San Juan 20:17-30

¹⁷Ngajan xi Jesús ne, cuitjin cachja me cojo rë na: ―‍Ha quihndë xicachunhñuu sa ná ta cjëë cjuë́neje cjuë́tjënguë Nina Nahmi naja. Peru tánguntjengun xuta ladu naha xi yahnga, hane cuitjin tinújun cojo rë me: “Cjuë́neje, cjuë́tjënguë Nahmi naha, me xi hacuaha Nahmi nuju, me xi Nina naha hacuaha Nina nuju ngayujun ni.” Cuatjin tinújun. ―‍Cuatjin cachja Jesús.

¹⁸Ngajan xi na María na Mágdala jan ne, quiji cachja na cojo xuta ladu rë Jesús cuitjin: ―‍¡Cahvë maestru naja! ―‍Cuatjin cachja na. Hacuaha cachja na cjua xi cachja Jesús cojo rë na.

¹⁹Hane xi camajñu ndaja tsëhë nixtin tjun tjun tsëhë totje jan ne, tjin tangun xuta ladu rë Jesús jan. Hane tichjáhñu tingotjo ndihya siu me, tsëhë xi tsacjun me xutaxa rë yungun jan. Hya xi camá ne, cafehetsejen Jesús casecun me ngajñi rë xuta ladu rë me, hane cuitjin cachja me: ―‍Cjuandaja cjuajeya catejña cojo nuju. ―‍Cuatjin cachja me.

²⁰Hane xi cavatju cachja me cjua vëhë ne, sehe catsingacun me tsja me hacuaha catsingacun me ngu ladu ntsacu ndanisin rë me. Ngajan xi xuta ladu rë me jan ne, jemu ndaja camá rë me hora xi cavëë me maestru naja.

²¹Hane cachja nga Jesús cojo rë me xi cuacun jan cuitjin: ―‍Cjuandaja cjuajeya catejña cojo nuju. Sacuatjin catsingatju ná Nina Nahmi naja ne, hacuaha cuatjin tsingátju nuju ngayun. ―‍Cuatjin cachja Jesús.

²²Hane xi cavatju cachja me cjua vëhë ne, sehe cachimatjo me xuta jan, sehe cachja me cuitjin: ―‍Chjuhunntsun Hasen rë Nina cahntsua xahasen nuju.

²³Xuta xi ninchatuhun jyë́ rë me ne, ha camanchataha. Hane xuta xi ninchatuun jyë́ rë ne, ha camanchataain. ―‍Cuatjin cachja Jesús.

²⁴Tomás, me xi chja me tsëhë Cha Lihma, ngu xuta ladu rë Jesús ngajñi rë me xi tejó jan ne, cuajin me tacun me hya xi cafehe Jesús hiscan xi tjin tangun xuta ladu rë me xi yahnga jan.

²⁵Ngajan xi xuta ladu rë Jesús xi yahnga jan ne, cuitjin cachja me cojo Tomás: ―‍Cahyin Nai naja. ―‍Cuatjin cachja me. Peru Tomás ne, cuitjin cachja me: ―‍Sa xi scueen hiscan cavanguihmu rë xin tsja me hacuaha tsinguiseen rcuntsa hiscan cavisehen xin jan hacuaha cuetahanntsaan ngu ladu ntsacu ndanisin rë me ne, cumacjaain camahani ná. ―‍Cuatjin cachja Tomás.

²⁶Xi cavatju jyin nixtin jan ne, tjin tangun nga xuta ladu rë Jesús cahntsua ndihya, hacuaha cojo Tomás tacun me cojo me xi cuacun vë. Hane cafehe nga Jesús casecun me ngajñi rë me xi cuacun vë, ha ndasa tichjá tingotjo ndihya. Hane sehe cachja Jesús cuitjin: ―‍Cjuandaja cjuajeya catejña cojo nuju.

²⁷Sehe cachja me cojo Tomás cuitjin: ―‍Jarë rcuntsun. Chutsujun ntsa ne. Hacuaha jarë ntsun. Ninguisuhun ngu ladu ntsacu ndanisin naha. Tejñuxun xi cuatjin macjaain nuju. Catamacjain nuju. ―‍Cuatjin cachja Jesús.

²⁸Ngajan xi Tomás ne, cuitjin cafayangui me tsëhë Jesús: ―‍¡Ngayun Nai naha! ¡Ngayun Nina naha! ―‍Cuatjin cafayangui me.

²⁹Hane Jesús ne, cuitjin cachja me: ―‍¿Há macjain nuju ngatsë rë xi tichutsujun ná? Ndatjin, peru jemu ndaja tsëhë me xi macjain rë, ha ndasa vutsijin ná me. ―‍Cuatjin cachja Jesús.

³⁰Quihndë ne, jemu cjín sa cjuarcun casahmi Jesús xcun xuta ladu rë me xi camahindiin xcun xujun vihi.