Jacob. Hane tsëhë xi jemu cafenda rë Jesús tsëhë ndiya xi nduva me ne, quiji me cavéjña me hiscan ndava nandá jan. Sacuaha chuva rë nchisen xi cafehe me jan.

⁷Hora vëhë ne, canduva ngu na samaritana, canduva jaha na nandá. Hane cuitjin cachja Jesús cojo rë na: ―‍Tuhun hitsë nandá cuëhë. ―‍Cuatjin cachja me.

⁸Hora vëhë ne, tsajin xuta ladu rë Jesús ta nandya quiji me xi cuatsë me xi sinë me cojo Jesús.

⁹Ngajan xi na samaritana jan ne, cuitjin cachja na cojo Jesús: ―‍Ngayun xi xuta tjë rë Israel ngayun ne, ¿hacutjin má xi tichjahyun ná nandá, ngahan xi na samaritana ngahan ni? ―‍(Cuatjin cachja na ta, tsëhë xi xuta tjë rë Israel ne, hatuxa tsinguisihinjñii me cojo xuta samaritana.)

¹⁰Ngajan xi Jesús ne, cuitjin cafayangui me tsëhë na: ―‍Sa xi ngayun hyun cjuatjo xi Nina sua me hacuaha hyun yo ngahan xi tifehya nuju nandá ne, ngahan cachjahyun ná nandá, hane ngahan casuá nuju nandá xi sua cjuahñu. ―‍Cuatjin cafayangui Jesús.

¹¹Hane na vëhë ne, cuitjin cachja na: ―‍Tatá, peru ndava nandá vi ne, jemu nungun, hane tsajin quichuhun mé xi naxun cojo nandá. ¿Jani naxun nandá xi sua cjuahñu vë ni?

¹²Xutachanga naja Jacob casua niji me ndava nandá vi. Hacuaha cojo me cojo quihndi rë me cojo chu rë me cahvi me nandá tsëhë ndava nandá vihi. ¡Ja! Peru ¿há hitsë sa matitjun ngayun xi cuma rë me vëhë ni? ―‍Cuatjin cachja na.

¹³Hane xi cafayangui Jesús ne, cuitjin cachja me cojo rë na: ―‍Yëjë ni xuta xi hvi me nandá vihi ne, cuma xinda nga rë me.

¹⁴Peru xuta xi cuihi me nandá xi suá ngahan ne, hatuxa ha quihndë tsajin nu tsajin nixtin xi cuya cumaxinda nga rë me ta nandá xi suá ngahan ne, cuma sacuaha ngu nandá xi ña vangatë xi sua rë me cjuahñu xatsë. ―‍Cuatjin cachja me.

¹⁵Ngajan xi na vëhë ne, cuitjin cachja na cojo Jesús: ―‍Tatá, tuhun ná hitsë nandá xi nújun vë, cojo sa xi cumaxindaain ná hacuaha ha quihndë cuinduvaan jaha nandá. ―‍Cuatjin cachja na.

¹⁶Hane Jesús ne, cuitjin cachja me cojo rë na: ―‍Tángun chjuhun xihin nuju, sehe nduvuncujun me nguehe. ―‍Cuatjin cachja me.

¹⁷Ngajan xi na vëhë ne, cuitjin cafayangui na: ―‍Tsajin xihin naha. ―‍Cuatjin cafayangui na. Hane cuitjin cachja Jesús cojo rë na: ―‍Ndaja nújun xi tsajin xihin nuju ta

¹⁸hñú cha xi cavinechuncujun, hane cha xi nechuncujun quihndë ne, hacuiin xihin nuju cha. Canújun cjuaquixi. ―‍Cuatjin cachja Jesús cojo rë na.

¹⁹Ngajan xi na vëhë ne, cuitjin cafayangui na: ―‍Tatá. Xi má ná ne, ngayun ne, ngu profeta ngayun.

²⁰Xutachanga niji ne, nguehe ndetjún vihi canduva cafaharcun me Nina. Hane ngayujun ni xuta nangui rë Israel ne, nújun ta Jerusalén ne, ngajan tacun cahndë́ xi meje rë xi cjue chjahárcun rë Nina. ―‍Cuatjin cafayangui na.

