San Juan 19:14-23

¹⁴Mbɨter arɨ Pascua pieta ãgua Pilato aipo ehi judío eta upe: —¡Ndo co pe rerecuar cute! —ehi.

¹⁵Ahe rumo osapucai pĩratá aipo ehi yuvɨreco: —¡Tomano! ¡Tomano ité! ¡Tayatɨcasa! —ehi yuvɨreco chupe. Pilato rumo aipo ehi chupe: —¿Evocoiyase ayatɨca ucara pe rerecuar? —ehi. Pahi eta rerecuar rumo omboyevɨ yuvɨreco chupe: —¡Ore ndorovɨreco iri ambuae mborerecuar, Roma pendar mborerecuar ɨvate catu vahe güeraño ité orovɨreco! —ehi yuvɨreco.

¹⁶Ipare Pilato omondo sundao upe yatɨca uca ãgua. Ichui vɨraso yuvɨreco.

¹⁷Evocoiyase Jesús vɨnose curusu seraso “Ava Ãcagüer” serer vahesave (ahe serer hebreo ñehe pɨpe Gólgota).

¹⁸Aheve oyatɨca yuvɨreco. Seseve avei oyatɨca ñuvɨrío ava yuvɨreco, ñepei-pei yɨque ɨvɨi.

¹⁹Pilato oicuachía uca omondo curusu rese aipo ehi vahe: “Co Jesús, Nazaret pendar, judío Rerecuar guasu” ehi.

²⁰Setá iteanga ava oyeroquɨ co icuachiaprɨ rese yuvɨreco. Esepia, icuachiasa hebreo, latín iyavei griego ñehe pɨpe. Iyavei yatɨcasa namombrɨimi eté tecua sui.

²¹Sese pahi eta rerecuar aipo ehi Pilato upe yuvɨreco: —Aní, ‘Judío Rerecuar guasu’ ere icuachía; iyacatu rumo, ‘Oyeapo pota tẽi vahe judío Rerecuar guasu’ erera icuachía imoi —ehi yuvɨreco chupe.

²²Pilato rumo omboyevɨ: —Co aicuachía vahe, ẽgüe ehiño itera oĩ —ehi.

²³Jesús atɨca pare evocoi irungatu sundao, omonuha iturucuar oyeupe imboyaho ãgua yuvɨreco. Oipɨsɨ avei iturucuar ivrɨ pendar nimbovɨvɨsai vahe, ñepei reseve pucuño tẽi vahe.