San Juan 4:25-48

²⁵Niꞌr rënu Lëꞌ ngul naꞌ, rnanu: ―Nözdaꞌ ral‑laꞌ guidëꞌ Mesías, Bönniꞌ naꞌ lëꞌ Cristo. Catiꞌ guidrëꞌ Lëꞌ quíxjöiꞌnëꞌ rëꞌu yúguꞌtë.

²⁶Jesús rëꞌ‑nu: ―Lëczëꞌ, ruíꞌlenëꞌ liꞌ didzaꞌ.

²⁷Ractë cni guludxinëꞌ bönniꞌ usë́d queëꞌ Jesús, atiꞌ gulubannëꞌ le ruíꞌlenëꞌ‑nu ngul didzaꞌ, san cutu burúguinëꞌ gnabnëꞌ Lëꞌ nitúëꞌ, cugnë́ꞌ: “¿Bizxa rnabnuꞌ lënu?” o: “¿Bizxa didzaꞌ ruíꞌlenuꞌ‑nu?”

²⁸Niꞌr bucaꞌnnu niꞌ xchöꞌnu ngul naꞌ, atiꞌ böajnu laꞌ yödz, zjödxnu nup nacuáꞌ niꞌ,

²⁹rnanu: ―Gul‑dá, gléꞌiliꞌ‑nëꞌ bönniꞌ gudxëꞌ nedaꞌ yúguꞌtë le chnunaꞌ. ¿Naruꞌ cunactsëꞌ Lëꞌ Cristo?

³⁰Niꞌr gularúj bunách yödz naꞌ, guladxinëꞌ ga zoëꞌ Jesús.

³¹Tsal niꞌ zhuöjnu ngul naꞌ, glunëꞌ bayúdx bönniꞌ usë́d queëꞌ Jesús, tëꞌ Lëꞌ: ―Bönniꞌ Usëdi, gdagu.

³²Jesús rëꞌ lequëꞌ: ―Dë tu le rahuaꞌ, le cunö́ziliꞌ.

³³Niꞌr gulanabi lzaꞌquëꞌ tuëꞌ yetúëꞌ bönniꞌ usë́d queëꞌ, taꞌnë́ꞌ: ―¿Nuzxa chdguaꞌtsa le gdahuëꞌ?

³⁴Niꞌr Jesús rëꞌ lequëꞌ: ―Le nabánidaꞌ nac gunaꞌ ca rëꞌnnëꞌ Xuzaꞌ nasölëꞌë nedaꞌ, len udx gunaꞌ xchinëꞌ.

³⁵Cni rnaliꞌ lbiꞌiliꞌ: “Yetáp beoꞌ huadxín dza lapruꞌ.” Nedaꞌ rëpaꞌ lbiꞌiliꞌ: Gul‑chís lauliꞌ uyuliꞌ bunách nacgac ca gap naduzgac, le chnabidxgac quië tsajlapruꞌ.

³⁶Bönniꞌ naꞌ rlapëꞌ rziꞌë lazxjëꞌ, atiꞌ lë naꞌ rlapëꞌ bönniꞌ naꞌ, nac quië gataꞌ quegac bunách yöl‑laꞌ naꞌbán gdu, quië gac ludziji tsazxö́n nu raz len nu rlap.

³⁷Nac gdutë li lë naꞌ rna cni: “Tu nu raz, len yetú nu rlap.”

³⁸Nedaꞌ bsölaꞌa lbiꞌiliꞌ tsajlapliꞌ ga cutu guzliꞌ. Glun dxin glaz bunách yubl, atiꞌ lbiꞌiliꞌ ruziꞌliꞌ xbey dxin naꞌ nunquëꞌ.

³⁹Gulayejlëꞌë Jesús zian bunách Samaria nacuáꞌ yödz Sicar naꞌ niꞌa qui xtídzaꞌnu ngul naꞌ, bennu lnaꞌ lau queëꞌ, gnanu: “Gudxëꞌ nedaꞌ yúguꞌtë le chnunaꞌ.”

⁴⁰Catiꞌ guladxinëꞌ bönniꞌ Samaria ga niꞌ zoëꞌ Jesús, glátaꞌyuëꞌ lahuëꞌ ugáꞌnlenëꞌ lequëꞌ. Yechóp dza bugaꞌnëꞌ niꞌ Jesús.

⁴¹Cni guc, gulayejlëꞌë Lëꞌ ziántërëꞌ caꞌ bönniꞌ niꞌ niꞌa qui didzaꞌ bëꞌë Jesús.

⁴²Niꞌr glëꞌ‑nu ngul naꞌ bönniꞌ niꞌ, taꞌnë́ꞌ: ―Naꞌa réjlëꞌtuꞌ Lëꞌ, clëgz niꞌa qui didzaꞌ bëꞌu liꞌ, san lëzcaꞌ le byö́nituꞌ Lëꞌ netuꞌ, len nö́zituꞌ le nactë naquëꞌ Cristo, Nu ruslá bunách yödzlyú, bönniꞌ ni.

⁴³Yechóp dza caꞌ, buzë́ꞌë Jesús luyú Samaria, zijëꞌ luyú Galilea.

⁴⁴Cni benëꞌ, le gdíxjöꞌë Lëczëꞌ Jesús, gnëꞌ: “Cutu tun ba laꞌn bönniꞌ ruꞌë didzaꞌ uláz queëꞌ Dios, bunách uládz queëꞌ.”

⁴⁵Catiꞌ bdxinëꞌ Jesús luyú Galilea, glunëꞌ Lëꞌ ba laꞌn bönniꞌ Galilea naꞌ le yjaquëꞌ caꞌ Jerusalén catiꞌ guc Lni Pascua len gulaléꞌinëꞌ le benëꞌ niꞌ Jesús.

⁴⁶Niꞌr böjëꞌ Jesús yödz Caná luyú Galilea, ga niꞌ benëꞌ ga böac xisi uva nis. Lu yödz Capernaum naꞌ zoëꞌ bönniꞌ dë lu nëꞌë uláz queëꞌ bönniꞌ rna bëꞌë, atiꞌ réꞌibiꞌ biꞌi bönniꞌ queëꞌ bönniꞌ naꞌ dë lu nëꞌë.

⁴⁷Catiꞌ byönnëꞌ bönniꞌ ni chbuzë́ꞌë Jesús luyú Judea len budxinëꞌ luyú Galilea naꞌ, niꞌr gyijëꞌ ga naꞌ zoëꞌ Jesús, len gútaꞌyuëꞌ lahuëꞌ guidëꞌ lidxëꞌ, duhuenëꞌ‑biꞌ biꞌi bönniꞌ queëꞌ naꞌ, le chraqui gatbiꞌ.

⁴⁸Niꞌr Jesús rëꞌ lëꞌ: ―Cutu caꞌ tséjlëꞌliꞌ chquiꞌ cutu gléꞌiliꞌ le nacgac bëꞌ len yuguꞌ yöl‑laꞌ huac gunaꞌ.