²¹Ngajan xi cachja Jesús cojo rë na cjua vihi: ―‍Ngayun chjuun, catamacjain nuju cjua xi cuichjá vi: cuechú nixtin xi hacuiin ndetjún vihi hacuiin Jerusalén chjuhunrcun Nina Nahmi naja.

²²Ngayun xuta samaritano ne, chjuhunrcun Nina, peru hyúun me xi ndandaja. Ngayin ne, ha hyinndijin Nina ta, tsëhë xi me xi cuaxëtje rë xuta ne, cuetjujñi me ngajñi niji ngayin xuta nangui Israel.

²³Cuechú nixtin o ha hisca cavechú nixtin xi xuta xi cjuaquixi xi faharcun me Nina Nahmi naja ne, Hasen rë Nina cuisecoo rë me xi cjuaharcun me Nina cojo cjuaquixi. Ha cjuaquixi ta xuta xi cuatjin sahmi me ne, me vëhë xi meje rë Nina Nahmi naja xi cjuaharcun rë me.

²⁴Nina ne, Hasen me. Hane xuta xi faharcun rë me ne, hatuxa meje rë xi Hasen rë Nina cuisecoo rë me xi cjuaharcun me Nina cojo cjuaquixi. ―‍Cuatjin cachja Jesús.

²⁵Hane chjuun jan ne, cuitjin cachja na cojo Jesús: ―‍Ngahan ne, ha hvë xi cuinduva Me xi Tsingatju Nina, me xi hmí rë Cristu. Hane hya xi cuinduva me vëhë ne, suacuenda naja me yëjë ni cjuatacun. ―‍Cuatjin cachja na.

²⁶Ngajan xi Jesús ne, cuitjin cachja me cojo rë na: ―‍Ngahan xi tichjá cojo nuju vi ne, ha ngahan xi nújun vë. ―‍Cuatjin cachja me.

²⁷Hane hora vëhë cavuya xuta ladu rë Jesús xi quiji jaha me comida. Hane jemu quijircun rë me xi cavëë me xi visiajmi Jesús cojo rë ngu chjuun. Peru hisca ngu me xi cuacun vë cavinenguisiin me cuitjin: “¿Mé xi meje nuju?” o “¿mé xi visiajmu cojo rë na?” Cuatjin camá.

²⁸Chjuun jan ne, cavejña na nisa rë na, sehe cavuya quiji na nandya, hane cuitjin cachja na cojo xuta:

²⁹―‍Nduvun cuanguen chutsejen ngu me xi cachja cojo ná yëjë xcusun xi casahme. ¿Hacuiin hacui me vëhë xi Tsingatju Nina? ―‍Cuatjin cachja na.

³⁰Hya xi camá ne, cavetju xuta quiji me cojo rë na hiscan quitahá Jesús.

³¹Jinguyëjë rë ne, xuta ladu rë Jesús jan ne, cuitjin cachja me: ―‍Maestro, xinu niñu. ―‍Cuatjin cachja me.

³²Peru Jesús ne, cuitjin cafayangui me: ―‍Ngahan ne, ha tjin xi sínë xi ngayun ne, hyúun mé jan. ―‍Cuatjin cafayangui me.

³³Ngajan xi xuta ladu rë Jesús jan ne, cuitjin cavinenguise xicjin me xingu xingu me: ―‍¿Há cuma cacun sa xi tjin yo xi cafehe cani xi cajinë me? ―‍Cuatjin cavinenguise xicjin me.

³⁴Hane Jesús ne, cuitjin cachja me cojo xuta ladu rë me jan: ―‍Jemu chuya rë xahasen naja xi chinë niñu. Peru ngahan ne, hitsë sa chuya rë xahasen naha xi sahme sacuatjin meje rë me xi catsingatju ná, hacuaha hitsë sa chuya rë xahasen naha xi tsinguíjnetaha xa xi casua ná me.

³⁵Chja ngu cjua ta: “Chaja sa ñuju sá, sehe tjunihnga rë xitjë.” Peru ngahan cuichjá cojo nuju ta chutsujun xuta ta, tsëhë xi tangun me cojo xitjë xi ha camacha, ha cuma tjunihnga rë.

³⁶Me xi tivunihnga xitjë ne, ha tifaha me chji rë me, cuma cuinújan ne, tisahmi tangun me xuta xi sacú rë xuta xi cuacun vë cjuahñu xatsë. Cuatjin tijima cojo sa xi tangun cuiyujusua me xi vincha tjë cojo me xi vunihnga xitjë.

³⁷Quixi cjua xi chja xi: “Hacjahi cha xi vincha tjë ne, hacjahi cha xi vunihnga xitjë.”

³⁸Ngahan catsingátju nuju chunihngun xitjë hiscan xi hacuiin ngayun canihñu xa. Jingusa me casahmi me xa, hane ngayun cavisuhunjñu ngajñi rë xa rë me. ―‍Cuatjin cachja Jesús cojo xuta ladu rë me.

³⁹Jemu cjín xuta samaritano tsëhë nandya jan camangu cacun me cojo Jesús, ngatsë rë cjua xi cachja chjuun jan cuitjin: “Cachja me cojo ná yëjë xcusun xi casahme.”

⁴⁰Ngajan xi hya xi cafehe xuta samaritano ngajan hiscan quitahá Jesús ne, cachja xuta jan cojo rë me xi cjue cuejña me cojo rë me. Hane Jesús ne, quiji cavéjña me jo nixtin cojo xuta xi cuacun jan.

⁴¹Hane jemu cjín sa xuta xi camangu cacun me ngatsë rë cjua rë suvá Jesús.

⁴²Hane chjuun jan ne, cuitjin cachja xuta jan cojo rë na: ―‍Ha quihndë hacuiin ngatsë rë cjua riji xi mangutacuín ta, tsëhë xi suvin canuhyin cjua rë me, hane ngayin ne, hyin ta cjuaquixindaja xi me vihi xi cuaxëtje me xuta. ―‍Cuatjin cachja xuta jan.

⁴³Xi cavatju jo nixtin jan ne, cavetju Jesús cojo xuta ladu rë me, quiji me ngu nandya tsëhë distritu Galilea.

⁴⁴Ta suvá Jesús cachja me xi quixi xi xuta ne, faharcuaain me profeta xi tsëhë nangui rë me.

⁴⁵Vëhë xi hya xi tivatju Jesús ngujo nandya tsëhë distritu Galilea ne, ndaja cafahatsja xuta me ta, tsëhë xi hacuaha cojo xuta jan quiji me suhi ngajan Jerusalén, hane ngajan cavëë me yëjë xcusun xi casahmi Jesús nixtin rë suhi jan.

⁴⁶Hya xi camá ne, cavuya cafehe me Caná, ngu nandya tsëhë distritu Galilea, hiscan xi casahmi me xi nandá ne, cavuya camá xan rë uva. Hane ngajan nandya Capernaum ne, cavéjña ngu xutaxa rë xi hmu rë cha quihndi rë me.

⁴⁷Hane xi camachaya rë me xi cafehe Jesús ngajan Caná ne, cavetju me quijitjengui me Jesús. Hane xi cafehe me jan ne, cafehya me favor cojo Jesús xi cjue Jesús cojo rë me nangui rë me xi sahmi Jesús xi cumandaja quihndi rë me ta ha tu hora sa xi cueya.

⁴⁸Ngajan xi Jesús ne, cachja me cuitjin cojo xutaxa rë jan: ―‍¡Ngayujun ni ngayun ne, sa xi chuun cjuarcun ne, cumanguaain camahani tacún cojo ná! ―‍Cuatjin cachja Jesús.

⁴⁹Ngajan xi xutaxa rë jan ne, cuitjin cafayangui me: ―‍Tatá, cuanguen sanii, chaja sa xi cueya quihndi naha. ―‍Cuatjin cafayangui me.

⁵⁰Hane Jesús ne, cuitjin cachja me: ―‍Cuma cuangun ta, quihndi nuju ne, jimandaja cha. ―‍Cuatjin cachja Jesús. Hya xi camá ne, xutaxa rë jan ne, camacjain rë me cjua xi cachja Jesús, hane cavetju me quiji me.

⁵¹Hane ndiya cjui me ne, cavechútáha me ngujo cha mosu hndixahan rë me, hane cachja cha cojo rë me xi cha quihndi rë me ne, tijimandaja cha.